«مەملەكەت باسشىسى قاسىم-جومارت توقاەۆتىڭ بۇگىنگى قازاقستان حالقىنا ارناعان «ادىلەتتى قازاقستاننىڭ ەكونوميكالىق باعدارى» اتتى جولداۋىن كورىپ, تىڭداپ شىقتىم. اقوردانىڭ جان-جاقتى تالداۋىمەن جازىلعان قۇجات دەپ قابىلدادىم. بۇعان دەيىن ەل دامۋىنىڭ 2050-گە دەيىنگى باعدارلاماسى دەگەندى ۇران ەتىپ جەلدىرمە سوزگە كوپ ەرگەن ەدىك. بۇل جولعى جولداۋ جاڭا قازاقستاندى قالىپتاستىرۋعا باعىتتايتىن باعدار ەكەنى ايقىندالا ءتۇستى», دەيدى حانگەلدى ءابجانوۆ.
تاريحشى حانگەلدى ءابجانوۆ ەسكى قازاقستاندا ماقتانگەرشىلىككە سالىنساق, جاڭا قازاقستاندا ەندى اتقارىلماعان جۇمىستاردى جۇزەگە اسىرۋعا كۇش سالۋ كەرەك دەيدى.
«بىزگە پرەزيدەنت ايتقانداي سوزدەن ناقتى ىسكە كوشەتىن كەز الدەقاشان كەلدى. اۋىل شارۋاشىلىعى سالاسىنداعى تەحنيكانىڭ 80 پايىزى ەسكىرگەنىن پرەزيدەنت جايدان-جاي ايتقان جوق. ەسكىرگەندىكتەن ءجيى سىناتىن تەحنيكامەن شارۋالار قالاي اۋىل شارۋاشىلىعىن دامىتۋعا ۇلەس قوسادى؟ پرەزيدەنت اگرارلىق سالاداعى باسقا دا تۇيتكىلدى ماسەلەلەردى كوتەرىپ, ولاردى شەشۋ ماقساتىندا ءتيىستى تاپسىرما بەردى.
ەلدەگى ءتۋريزمدى دامىتۋ ءىسى دە تۇرالاپ تۇر. وتكەن جىلى جەر كولەمى ءبىزدىڭ ەلىمىزدەن الدەقايدا از تۇركياعا 40 ميلليون تۋريست بارعان. ال بىزگە كەلەتىن تۋريستەردىڭ سانى 600 مىڭعا ازەر جەتەدى. تۇمسا تابيعاتىمىز, ءتۋريزمدى دامىتۋعا سۇرانىپ تۇرعان كورىكتى جەرلەر قانشاما. تەك سوعان كوڭىل ءبولىپ, نازار اۋدارىپ كۇش سالعاندا عانا ەلدەگى تۋريزم داميدى», دەپ تۇيىندەدى حانگەلدى ءابجانوۆ.
