جيىنعا ەلىمىزدىڭ تۇپكىر-تۇپكىرىنەن وڭىرلىك قولباسشىلىقتار قولباسشىلارىنىڭ, اكادەميا باستىعىنىڭ جانە اسكەري بولىمدەر مەن «ب» ارنايى جاساق كومانديرلەرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارلارى قاتىستى. ەلۋدەن استام اسكەري تاربيەشى باس قوسقان وقۋ-ادىستەمەلىك جيىندا تالقىلانعان تاقىرىپ وزەكتى.
جيىندى باستاعان ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستارى جونىندەگى ورىنباسارى, حالىق قاھارمانى, گەنەرال-مايور قايرات ۇمبەتوۆ اسكەردەگى جەكە قۇرامنىڭ تاربيە جۇمىسىن جاڭا دەڭگەيگە كوتەرۋ ءۇشىن بىرقاتار ماڭىزدى ماسەلەگە باسا ءمان بەرۋگە شاقىردى. اسكەردىڭ ءوز ىشىندە ءتۇيىنى شەشىلە قويماعان تۇيتكىلدى ماسەلەلەرگە تۇبەگەيلى نۇكتە قويۋ ءۇشىن اۋەلى ونى اشىق تالقىعا سالىپ, شەشىلۋ جولدارىن ۇسىنۋ قاجەت.
وسىناۋ جۇمىستاردى ءبىر ىزگە سالۋ ءۇشىن ىشكى ىستەر ءمينيسترىنىڭ «ۇلتتىق ۇلان اسكەريلەرى بويىندا جاڭا زامان تالابىنا ساي مورالدىق, اسكەري, جاۋىنگەرلىك قاسيەتتەردى قالىپتاستىرۋدا تاربيە جانە الەۋمەتتىك-قۇقىقتىق جۇمىستاردى ۇيىمداستىرۋ» اتتى 2023 جىلدىڭ 15 مامىرىنداعى №396 بۇيرىعى اياسىندا العاشقى ساباق نۇسقاۋلىق-ادىستەمەلىك باعىتتا ءوتتى. ۇلتتىق ۇلاننىڭ تاربيە جانە الەۋمەتتىك-قۇقىقتىق جۇمىستارى جونىندەگى باس باسقارماسىنىڭ باستىعى, پولكوۆنيك الەكساندر كرامار جەكە قۇراممەن تاربيە جۇمىستارى مەن پسيحولوگيالىق جانە يدەولوگيالىق جۇمىستاردى جاڭعىرتۋ باعىتىنداعى بۇيرىقتىڭ نەگىزگى ءارى ماڭىزدى تەتىكتەرىن قالاي جۇزەگە اسىرۋ كەرەكتىگىن جەتكىزدى. سونىمەن قاتار جەكە قۇراممەن جۇمىس ىستەۋدىڭ نەگىزگى نىساندارى مەن ادىستەرى تالقىلانىپ, ءار وفيتسەردىڭ قۇجاتتاردى قانشالىقتى مەڭگەرگەنى تەكسەرىلىپ, جاۋىنگەرلىك دايارلىقتىڭ نەگىزگى پاندەرىنەن سىناقتان ءوتتى.
ۇلتتىق ۇلان ارداگەرى, زاپاستاعى پولكوۆنيك مۇرات اتيبەەۆ «ۇلتتىق ۇلانداعى وفيتسەرلىك جيىننىڭ قازىرگى جاعدايى» تاقىرىبىندا بايانداما جاساپ, «شىعىس» وڭىرلىك قولباسشىلىعى ارداگەرلەر كەڭەسىنىڭ توراعاسى, زاپاستاعى پولكوۆنيك ايدار ورازباەۆ «اسكەري قوعامدىق ۇيىمدارمەن جانە «ساربازدار اناسى» كوميتەتىمەن بىرلەسە جۇمىس اتقارۋ» تۋراسىندا, سونىمەن قاتار «ۇلتتىق ۇلان ساپىنداعى اسكەريلەر اراسىندا قۇقىق بۇزۋشىلىقتىڭ الدىن الۋ بويىنشا جاسالعان پروفيلاكتيكالىق جۇمىستار» تاقىرىبىندا نۇسقاۋلىق-ادىستەمەلىك ساباق ءجۇر-
گىزدى.
«قالقان» گازەتى مەن «بۇركىت» جۋرنالى رەداكتسياسىنىڭ اعا وفيتسەرى, پولكوۆنيك قۋانىش قوجاحمەتوۆ اسكەري تاربيەشىلەردى بۇقارالىق اقپارات قۇرالدارىمەن جۇمىس ىستەۋدە قانداي نەگىزگى قاعيدالارعا ءمان بەرۋ قاجەتتىگى تۋراسىندا ءدارىس وتكىزدى. «ۇلتتىق ۇلانعا بايلانىستى كەيبىر جالعان اقپارات قوعام اراسىندا رەزونانس تۋدىرىپ جاتادى. مۇندايدا شۇعىل ارەكەت ەتىپ, قىسقا مەرزىمدە ناقتى ءارى تولىق راستالعان مالىمەتتى جاريالاۋعا تىرىسۋ قاجەت», دەگەن سپيكەر باق-پەن جۇمىس ىستەۋ بارىسىندا وڭىرلىك قولباسشىلىقتارداعى ءباسپاسوز قىزمەتى باسشىلارىنىڭ جۇمىسىن ودان ءارى جانداندىرۋعا باعىتتالعان بىرقاتار ۇسىنىسىن ايتتى.
اسكەردەگى تاربيە جۇمىسىن ۇيىمداستىرۋ ماسەلەلەرىن جەتىلدىرۋ, جەكە قۇرامنىڭ اسكەري ءتارتىبى مەن قۇقىقتىق ءتارتىپتى, سونداي-اق اسكەري-پاتريوتتىق جۇمىستى نىعايتۋعا ارنالعان جيىندا اسكەري قىزمەتشىلەر اراسىنداعى مورالدىق-پسيحولوگيالىق دايىندىق پەن ءسۋيتسيدتىڭ الدىن الۋعا, جارعىلىق ەمەس قارىم-قاتىناستاردى جويۋعا ەرەكشە نازار اۋدارىلدى. اسكەري تاربيەشىلەر وسى ءۇش كۇن ىشىندە العان بىلىمدەرى مەن تاجىريبەلەرىن جاس ساربازدارمەن بولىسپەك.
