جامبىل اۋدانىنا قاراستى شوقاي اۋىلىنداعى №3 ورتا مەكتەپتىڭ جاڭا عيماراتى پايدالانۋعا بەرىلدى. وسىلايشا, اۋىلدىقتاردى الاڭداتقان وزەكتى ماسەلە جاڭا وقۋ جىلىندا ساتىمەن شەشىلدى. 150 وقۋشىعا ارنالعان جاڭا نىساندا وقۋشىلاردىڭ ساپالى ءبىلىم الۋىنا بارلىق مۇمكىندىك قاراستىرىلعان.
– بۇگىندە وڭىردەگى ءبىلىم نىساندارىنىڭ ماتەريالدىق-تەحنيكالىق بازاسىن نىعايتۋعا باسا ءمان بەرىپ وتىرمىز. وبلىس ورتالىعىنان بولەك, شالعايداعى ەلدى مەكەندەردە دە جاڭا نىساندار بوي كوتەرىپ جاتىر. اپاتتى جاعدايداعى ءبىلىم وشاقتارى مەن ءۇش اۋىسىمدا وقيتىن جانە ورىن تاپشىلىعى بار مەكتەپتەردىڭ ماسەلەسى جىل وتكەن سايىن شەشىمىن تاۋىپ كەلەدى. اتقارىلعان ناقتى جۇمىستاردىڭ ناتيجەسىندە سالادا جەتكەن جەتىستىكتەر از ەمەس. بيىل اعارتۋشى سالاعا 284,8 ملرد تەڭگە قاراستىرىلدى. بۇل وبلىس بيۋدجەتىنىڭ جارتىسىنان جوعارى. سونداي-اق قازىرگى تاڭدا 25 ءبىلىم نىسانىنىڭ قۇرىلىسى جۇرگىزىلىپ جاتىر. جىل سوڭىنا دەيىن 9 مەكتەپ پەن 5 مەكتەپتىڭ جاپسارلاس قۇرىلىسى اياقتالادى. ال 11 نىسان كەلەسى جىلى پايدالانۋعا بەرىلەدى. شوقاي اۋىلىنىڭ وقۋشىلارى جاڭا مەكتەپتىڭ تابالدىرىعىن اتتاپ وتىر. وسىلايشا, اۋىلداعى ورىن تاپشىلىعى بار №3 مەكتەپتىڭ ماسەلەسى تولىقتاي شەشىلدى. ەندى بالالار زاماناۋي تالاپقا ساي جابدىقتالعان ۇلكەن ءبىلىم ورداسىندا ءبىلىم الادى, – دەدى ءبىلىم ورداسىنىڭ اشىلۋ سالتاناتىندا وبلىس اكىمىنىڭ ءبىرىنشى ورىنباسارى نۇرجان كالەندەروۆ.
ول بالالاردىڭ الاڭسىز ءبىلىم الۋى ءۇشىن مەملەكەت تاراپىنان كورسەتىلەتىن قولداۋ جالعاسا بەرەتىنىن تىلگە تيەك ەتىپ, ءوڭىر باسشىسىنىڭ اتىنان 10 نوۋتبۋك سىيلادى. اۋىل ازاماتتارىنىڭ اتىنان ءسوز العان بولات قوجابەكوۆ تۇرعىنداردىڭ ءوتىنىشىن دەر كەزىندە ورىنداعان جەرگىلىكتى اتقارۋشى بيلىككە العىس ايتتى.
عيمارات قۇرىلىسىن جۇرگىزگەن «تاراز ستروي-2004» جشس وكىلى قۋات باققاراەۆ جاڭا مەكتەپتىڭ سيمۆوليكالىق كىلتىن مەكتەپ ديرەكتورىنا تابىستادى. جاڭا مەكتەپ سپورتزالى, ءماجىلىس زالى, شەبەرحانا, تىگىن بولمەسى, روبوتتەحنيكا سەكىلدى وزگە دە قاجەتتى كابينەتتەرمەن جابدىقتالعان.
جامبىل وبلىسى,
جامبىل اۋدانى
