قاراجالدىڭ قوينىندا جاسىرىنعان قازىنا بارى حح عاسىردىڭ باس كەزىندە-اق بەلگىلى بولعان. بىراق بۇل ولكەنىڭ كەشەندى تۇردە يگەرىلە باستاۋى عالىم قانىش ساتباەۆتىڭ ەسىمىمەن تىكەلەي بايلانىستى. 1947 جىلى قاراعاندىدا وتكەن كسرو جانە قازكسر عىلىم اكادەميالارىنىڭ بىرلەسكەن كوشپەلى ماجىلىسىندە تەمىر, مارگانەتسكە باي كەن ورنىن يگەرۋ تۋرالى ناقتى ءسوز بولادى. ءسويتىپ, سول تۇستا جۇمىسشىلار كەنتىنىڭ العاشقى قازىعى قاعىلادى.
كەن يگەرۋ تەك جەر قويناۋىنا قاتىستى ەمەس. ەڭ الدىمەن, تەمىر جولعا كوپ ارقا سۇيەۋگە تۋرا كەلەدى. 1955 جىلى «اتاسۋ – قاراجال» تەمىر جولى پايدالانۋعا بەرىلگەننەن كەيىن ولكەدە ءوندىرىس قارقىندى دامي باستادى. «باتىس قاراجال» كارەرى ىسكە قوسىلىپ, «اتاسۋرۋدستروي» ترەسى قۇرىلدى. وسىنداي ىرگەلى ىستەردىڭ ارقاسىندا 1956 جىلى قاراجالدان العاشقى جوعارى ساپالى كەن تيەلگەن پلاتفورمالار رەسەيدىڭ ۋرال مەتاللۋرگيالىق كومبيناتىنا جول تارتتى.
ءوندىرىس دامىعان جەردە الەۋمەتتىك-مادەني ءومىردىڭ دە كورىگى قىزا تۇسەتىنى ايتپاسا دا تۇسىنىكتى. 1957-1958 جىلدارى قاراجالدا ەكى پاتەرلى كوتتەدجدەر, ساۋدا جانە قوعامدىق تاماقتاندىرۋ كاسىپورىندارى, بالاباقشالار, مەكتەپتەر, ەمدەۋ مەكەمەلەرى پايدا بولدى. 1957 جىلى قاراجال جىلۋ-ەلەكتر ورتالىعى ىسكە قوسىلدى. تۇرعىندار جىلۋمەن, سۋمەن قامتاماسىز ەتىلدى. وسىنىڭ ءبارى ارينە, حالىقتىڭ ەرتەڭگە دەگەن سەنىمىن نىعايتتى, قۇلشىنىس, جىگەرىن جاني ءتۇستى.
1970-جىلداردىڭ باس كەزىندە جايرەم كەن ورنىن يگەرۋگە قاتتى كوڭىل ءبولىندى. قاراجال قالاسىنا قاراستى جايرەم كەنتى بۇكىلوداقتىق ەكپىندى كومسومولدىق قۇرىلىس بولىپ جاريالاندى. كەڭەس وداعىنىڭ تۇكپىر-تۇكپىرىنەن اعىلعان جاستار ولكەنىڭ دامۋىنا زور ۇلەسىن قوستى.
وكىنىشكە قاراي, وداقتىڭ ىدىراپ, ەكونوميكالىق بايلانىستاردىڭ ءۇزىلۋى قالانىڭ دامۋىنا كەرى اسەرىن تيگىزبەي قويمادى. تۇرعىندار جان-جاققا كوشە باستادى. قۇلدىراۋ باستالدى. دەگەنمەن, كەيىنگى جىلدارى قالانىڭ ەكىنشى تىنىسى اشىلعانداي. قازىر قالا تەرريتورياسىندا «جايرەم تاۋ-كەن بايىتۋ كومبيناتى» اق, «وركەن اتاسۋ» جشس-ءنىڭ «وركەن» وكىلدىگى, باريتتىك اۋىرلاتقىش شىعاراتىن «Karazhal Operاting», تەمىر-مارگانەتس كەنىن وندىرەتىن «Indjaz», باريت كونتسەنتراتىن وندىرەتىن «Mining Technology KZ», تاۋ جىنىستارى ماسساسىن (تەمىر, مارگانەتس) وڭدەيتىن «Global Mining Technology» سەرىكتەستىكتەرى جۇمىس ىستەپ تۇر.
ۇلىتاۋ وبلىسىنىڭ قۇرىلۋى قاراجالدىڭ دامۋىنا سەرپىن بەرە باستادى. وبلىستىق ماڭىزى بار «قاراجال – اتاسۋ» تاس جولى قالپىنا كەلتىرىلدى. بيىل عانا قاراجالدا – 19, جايرەم كەنتىندە 13 كوشە جولى جاڭارتىلدى. سونىمەن بىرگە №3, 7 مەكتەپتەردىڭ ستاديوندارى جوندەلىپ, سپورت زالدارى جىلۋ جۇيەلەرىنە قوسىلدى. قالادا كەلەسى جىلى جاڭا مەكتەپتىڭ قۇرىلىسى باستالماق. دەنساۋلىق ساقتاۋ سالاسىنداعى كەمشىلىكتەر دە بىرتىندەپ جويىلىپ كەلەدى.
قاراجال حالقىنىڭ بۇقارالىق سپورتپەن شۇعىلدانۋىنا جاعداي جاساۋ ماقساتىندا جاڭا سپورت نىساندارىن سالۋ جوسپارلانىپ وتىر. وڭىردە باسسەين سالۋ قولعا الىنسا, جايرەم كەنتىندە باسسەينى بار دەنەشىنىقتىرۋ جانە ساۋىقتىرۋ كەشەنىنىڭ قۇرىلىسىنا جوبالىق-سمەتالىق قۇجاتتاما ازىرلەنىپ, «گورنياك» ستاديونىن رەكونسترۋكتسيالاۋ جونىندەگى جوبا دا ىسكە اسىرىلۋدا. قاراجال 60 جىلدىق مەرەيتويىن وسىنداي جەتىستىكپەن جوعارى دەڭگەيدە اتاپ ءوتتى.
ۇلىتاۋ وبلىسى,
قاراجال قالاسى
