فوتو: استانا قالاسىنىڭ اكىمدىگى
«اۋداندارىمىز بەن ەلدى مەكەندەرىمىزدىڭ تۇرعىندارىمەن تۇراقتى كەزدەسىپ تۇرامىن. پريگورودنىي ەلدى مەكەنىنىڭ (ەسىل اۋدانى) تۇرعىندارىمەن كەزدەستىم. وتكەن كەزدەسۋدىڭ قورىتىندىسى بويىنشا ءبىز «جول كارتاسىن» جاساعان ەدىك, وندا 30-دان اسا ءتۇرلى ماسەلە قاراستىرىلدى. بۇگىنگى كەزدەسۋدە وسى ماسەلەلەرگە جان-جاقتى شولۋ جاسالدى: 19 ماسەلە شەشىلدى, تاعى 12-ءسىن شەشۋ جۇمىسى ءجۇرىپ جاتىر. كەزدەسۋدە تۇرعىندار وزەكتى ماسەلەلەر كوتەردى: جولدار, اۋلالار مەن قوعامدىق كەڭىستىكتەر سالۋ, اپاتتى جاعدايداعى ەسكى تۇرعىن ۇيلەردى بۇزۋ, گازداندىرۋ, الەۋمەتتىك نىساندار سالۋ جانە ت.ب», دەپ جازدى باس قالا اكىمى.
جەڭىس قاسىمبەكتىڭ جازۋىنشا, 2024-2025 جىلدارى ۇلتتىق جوبا اياسىندا استانادا 24 جايلى مەكتەپ سالىنادى. ونىڭ 15-ءى ەسىل جانە نۇرا اۋداندارىندا ورنالاسادى, سول سياقتى جاڭا فورماتتاعى مەكتەپ پريگورودنىي ەلدى مەكەنىندە دە بولادى.
«سونىمەن قاتار كەزدەسۋ بارىسىندا تۇرعىندار باسسەين ماسەلەسىن كوتەردى. قالادا باسسەينگە دەگەن قاجەتتىلىك بار. الداعى 3 جىلدا مەملەكەت باسشىسىنىڭ تاپسىرماسىنا سايكەس 15 وقۋشىلار سارايىن سالۋدى جوسپارلاپ وتىرمىز. ولاردىڭ ءبىرى پريگورودنىي ەلدى مەكەنىندە ورنالاسادى, تيىسىنشە وندا باسسەين دە بولادى», دەپ جازدى اكىم.
ەلدى مەكەندەردەگى وزەكتى ماسەلەلەردىڭ ءبىرى – اپاتتى جاعدايداعى توزىعى جەتكەن تۇرعىن ۇيلەردى بۇزۋ. جەڭىس قاسىمبەك 2024 جىلى مۇنداي ۇيلەردەن تاعى 700 تۇرعىندى كوشىرۋ جوسپارلانىپ وتىرعانىن اتاپ ءوتتى.
«بۇگىنگى تۇرعىندارمەن كەزدەسۋدەن كەيىن ەڭ الدىمەن قانداي ماسەلەلەردى شەشۋىمىز كەرەك ەكەنىن انىقتايتىن بولامىز», دەپ تۇيىندەدى ەلوردا اكىمى.
