جاڭا وقۋ جىلىنان باستاپ 2,5 مىڭنان استام وقۋشى قازاق جانە ورىس تىلدەرىندە ءتالىم-تاربيە الاتىن بولادى. جان جادىراتار جاڭا جوبا بولات وتەمۇراتوۆ قورىنىڭ جەكە ينۆەستيتسياسى ەسەبىنەن جۇزەگە اسىرىلىپ, قالانىڭ ءبىلىم قورىنا بەرىلدى. سالتاناتتى جيىنعا وقۋ-اعارتۋ ءمينيسترى عاني بەيسەمباەۆ, وبلىس اكىمى ەرمەك مارجىقپاەۆ, «ۆەرنىي كاپيتال» ينۆەستيتسيالىق توبىنىڭ باس ديرەكتورى ەرلان وسپانوۆ, بولات وتەمۇراتوۆ قورى قامقورشىلىق كەڭەسىنىڭ توراعاسى الماز شارمان, اتا-انالار مەن وقۋشىلار قاتىستى. اق تۇيەنىڭ قارنى جارىلعان قۋانىشتى ساتتە جۇزدەرى جادىراعان اتا-انالار ءبىر-ءبىرىن قۇتتىقتاپ, مەيىرىمدىلىك مەكەنىنىڭ جۇمىسىنا ساتتىلىك تىلەدى. وبلىس اكىمى قۇتتىقتاۋ سوزىندە ءبىلىم سالاسىنداعى تۇيتكىلدى ماسەلەلەردىڭ بىرتىندەپ شەشىلىپ كەلە جاتقاندىعىن ايتىپ ءوتتى.
– قوسشى قالاسىندا تۇرعىنداردىڭ كوبەيۋىنە بايلانىستى مەكتەپتەردە ءۇش اۋىسىمدى وقىتۋ جۇيەسى بولدى. جاڭا مەكتەپتىڭ پايدالانۋعا بەرىلۋى وسى ءبىر كۇردەلى ماسەلەنى تولىعىمەن شەشىپ وتىر, – دەدى ەرمەك مارجىقپاەۆ.
سىڭعىرلاعان مەكتەپ ءۇيىنىڭ بار سالتاناتى جارقىراي كورسەتىلدى. بۇگىنگى زاماننىڭ تالابىنا تولىق جاۋاپ بەرەتىن ماتەريالدىق-تەحنيكالىق بازامەن تولايىم قامتاماسىز ەتىلگەن. ءۇش قاباتتى ءبىلىم وشاعىندا 56 وقۋ جانە 19 ارنايى كابينەت بار. سونداي-اق ەكى سپورت زالى, كەڭ دە جارىق اسحاناسى, قاجەتتى مەديتسينالىق قۇرالدارمەن جابدىقتالعان مەديتسينا كابينەتى ورنالاسقان.
كوپ قۋانىشى ەسەلەنە ءتۇستى. اتالعان قالادا تاعى ءبىر مەكتەپتىڭ اشىلۋ سالتاناتى وتكىزىلدى. ءسوز اراسىندا وبلىستىڭ ءبىلىم سالاسىن دامىتۋعا 220 ملرد تەڭگە بولىنگەنىن ايتا كەتەلىك. جاڭا وقۋ جىلىندا ءتورت مىڭ ورىندىق 6 ءبىلىم وشاعى اشىلىپ وتىر. سونداي-اق جىل سوڭىنا دەيىن 1 800 ورىندىق قوسىمشا 8 ءبىلىم بەرۋ مەكەمەسىن اشۋ جوسپارلانعان. ءبىر قۋانىشتىسى, ءبىلىم بەرۋ نىساندارىن جاڭعىرتۋ اياسىندا قاۋىپسىز ورتانى قامتاماسىز ەتۋ, جيھاز بەن كىتاپحانا قورىن مولىقتىرۋ ماسەلەلەرى شەشىلىپ جاتىر. جاڭا مەكتەپتەردى پايدالانۋعا بەرۋمەن قاتار, بۇرىنعى مەكتەپتەر دە جوندەۋدەن وتكىزىلۋ ۇستىندە. ماسەلەن, كەيىنگى ەكى جىلدا وبلىستىڭ 200 ءبىلىم بەرۋ مەكەمەسىن جوندەۋگە 12 ملرد تەڭگەگە جۋىق قارجى ءبولىندى.
وسىنىڭ بارلىعى مەيىرىمدىلىك مەكەندەرىنىڭ جاس ۇرپاققا ساپالى ءبىلىم, سانالى تاربيە بەرۋىنە كەڭ جول اشپاق. جاڭاشا تۇلەگەن, وزگەشە سالتاناتتى كەيىپكە ەنگەن ءبىلىم وشاقتارى بولاشاقتىڭ سارا جولىن وڭىنان تۇزۋگە ءتيىستى.
اقمولا وبلىسى
