فوتو: parlam.kz
اقمولا, قاراعاندى, پاۆلودار جانە باسقا دا وبلىستاردى, سونداي-اق استانا قالاسىن سۋمەن قامتاماسىز ەتەتىن اتالعان كاسىپورىننىڭ وندىرىستىك قۋاتى جىلىنا 500 ملن تەكشە مەتردى قۇرايدى.
دەپۋتاتتارمەن كەزدەسۋ بارىسىندا كاسىپورىن قىزمەتكەرلەرى بىرقاتار وزەكتى ماسەلەلەردى, سونىڭ ىشىندە جالاقىنىڭ تومەندىگىن ايتىپ, شاعىمداندى.
ء«بىزدىڭ كاسىپورىنداعى جۇمىسشىلار سانى ونسىز دا كوپ ەمەس. سالىستىرمالى تۇردە قاراساق, كومىر رازرەزىندە ورتاشا جالاقى 300 مىڭ تەڭگە بولسا, ءبىزدىڭ جالاقىمىز 70 مىڭ, قىس مەزگىلىندە 130 مىڭ تەڭگەدەن اسپايدى. كادر تۇراقتامايدى. قازىرگى ۋاقىتتا ءار ۋچاسكەدە سلەسارلار, دانەكەرلەۋشىلەر مەن توكارلار جەتىسپەيدى», دەدى جىلۋمەن جابدىقتاۋ ۋچاسكەسىنىڭ باستىعى رىمبەك بايماعامبەتوۆ.
دەپۋتات تىلەكتەس ادامبەكوۆتىڭ ايتۋىنشا, جەرگىلىكتى مەديتسينا قىزمەتكەرلەرى دە وسىنداي سۇراقپەن دەپۋتاتتارعا جۇگىنگەن. ماجىلىسمەن وساكاروۆ اۋدانىنداعى جالاقى دەڭگەيىنىڭ وتە تومەن ەكەنىن ايتىپ, ونى ارتتىرۋ قاجەتتىگىنە توقتالدى.
«جالاقى 50 پايىزعا وسسە دە, سەزىلمەۋى مۇمكىن. ول ءۇشىن جالاقى كەستەسىن كوتەرۋ كەرەك. الايدا بۇل كاسىپورىننىڭ ءالى دە وتەلمەگەن قارىزى بولعاندىقتان, ەڭبەكاقىنى ءوسىرۋ دە وڭاي شەشىلە قويمايتىنى انىق. دەگەنمەن, ءبىز مەكەمەنىڭ ستراتەگيالىق نىسان ەكەنىن تۇسىنەمىز, وسى سۇراق بويىنشا ەكولوگيا مينيسترلىگىمەن كەزدەسەمىز. بۇل كاسىپورىن بىرنەشە وبلىستىڭ تىنىس-تىرشىلىگىن قامتاماسىز ەتەدى. سوندىقتان ماسەلە باقىلاۋدا بولادى», دەدى دەپۋتات.
ءماجىلىس دەپۋتاتتارى ايتىلعان بارلىق ۇسىنىستى قاراستىراتىندىقتارىن, قۇزىرلى مينيسترلىكپەن دە, كاسىپورىن قىزمەتكەرلەرىمەن دە سىندارلى جۇمىسقا دايىن ەكەندىكتەرىن جەتكىزدى.
