«قۇرمەتتى ەلوردا تۇرعىندارى مەن قوناقتارى!
وزدەرىڭىزگە بەلگىلى, وتكەن دەمالىستا EXPO الاڭىندا تاجىكستاننىڭ مادەنيەت كۇندەرى اياسىندا اۋىل شارۋاشىلىعىنا, ونەركاسىپ ونىمدەرىنە جانە ۇلتتىق قولونەرىنە ارنالعان كورمە-جارمەڭكە ءوتتى.
جارمەڭكەدە 1000 توننادان استام ءونىم ساتىلدى. دەگەنمەن وكىنىشتىسى, جارمەڭكە مۇلكىنە زيان كەلىپ, كەيبىر ازاماتتار شاتىرلاردى, سورەلەردى, دەكوراتسيالاردى سىندىردى. قوعامدىق ءتارتىپ تە بۇزىلدى. بۇل – مادەنيەتتىڭ تومەندىلىگىنىڭ, ادام ەڭبەگىن قۇرمەتتەمەۋدىڭ بەلگىسى.
كەيبىر ادامداردىڭ ورىنسىز ارەكەتىنە بايلانىستى استانا قالاسىنىڭ بارلىق تۇرعىنىنا ءسوز ءتيدى. كورمە-جارمەڭكەگە 100 مىڭعا جۋىق ادام قاتىستى, بۇل ءىس-شارادا قالا تۇرعىندارىنىڭ باسىم بولىگى مادەنيەتتى بولعانىن ەرەكشە اتاپ وتكىم كەلەدى. ولارعا العىسىمدى بىلدىرەمىن!
مەملەكەت باسشىسى ەلوردا تۇرعىندارىنىڭ قاۋىپسىزدىگىن قامتاماسىز ەتۋ جانە استانا كوشەلەرىندە ۆانداليزم مەن قۇقىق بۇزۋشىلىقتاردىڭ جيىلەپ كەتكەن جاعدايلارىن بولدىرماۋ جونىندە ءتيىمدى شارالار قابىلداۋ قاجەتتىگىن اتاپ وتكەن بولاتىن.
پوليتسياعا ۆانداليزم ارەكەتتەرىن جاساعان جانە قوعامدىق ءتارتىپتى بۇزعان ادامداردى انىقتاۋ جۇمىسى تاپسىرىلدى. قۇقىق بۇزۋشىلار جاۋاپقا تارتىلادى», دەدى قالا اكىمى.
