دەگەنمەن, تەاتردىڭ بۇگىنگى كۇردەلى پروبلەماسى – ونەر ۇجىمىنا بەرىلگەن عيماراتتىڭ ەسكىرىپ, توزۋى بولىپ وتىر.
جاقىندا شىمكەنت قالاسىنىڭ اكىمى اتالعان تەاترعا ارنايى بارىپ, جۇمىسىمەن تانىسىپ قايتقان. قالا باسشىسىمەن كەزدەسۋدە نەگىزىنەن وسى تاقىرىپ جايلى اڭگىمە قوزعالدى. ءوز كەزەگىندە اكىم الداعى ۋاقىتتا عيمارات ماسەلەسىن شەشەتىنىن جەتكىزدى. ول ءۇشىن قالالىق مادەنيەت, تىلدەردى دامىتۋ جانە ارحيۆتەر باسقارماسىنا قاجەتتى ۇسىنىستار ازىرلەۋدى تاپسىردى.
ايتا كەتكەن ءجون, مادەنيەت, ونەر سالاسىنداعى ىنتىماقتاستىقتى نىعايتۋ ماقساتىندا تەاتر 17 شەتەلدىك, ونىڭ ىشىندە پەرۋ, ەستونيا, لاتۆيا, يتاليا, فرانتسيا, تۇركيا, قىتاي, وڭتۇستىك كورەيا, يران مەملەكەتتەرىمەن جانە الماتى, اقتوبە, قوستاناي قالالارى, سونداي-اق ماڭعىستاۋ وبلىستىق قۋىرشاق تەاترىمەن ەكىجاقتى مەموراندۋمعا قول قويعان. الداعى ۋاقىتتا مەگاپوليستە تەاتردىڭ 40 جىلدىق مەرەيتويىنا وراي حالىقارالىق قۋىرشاق تەاترلارى فەستيۆالى وتپەك.
بۇعان قوسا, ونەر ۇجىمى قاراعاندى قالاسىنداعى «كۋكليانديا» حالىقارالىق قۋىرشاق تەاترلارىنىڭ فەستيۆالىندە ۇزدىك بالالار قويىلىمى اتالىمىن جەڭىپ العان. وسىدان ءبىراز كۇن بۇرىن تەاتر جەرگىلىكتى رەجيسسەر ق.يساەۆتىڭ «ساياحاتشى تاسباقا» قويىلىمىمەن بيىلعى ماۋسىمدى اياقتاعان ەدى. مەيىرىمدىلىك, باۋىرمالدىق, جاناشىرلىق, قايسارلىق پەن تاباندىلىق قاسيەتتەردى دارىپتەيتىن ساحنالىق شىعارما الماتى قالاسىنداعى حالىقارالىق «ورتەكە» فەستيۆالىندە جوعارى باعالاندى. قۋىرشاقتارعا جان بىتىرگەن ونەر ورداسى بالدىرعاندارمەن بىرگە جاسوسپىرىمدەر مەن ەرەسەكتەردىڭ دە سۇيىكتى تەاترى. سونىڭ بىردەن-ءبىر دالەلى بيىل ارتىستەر 18 مىڭعا جۋىق كورەرمەنگە 200-دەن اسا قويىلىم ۇسىنىپتى. سولاردىڭ ىشىندەگى التاۋى جاڭا پرەمەرا. «بيىل ساحنالاعان 6 قويىلىمنىڭ ۇشەۋى كىشكەنتاي بالدىرعاندارعا ارنالسا, قالعان ۇشەۋى جاسوسپىرىمدەر تانىمىنداعى شىعارمالار بولدى. 4 قويىلىمعا سىرتتان رەجيسسەر تارتتىق. قۋىرشاق تەاترى ونەرىن كاسىبي تۇرعىدا ورلەتۋ, دارىندى ارتىستەر مەن رەجيسسەرلەردى تاڭداۋ, ولاردىڭ اكتەرلىك شەبەرلىكتەرىن ارتتىرۋ, سونداي-اق ونەرىمىزدى شەتەلدە تاماشالاتىپ قايتۋ نەگىزگى مىندەت پەن ماقساتىمىز سانالادى. شىعارماشىلىق تابىستارىمىز حالىقارالىق «قۇرالاي» قۋىرشاق تەاترلار فەستيۆالىندەگى «بالالارعا ارنالعان ۇزدىك قويىلىم» مەن «ۇزدىك دراماتۋرگيا» اتالىمدارىن يەمدەنۋىمىز», دەدى تەاتر باسشىسى سامات التاي.
تەاتر الداعى ماۋسىمدا كلاسسيكالىق شىعارمالاردان قويىلىم قويماقشى. ارتىستەر گ.ح.اندەرسەننىڭ «ۇسقىنسىز ۇيرەك» پەن گاۋفتىڭ «ەرگەجەيلى مۇرىن» تۋىندىسىن ساحناعا الىپ شىعۋعا دايىندالىپ جاتىر.
شىمكەنت
