كەزدەسۋ بارىسىندا سەناتور شىمكەنت تۇرعىندارىنىڭ ءال-اۋقاتىن ارتتىرۋعا باعىتتالعان وتەۋسىز گرانتتار سانىن ۇلعايتۋ قاجەتتىگىن اتاپ ءوتتى.
«پارلامەنتتە وسىعان قاتىستى وزەكتى ماسەلەلەر بويىنشا ۇسىنىستار مەن ەسكەرتۋلەردى كوتەرىپ, ءتيىستى مينيسترلىكتەرگە جولدايتىن بولامىز. ءار وتباسىندا ۋاقىتشا قيىندىقتار بار. مەملەكەتتىڭ مىندەتى – ولاردى قولداۋ. وسى ماقساتتا وتەۋسىز مەملەكەتتىك گرانت بەرۋ تۋرالى شەشىم قابىلداندى. جاڭا بيزنەس-يدەيالاردى جۇزەگە اسىرۋعا بولىنگەن قاراجات شىنىمەن مۇقتاج ازاماتتارعا بەرىلۋى كەرەك. كوميسسيا وكىلدەرىنە جۇكتەلگەن جاۋاپكەرشىلىك وراسان زور ەكەنىن تۇسىنەمىز», دەدى ايگۇل قاپباروۆا.
ءوز كەزەگىندە شىمكەنت قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ وكىلى كەزدەسۋگە قاتىسۋشىلاردى ازاماتتاردى جۇمىسپەن قامتۋ جانە حالىقتىڭ ءال-اۋقاتىن جاقسارتۋ جونىندەگى جۇمىستاردىڭ ناتيجەلەرىمەن تانىستىردى. بەلگىلى بولعانداي, كەيىنگى ءۇش جىلدا اتاۋلى الەۋمەتتىك كومەك الۋشىلاردىڭ سانى ايتارلىقتاي ازايعان.
* * *
سەنات دەپۋتاتى سۇلتانبەك ماكەجانوۆ «Amanat» پارتياسى الماتى قالالىق فيليالىنىڭ XXXIV كونفەرەنتسياسىنا قاتىستى.
كەزدەسۋدە پارتيانىڭ 2023-2027 جىلدارعا ارنالعان سايلاۋالدى باعدارلاماسىن ىسكە اسىرۋ بويىنشا جول كارتاسىنىڭ الماتى قالاسىندا ورىندالۋ بارىسى تۋرالى بايانداما جاسالدى. سونداي-اق فيليال مەن «جاستار رۋحى» جاستار قاناتىنىڭ اتقارعان جۇمىستارى تۋرالى ەسەپ تىڭدالدى.
سەناتور حالىقپەن كەرى بايلانىستى كۇشەيتۋ, وڭىرلەردەگى دەپۋتاتتار جۇمىسىنىڭ تيىمدىلىگىن ارتتىرۋ مەن پارتيانىڭ جاستار قاناتىن قايتا جانداندىرۋدىڭ ماڭىزدى ەكەنىن اتاپ ءوتتى.
«ازاماتتاردى الاڭداتقان ماسەلەلەردى شەشۋ ءۇشىن جۇيەلى جۇمىس جۇرگىزۋ قاجەت. بۇل جەردە وڭىرلەردەگى باستامالار ماڭىزدى ءرول اتقارادى. ونىڭ ىشىندە قوعامدىق ديالوگتى دامىتۋدىڭ بەرەرى مول», دەدى سۇلتانبەك ماكەجانوۆ.
* * *
ماجىلىستەگى «Amanat» پارتياسى فراكتسياسىنىڭ دەپۋتاتتارى پارتيانىڭ سايلاۋالدى باعدارلاماسىنىڭ جول كارتاسىن ىسكە اسىرۋ بارىسى جانە مەگاپوليستىڭ الەۋمەتتىك-ەكونوميكالىق دامۋىمەن تانىسۋ ماقساتىندا الماتىعا كەلدى.
ساپار باعدارلاماسىندا وتكەن لۋدومانيا ماسەلەسىن تالقىلاۋ ءۇشىن ۇكىمەتتىك ەمەس ۇيىمداردىڭ وكىلدەرى جانە جاستارمەن كەزدەسۋگە پارتيا فراكتسياسىنىڭ جەتەكشىسى ەلنۇر بەيسەنباەۆ, دەپۋتاتتار باقىتجان بازاربەك پەن ەرمۇرات باپي, پارتيانىڭ الماتى قالالىق فيليالىنىڭ توراعاسى ستانيسلاۆ كانكۋروۆ, ساراپشىلار مەن جاستار قاتىستى. قۇمار ويىندارعا پاتولوگيالىق بەيىمدىلىك حالقىمىز ءۇشىن عانا ەمەس, بۇكىل الەم ءۇشىن دە كۇردەلى پروبلەماعا اينالدى. ماجىلىسمەندەر قۇمار ويىندارعا تاۋەلدىلىكتىڭ كوبەيۋىنە الاڭداۋشىلىق ءبىلدىرىپ, بۇل ماسەلەنىڭ جاستارعا, جالپى قوعامعا قالاي اسەر ەتەتىنىن تالقىلادى.
كەزدەسۋدە جاستار اراسىندا لۋدومانيانىڭ الدىن الۋ بويىنشا نەگىزگى ماسەلەلەر, سونىڭ ىشىندە ءبىلىم بەرۋ باعدارلامالارى مەن قۇمار ويىندارىنىڭ تاۋەكەلدەرى تۋرالى اقپاراتتىق ناۋقان تالقىلاندى. سونداي-اق جيىندا لۋدومانيا پروبلەماسىنا تاپ بولعاندار ءۇشىن ساپالى جانە قولجەتىمدى مەديتسينالىق جانە پسيحولوگيالىق قولداۋدى قامتاماسىز ەتۋ بويىنشا ۇسىنىستار ايتىلىپ, قۇمار ويىنداردى رەتتەۋگە جانە قاتاڭداتۋعا باعىتتالعان زاڭناماعا وزگەرىستەر ەنگىزۋ مۇمكىندىگى ءسوز بولدى.
ماجىلىسمەندەر جۇمىس ساپارى كەزىندە پارتيانىڭ الماتى قالالىق فيليالىنىڭ كەزەكتى XXXIV كونفەرەنتسياسىنا دا قاتىستى. كونفەرەنتسيادا قالالىق فيليال مەن «جاستار رۋحى» جاستار قاناتىنىڭ 2021 جىلدان 2023 جىلدىڭ ءى جارتىجىلدىعىنا دەيىنگى كەزەڭدە اتقارىلعان جۇمىستار تۋرالى ەسەبى تىڭدالدى.
ايماققا ساپار بارىسىندا فراكتسيا جەتەكشىسى ەلنۇر بەيسەنباەۆ «قالقامان» مەترو ستانساسى قۇرىلىسىنىڭ بارىسىمەن تانىستى. بۇگىنگى كۇنى مەتروپوليتەننىڭ ءۇشىنشى كەشەنىن ىسكە قوسۋ بويىنشا جۇمىس بەلسەندى جۇرگىزىلىپ جاتىر. ستانسا سالۋ جوباسى الماتى قالاسى بويىنشا «Amanat» پارتياسىنىڭ سايلاۋالدى باعدارلاماسىنىڭ 2.3-بولىمىنە ەنگىزىلگەن, وندا 4 ستانسا سالۋمەن 7,2 شاقىرىم مەترو جەلىسىن كەڭەيتۋ كوزدەلگەن. جوسپارعا سايكەس «قالقامان» ستانساسىنىڭ قۇرىلىسى 2025 جىلى اياقتالۋعا ءتيىس. بۇل جوبا الماتىنىڭ كولىك ينفراقۇرىلىمىن نىعايتىپ, قالا تۇرعىندارىنىڭ جايلىلىعىن جاقسارتۋداعى ماڭىزدى قادام بولىپ سانالادى.
* * *
سەنات دەپۋتاتى اسەم راحمەتوۆا سولتۇستىك قازاقستان وبلىسىنا ساپارى كەزىندە عابيت مۇسىرەپوۆ اۋدانىنىڭ تۇرعىندارىمەن كەزدەستى. كەزدەسۋ بارىسىندا اۋىل تۇرعىندارى «پەتروپاۆل – جەزقازعان» اۆتوجولىن جوندەۋ ماسەلەسىن كوتەردى. سەناتور بۇل ماسەلەنى نازارعا الاتىنىن اتاپ ءوتتى.
«بۇل جولعا كۇردەلى جوندەۋ قاجەت. جاماپ-جاسقاي سالۋ جەتكىلىكسىز. وعان وسى جەرگە كەلەر كەزدە دە كەزەكتى رەت كوز جەتكىزدىك. ءبىز بۇل ماسەلەنى شەشۋگە ىقپال ەتەمىز. قازىر سوعان بايلانىستى بارلىق تۇيتكىلدەردى نازار الۋ ءۇشىن ارنايى كەلدىك. ءبىز جەرلەستەرىمىزدى نە تولعاندىراتىنىن وزدەرىنەن ەستىپ, پروبلەمالاردى شەشۋگە كومەكتەسكىمىز كەلەدى», دەدى اسەم راحمەتوۆا.
سونىمەن قاتار كەزدەسۋدە اۋدانعا كوپسالالى ەمحانا قاجەت ەكەنى ايتىلدى. قازىرگى تاڭدا جەرگىلىكتى جەردەگى تۋبديسپانسەر عيماراتىن قايتا قۇرۋ جانە ونى ەمحاناعا قايتا بەيىندەۋ تۋرالى ماسەلە قارالىپ جاتىر.
سونداي-اق دەپۋتات شال اقىن اۋدانىندا بولىپ, كريۆوششەكوۆ ورتا مەكتەبىندە جۇرگىزىلىپ جاتقان كۇردەلى جوندەۋ جۇمىستارىمەن تانىستى. اتالعان ىسكە مەملەكەتتىك باعدارلاما اياسىندا مۇندا 127 ميلليون تەڭگەدەن استام قاراجات قاراستىرىلعان.
سەناتور اۋىلدا تۇراتىن بالالاردىڭ ساپالى ءبىلىم الۋى, تازا ءارى جارىق عيماراتتا وقۋى ماڭىزدى ەكەنىن اتاپ ءوتتى. ودان بولەك, دەپۋتات تاعى ەكى مەكتەپتى جوندەۋ بارىسىمەن تانىسىپ, ىبىراي اۋىلىندا قالپىنا كەلتىرىلگەن مادەنيەت ۇيىنە باردى.
