عيمارات 600 بالاعا ارنالعان. مۇندا 24 وقۋ كابينەتى, اسحانا, سپورت زال, كىتاپحانا, زەرتحانالىق كابينەتتەر بار. قۇرىلىس كومپانياسى ءبىلىم كۇنىنە ۇلگەرۋگە كەستەدەن وزا جۇمىس ىستەگەن. 1 قىركۇيەكتە مەكتەپ-گيمنازيا تابالدىرىعىن ءبىرىنشى سىنىپقا بارعان 250 بالا اتتادى. مەرەكەگە وراي شاھاردىڭ باس ۇستازى بارشا مۇعالىمدەر مەن اتا-انالاردى, وقۋشىلاردى ءبىلىم كۇنىمەن قۇتتىقتاپ, جاڭا وقۋ جىلىندا تابىس تىلەدى.
– №65 مەكتەپ-گيمنازيا ۇجىمى – قالاداعى ەڭ وزىق ءبىلىم وردالارىنىڭ ءبىرى. بيىل جاڭا وقۋ كورپۋسى پايدالانۋعا بەرىلىپ وتىر. جالپى, وسى جىلى مەگاپوليستىڭ مەكتەپ تۇلەكتەرى جوعارى ناتيجەلەرگە قول جەتكىزدى. ماسەلەن, ۇبت قورىتىندىسى بويىنشا ولاردىڭ 85 پايىزى مەملەكەتتىك گرانتتاردى جەڭىپ الدى. قالامىزدا جىل سايىن جاڭا مەكتەپتەر سالىنىپ جاتىر. ءبىلىم ساپاسى ارتىپ كەلەدى, ينفراقۇرىلىمى جاقسارۋ ۇستىندە. وقۋشىلاردىڭ قاۋىپسىزدىگىنە دە باسا ءمان بەرىلىپ وتىر. سوندىقتان بالالاردان تالاپ ەتىلەتىنى – تەك قانا ءبىلىم الۋ, – دەدى ج.تاجيەۆا.
جالپى, شىمكەنتتە 27 مىڭنان استام وقۋشى 1-سىنىپقا باردى. قالالىق ءبىلىم باسقارماسىنىڭ مالىمەتىنشە, 1-سىنىپتا وقيتىن وقۋشىلار سانى جىل سايىن ارتىپ كەلەدى. ماسەلەن, 2021-2022 وقۋ جىلىندا 1-سىنىپقا قابىلدانعان وقۋشىلار – 25 005 بولسا, 2022-2023 جىلى – 26 781, ال بيىلعى وقۋ جىلىندا 26 969 وقۋشىنى قۇراعان. ياعني مەكتەپكە جاڭادان بارعان وقۋشىلار جىل ساناپ ارتىپ كەلەدى دەگەن ءسوز. سونىمەن بىرگە مەگاپوليستە ورتا ءبىلىم بەرەتىن 246 مەكتەپتە 232 788 وقۋشى ءبىلىم الىپ جاتىر. مەكتەپتەردە 20 184 پەگاگوگ جۇمىس ىستەيدى.
شىمكەنت
