ەلوردادان كەلگەن بىلىكتى دارىگەرلەر جەرگىلىكتى نەيروحيرۋرگ, تراۆموتولوگ, اريتمولوگ, گينەكولوگ ماماندارعا شەبەرلىك ساباعىن وتكىزدى. 50-گە جۋىق تۇرعىندى تەگىن قابىلداپ, دارىگەرلىك كەڭەس بەردى.
ورتالىق ماماندارى بۇعان دەيىن اقتوبە, اقمولا, اتىراۋ, شىعىس قازاقستان وبلىستارى مەن شىمكەنت قالاسىندا بولعان. ساپاردىڭ باستى ماقساتى – دەنساۋلىق ساقتاۋ سالاسىنداعى جاڭا مەديتسينالىق تەحنولوگيالاردى وڭىرلەردە تاجىريبەگە ەنگىزۋ, اۋرۋدىڭ الدىن الۋدا, دياگنوستيكالاۋدا جانە زاماناۋي ەمدەۋ ادىستەرىمەن ءبولىسۋ.
ەلوردالىق مامانداردىڭ ءۇشىنشى جۇمىس كۇنى قوستانايعا پرەزيدەنت ءىس باسقارماسى مەديتسينالىق ورتالىعىنىڭ باسشىسى الەكسەي تسوي كەلىپ, وبلىستىق اۋرۋحانانى ارالادى. كۇردەلى وپەراتسيا جاسالعان ناۋقاستارمەن جۇزدەسىپ, وبلىس دارىگەرلەرىمەن كەزدەستى.
سونداي-اق الەكسەي تسوي ايماق باسشىسى قۇمار اقساقالوۆپەن كەزدەستى. كەزدەسۋ بارىسىندا پرەزيدەنت ءىس باسقارماسىنىڭ مەديتسينالىق ورتالىعى مەن قوستاناي وبلىسىنىڭ اكىمدىگى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. كەلىسىم ءوڭىر تۇرعىندارىنا جوعارى تەحنولوگيالىق مەديتسينالىق قىزمەتتەردى پايدالانۋعا مۇمكىندىك بەرەدى. سونىمەن قاتار ءوڭىردىڭ مەديتسينا قىزمەتكەرلەرىنە ناۋقاستاردى زاماناۋي ادىستەرمەن دياگنوستيكالاۋ, ەمدەۋ جانە وڭالتۋ, جاڭا مەديتسينالىق تەحنولوگيالاردى ەنگىزۋ سالاسىندا تاجىريبە ارتتىرۋدى كوزدەيدى.
– پرەزيدەنت ءىس باسقارماسىنىڭ مەديتسينالىق ورتالىعىنىڭ وكىلدەرىمەن ماڭىزدى ماسەلەلەر تۋرالى كەلىستىك. اتالعان ورتالىق ءبىزدىڭ دارىگەرلەردىڭ وزىق تەحنولوگيالاردى تەرەڭ مەڭگەرۋىنە كومەكتەسەدى. ەندىگى ءبىزدىڭ مىندەتىمىز – دەنساۋلىق ساقتاۋ سالاسىن ايتارلىقتاي جاقسارتۋ. وڭىردە 2023-2024 جىلدارى 25 دەنساۋلىق ساقتاۋ نىسانىن سالۋ جوسپارلانىپ وتىر. ونىڭ التاۋى بيىل پايدالانۋعا بەرىلەدى. جاڭا مەديتسينالىق جابدىقتار ساتىپ الىنادى. وسى ماقساتتارعا بيىل 105,2 ملرد تەڭگە ءبولىندى. بۇل قارجى بىلتىرعىمەن سالىستىرعاندا 22 پايىزعا ارتىق. الداعى ۋاقىتتا قارجىلاندىرۋ كولەمى ۇلعايادى, – دەدى وبلىس اكىمى ق.اقساقا-
لوۆ.
ا.تسوي مۇنداي يگى ساپار ەلىمىزدىڭ ءاربىر ازاماتى قولجەتىمدى ءارى ساپالى مەديتسينالىق كومەك الۋى ءۇشىن قاجەت ەكەنىن تىلگە تيەك ەتە كەلىپ, وبلىستىق اۋرۋحانا ماماندارىنىڭ بىلىكتىلىك دەڭگەيىن ارتتىرۋعا كومەكتەسەتىنىن اتاپ ءوتتى.
– بۇگىندە ءبىزدىڭ ماماندار جاساپ جاتقان كۇردەلى وپەراتسيالار وڭىرلەردە, ءوز اۋرۋحانالارىڭىزدا جاسالسا ەكەن دەيمىز. مەملەكەت باسشىسى قاسىم-جومارت توقاەۆ بىزگە وسىنداي مىندەت جۇكتەپ وتىر. استاناداعى بىلىكتى مامانداردىڭ تاجىريبەسى وڭىرلىك دارىگەرگە دە جۇعىستى بولۋى كەرەك. بۇل ماقساتقا جەتۋ ءۇشىن سىزدەرگە قانداي كومەك قاجەت بولسا دا ايانىپ قالمايمىز. ەڭ باستىسى, وسى ءوڭىردىڭ تۇرعىندارى ساپالى ەم ىزدەپ استاناعا سابىلماۋعا ءتيىس, – دەدى ا.تسوي.
قوستاناي وبلىسى
