«بيىل 115-ءشى مەكتەپكە الاش قايراتكەرى, قازاقتان شىققان العاشقى زاڭگەر, حح عاسىردىڭ باسىندا قازاق جەرىندە ساياسي-قۇقىقتىق وي-پىكىردىڭ قالىپتاسىپ, دامۋىنا ەلەۋلى ۇلەس قوسقان قوعام قايراتكەرى احمەت ءبىرىمجانوۆتىڭ ەسىمى بەرىلگەلى وتىر. بولاشاقتا احمەتتەي اتالارىڭنىڭ اتىنا ساي, ەلشىل, ادال, ءبىلىمدى ازامات بولىپ قالىپتاسۋلارىڭا تىلەكتەسپىن!», دەدى رينات زاكي ۇلى.
اتالعان ءبىلىم وشاعى بۇرىن تازا ورىس مەكتەبى بولعان. كەيىن ارالاس مەكتەپكە اۋىستىرىلىپ, بىرتە-بىرتە ورىس سىنىپتارى ازايتىلا باستادى. بىلتىردان بەرى تولىققاندى قازاق مەكتەبىنە اينالدى. بولاشاق ءبىرىمجانوۆ مەكتەبىندە 480-گە جۋىق شاكىرت وقيدى. وتكەن جىلى 2 ءبىرىنشى سىنىپ بولعان ەكەن, بيىلعى وقۋ جىلى ءبىرىنشى سىنىپتاردىڭ سانى ۇشەۋگە جەتتى.
العاشقى قوڭىراۋدان كەيىن مەكتەپ قابىرعاسىن تۇڭعىش اتتاعان بالدىرعاندار «مەكتەبىم – مەيىرىم مەكەنى» اتتى بىرىڭعاي سىنىپ ساعاتىنا قاتىستى.
