جاڭا مەكتەپتىڭ اشىلۋ سالتاناتىنا اقمولا وبلىسىنىڭ اكىمى ەرمەك مارجىقپاەۆ, وقۋ-اعارتۋ ءمينيسترى عاني بەيسەمباەۆ, قوسشى قالاسىنىڭ اكىمى گايدار قاسەنوۆ, «ۆەرنىي كاپيتال» ينۆەستيتسيالىق توبىنىڭ باس ديرەكتورى ەرلان وسپانوۆ, «بولات وتەمۇراتوۆ» قورى قامقورشىلىق كەڭەسىنىڭ توراعاسى الماس شارمان جانە باسقا دا رەسمي قوناقتار, اتا-انالار قاتىسىپ, جۇرەكجاردى تىلەكتەرىن ايتتى.
جەكە ينۆەستيتسيا ەسەبىنەن سالىنعان 1 500 ورىندىق مەكتەپ-گيمنازيانىڭ اشىلۋ سالتاناتىندا ءسوز سويلەگەن ەرمەك مارجىقپاەۆ مەملەكەت باسشىسىنىڭ تاپسىرماسىمەن بيىلعى جىلى وڭىردە 10 مەكتەپتىڭ قۇرىلىسى باستالعانىن, ولاردىڭ دەنى 2024 جىلى پايدالانۋعا بەرىلەتىنىن قۋانا ايتتى. جاڭا ءبىلىم وردالارى استانا قالاسىنىڭ ماڭىنداعى ارشالى, تسەلينوگراد, شورتاندى اۋداندارى جانە قوسشى قالاسىندا اشىلادى دەپ كۇتىلۋدە.
«قوسشى قالاسىندا تۇرعىندار سانى جەدەل وسۋىنە بايلانىستى مەكتەپ تاپشىلىعى تۋىنداپ, بالالاردى ءۇش اۋىسىممەن وقىتۋعا تۋرا كەلدى. بۇل پروبلەمانى شەشۋ ءۇشىن 2022 جىلى 1200 ورىندىق ءبىر جاڭا مەكتەپ اشىلدى. ەندى مىنە ەكەۋىنىڭ قۇرىلىسى اياقتالىپ, پايدالانۋعا بەرىلىپ جاتىر. سونداي-اق, «جايلى مەكتەپ» ۇلتتىق جوباسى اياسىندا 2024-2025 جىلدار كەزەڭىندە 3 مەكتەپ سالۋ جوسپارلانعان. بۇل ءبىلىم وشاقتارىنداعى شامادان تىس جۇكتەمەنى ازايتىپ, ءۇش اۋىسىمدىق وقۋ جۇيەسىن جويۋعا سەپتىگىن تيگىزدى», دەدى وبلىس اكىمى.
ايتا كەتەيىك, بيىل مەملەكەتتىڭ قولداۋىمەن رەسپۋبليكا بويىنشا 130 مىڭ وقۋشىعا ارنالعان 154 مەكتەپ پايدالانۋعا بەرىلمەكشى. ونىڭ 55 مىڭ وقۋشىعا ارنالعان 39 مەكتەبى 1 قىركۇيەكتە ەسىگىن ايقارا اشتى.
«بۇگىنگى كۇنى قازاقستان بويىنشا 3 ميلليون 9 مىڭ وقۋشى العاش رەت مەكتەپ تابالدىرىعىن اتتاپ, سىزدەرمەن بىرگە تويلاپ جاتىر دەسەك بولادى. ونىڭ ىشىندە 400 مىڭعا جۋىق ءبۇلدىرشىن 1 سىنىپقا بارسا, 18 مىڭنان استام 11 سىنىپتى بىتىرمەكشى. قۇرمەتتى ۇستازدار, وقۋشىلار, اتا-انالار سىزدەردى ءبىلىمنىڭ العاشقى كۇنىمەن شىن جۇرەكتەن قۇتتىقتاۋعا رۇقسات ەتىڭىزدەر. سىزدەردىڭ شاكىرتتەرىڭىز ۇمىتتەرىڭىزدى اقتاپ, وسى ءبىلىم وشاعىنان ەل تىزگىنىن ۇستار ەلدىڭ ازاماتتارى بولىپ شىعۋىنا شىن جۇرەكتەن تىلەكتەسپىن», دەدى وقۋ-اعارتۋ ءمينيسترى عاني بەيسەمباەۆ.
ايتا كەتسەك, مەملەكەتىمىز ءبىلىم سالاسىنا ۇنەمى قولداۋ كورسەتىپ وتىرادى. سونىڭ ايقىن ايعاعى – «جايلى مەكتەپ» ۇلتتىق جوباسى شەڭبەرىندە ەلىمىزدە بۇرىن-سوڭدى بولماعان جاڭالىق – 400 جاڭا ۇلگىدەگى مەكتەپتىڭ قۇرىلىسى. ونىڭ 200-دەن استامىنىڭ قۇرىلىسى قازىردىڭ وزىندە جۇرگىزىلىپ جاتىر. مۇنىڭ ءبارى مەملەكەتىمىزدەگى اپاتتى جانە ءۇش اۋىسىمدىق مەكتەپتەردىڭ ماسەلەسىن شەشۋگە باعىتتالعان.
سونداي-اق بۇگىن قوسشى قالاسىندا 1 200 ورىندىق تاعى ءبىر مەكتەپ اشىلدى. مەكتەپتىڭ جالپى اۋدانى - 20357 مىڭ شارشى مەتر. عيمارات 3 قاباتتان, 6 بلوكتان تۇرادى. وقۋ كابينەتتەرىنىڭ سانى - 50. حيميا, فيزيكا, بيولوگيا, تەحنولوگيا كابينەتتەرى, قاجەتتى جيھازبەن تولىقتاي جابدىقتالعان. 384 ورىندىق اسحانا, 600 ورىندىق اكت زالى, اۋدانى 520 شارشى مەتر سپورت زالى, مەتال, اعاش, ماتا وڭدەۋ شەبەرحانالارى, العاشقى اسكەري دايىندىق كابينەتى بار.
جالپى, 2023-2024 وقۋ جىلىنىڭ باسىندا قوسشى قالاسى بويىنشا مەكتەپكە 10 809 وقۋشى باردى. ءبىرىنشى سىنىپ وقۋشىلارىنىڭ سانى –1321, ونىڭ ىشىندە جەكە مەكتەپتە – 77, تايتوبەدەگى مەكتەپتە – 71.
