US Open ءتۋرنيرىنىڭ ىرىكتەۋ سايىستارىندا باق سىناعان 22 جاستاعى وتانداسىمىز العاشقى باسەكەسىندە جاپونيالىق كايتي ۋتيدانى ەكى سەتتە 6:2, 6:2 ەسەبىمەن تىزە بۇكتىرسە, ەكىنشى ماتچتا يتاليالىق راۋل برانكاچچيونى جارىس جولىنان ىعىستىردى – 6:4, 6:3. ال نەگىزگى كەزەڭگە جولداما بەرەتىن كەزدەسۋدە اتر 250 Astana Open 2021 ءتۋرنيرىنىڭ ءفيناليسى اۋستراليالىق دجەيمس داكۆورتپەن شەبەرلىك بايقاسىپ, 6:2, 6:2 ەسەبىمەن جەڭىسكە جەتتى. وسىلايشا, سكاتوۆ ءوز سپورتتىق جولىندا العاش رەت اقش اشىق چەمپيوناتىندا وينايتىن بولدى. ونىڭ قارسىلاسى كەيىن انىقتالادى. وكىنىشكە قاراي, ىرىكتەۋ سايىستارىندا ونەر كورسەتكەن تاعى ءبىر وتانداسىمىز ميحايل كۋكۋشكين ەكىنشى كەزدەسۋىندە فرانتسيالىق ەنتسو كوكودان جەڭىلىپ قالدى – 6:7, 2:6.
ال بۇگىن نيۋ-يوركتە جالاۋى جەلبىرەيتىن اقش اشىق چەمپيوناتىنىڭ العاشقى اينالىمىندا ەلىمىزدىڭ قوس ءبىرىنشى راكەتكالارى – ەلەنا رىباكينا مەن الەكساندر بۋبليك العاشقى ويىندارىن وتكىزەدى. ەلەنا الەمدىك رەيتينگتە 37-ورىندا تۇرعان ۋكراينالىق مارتا كوستيۋكپەن كەزدەسسە, بۋبليك ءبىرىنشى اينالىمدا US Open 2020 ءتۋرنيرىنىڭ جەڭىمپازى دومينيك تيممەن وينايدى.
