جىل باسىنان بەرى ينفلياتسيالىق ۇدەرىستەردىڭ ۇزدىكسىز باياۋلاۋى بايقالادى. ول 2023 جىلدىڭ شىلدەسىندە 14 پايىز بولدى. بىراق شىلدەدە ايلىق ينفلياتسيا ورتاشا تاريحي كورسەتكىشتەردەن جوعارى قالىپتاسا وتىرىپ, 0,6 پايىزعا دەيىن ءبىرشاما جەدەلدەدى.
«بازالىق جانە ماۋسىمدىق فاكتورلاردى ەسكەرمەيتىن ينفلياتسيا كورسەتكىشتەرى ءبىر دەڭگەيدە تىركەلىپ, باياۋلاعان جوق. بۇل ىشكى سۇرانىستان قولداۋ تاپقان باعا ءوسۋىنىڭ تۇراقتى سيپاتىن كورسەتەدى. تاۋارلار مەن قىزمەتتەردىڭ قۇنىنا اسەر ەتەتىن وندىرىستەگى جوعارى شىعىنداردىڭ ساقتالۋى – قوسىمشا فاكتور. ينفلياتسيالىق كۇتۋلەر ءبىرشاما تومەندەگەنىنە قاراماستان, جوعارى قالپىندا قالدى جانە جەكەلەگەن تاۋارلار نارىعىنداعى جاعدايدىڭ وزگەرۋىنە سەزىمتال بولىپ وتىر. سىرتقى فاكتورلاردىڭ ينفلياتسياعا اسەرى بىرتىندەپ تومەندەپ كەلەدى. بىراق جاعداي الدىڭعى بولجامدىق راۋندپەن سالىستىرعاندا قولايسىزداۋ بولا باستادى. كوپتەگەن ەلدە باعالاردىڭ شارىقتاۋى ورتالىق بانكتەر جۇرگىزىپ وتىرعان ساياسات ناتيجەسىندە باياۋلاپ وتىر. بۇل رەتتە بازالىق ينفلياتسيانىڭ ورنىقتىلىعى جانە ورتامەرزىمدى پەرسپەكتيۆادا تارگەتتەرگە قول جەتكىزبەۋدىڭ جوعارى ىقتيمالدىعى كوپتەگەن ورتالىق بانكتىڭ مولشەرلەمەلەردى تومەندەتۋ تسيكلىن باستاۋ مەرزىمىن كەيىنگە جىلجىتتى», دەپ ءتۇسىندىردى ۇلتتىق بانك.
بازالىق ستسەناريگە سايكەس بيىل ينفلياتسيا – 10-12 پايىز, 2024 جىلى – 7,5-9,5 پايىز, 2025 جىلى 5,5-7,5 پايىز شەگىندە بولجانعان.
ء«بىز وتكەن جىلى بازالىق مولشەرلەمەنى بىرتىندەپ كوتەرگەن ەدىك. قازىر سونىڭ ەكونوميكاعا قالاي اسەر ەتكەنىن كورىپ وتىرمىز. ينفلياتسيانىڭ قارقىنى بىرتىندەپ باياۋلاي باستادى. بۇل ءبىزدىڭ باعالاۋ جۇرگىزەتىن ىسىمىزگە سەنىمدىلىكتى ارتتىرىپ, ينفلياتسيانىڭ تۇراقتالۋ ءۇردىسىن كۇشەيتە تۇسەدى. سىرتقى ورتا دەزينفلياتسيالىق اسەرىن ساقتاۋدا. الەمدەگى ورتالىق بانكتەردىڭ اقشا-كرەديت شارتتارىن قاتاڭداتۋى, ازىق-ت ۇلىك باعاسىنىڭ تومەندەۋى ىشكى باعانى ۇستاپ تۇرۋعا ىقپال ەتتى. الايدا ينفلياتسيا تۇراقتىلىعىن جوعالتپاعاندىقتان, دامىعان ەلدەردە مولشەرلەمەنى تومەندەتە باستاۋ مەرزىمى كەيىنگە قالىپ قويىپ وتىر. رەسەيدە رۋبل باعامى السىرەپ, تۇتىنۋشىلىق سۇرانىس ارتۋىنان ينفلياتسيالىق قىسىمنىڭ كۇشەيە تۇسكەنى بايقالا باستادى», دەيدى ۇب توراعاسى عالىمجان ءپىرماتوۆ.
ونىڭ ايتۋىنشا, بازالىق مولشەرلەمەنى تومەندەتۋگە مىنا فاكتورلار اسەر ەتتى: بەس اي قاتارىنان ينفلياتسيانىڭ تومەندەپ كەلە جاتقانى, ەكونوميكاداعى نەگىزگى سالالاردىڭ وسۋىنە بايلانىستى ىشكى ەكونوميكادا ىسكەرلىك بەلسەندىلىكتىڭ ۇزدىكسىز ارتۋى جانە سىرتقى ەكونوميكادا جاھاندىق ينفلياتسيانىڭ باياۋلاۋ ءۇردىسىنىڭ جالعاسۋى.
قازىرگى ماقسات – 2025 جىلدىڭ سوڭىنا تامان 5 پايىز ينفلياتسيا نىساناسىنا قول جەتكىزۋ. ع.ءپىرماتوۆتىڭ ايتۋىنشا, بۇل ماقساتقا جەتۋ ءۇشىن بارىنشا قاتاڭ اقشا-كرەديت ساياساتىن ساقتاۋعا دايىن بولۋ كەرەك.
«بۇل رەتتە فيسكالدىق ساياسات, جانار-جاعارماي باعاسىن جانە تۇرعىن ءۇي-كوممۋنالدىق قىزمەتتەرىنىڭ تاريفتەرىن بەلگىلەۋ سالاسىندا قابىلدانىپ جاتقان شارالار, ەكونوميكاداعى تۇتىنۋ مەن ۇنەمدەۋ اراسىنداعى بالانسى بارىنشا ماڭىزدى بولادى. ناقتى ينفلياتسيانىڭ ديناميكاسى مەن ونىڭ تۇراقتى بولىگىنىڭ بەلسەندى باياۋلاۋى ءبىزدىڭ كۇتۋلەرىمىزگە سايكەس كەلگەن كەزدە ۇلتتىق بانك بازالىق مولشەرلەمەنى بىرتىندەپ جانە بايىپپەن تومەندەتۋ ساياساتىن جالعاستىرادى. بۇعان مۇمكىندىك بار, بىراق پروينفلياتسيالىق تاۋەكەلدەردى, ونىڭ ىشىندە فيسكالدىق قولداۋدى ەسكەرسەك, ول شەكتەۋلى جانە الداعى شەشىمدەردى بايىپپەن قابىلداۋدى تالاپ ەتەدى. بۇدان ءارى كەلىپ تۇسەتىن دەرەكتەر مەن ينفلياتسيا تاۋەكەلدەرىنە بايلانىستى بازالىق مولشەرلەمەنى تومەندەتۋ توقتاتا تۇرۋدى قاجەت ەتۋى مۇمكىن», دەدى ول.
