ماسەلەن, 23 تامىزدا قىزىلوردا وبلىسىنىڭ شيەلى اۋدانىنا قاراستى المالى اۋىلىنىڭ تۇسىندا گازەل جانە «Nexiا» اۆتوكولىكتەرى سوقتىعىسىپ, سالدارىنان 5 ادام قايتىس بولىپ, 3 ادام جاراقات الدى. ءدال وسى كۇنى «سامارا-شىمكەنت» اۆتوجولىندا العا اۋدانىنىڭ سارىتوعاي اۋىلىنا جاقىن جەردە «Volvo» جۇك كولىگى مەن ۆاز-2110 اۆتوكولىگى سوقتىعىسقان. اپات سالدارىنان 44 جاستاعى جەڭىل اۆتوكولىكتىڭ جۇرگىزۋشىسى وقيعا ورنىندا العان جاراقاتتارىنان قايتىس بولدى.
ال 20 تامىز كۇنى «الماتى-ەكاتەرينبۋرگ» تاسجولىندا 47 جاستاعى «Lexus LX470 «جۇرگىزۋشىسى تىزگىنگە يە بولا الماي اۋدارىلعان. جول-كولىك اپاتى سالدارىنان 46 جاستاعى جولاۋشى وقيعا ورنىندا اجال قۇشسا, جۇرگىزۋشىنىڭ ءوزى جانە 35 جاستاعى جولاۋشى جەدەل جاردەم كولىگىندە قازا تاپتى. تاعى ەكى جولاۋشى اۋرۋحاناعا جەتكىزىلگەن.
مۇنىڭ بارلىعى ەلىمىزدىڭ كۇرەجولدارىندا كۇن سايىن تىركەلىپ جاتقان قايعىلى كولىك اپاتتارىنىڭ كەيبىر مىسالى عانا. پوليتسيا قىزمەتكەرلەرى جىلدامدىقتى اسىرماۋدى قانشا ەسكەرتىپ كەلە جاتسا دا, ەل ىشىندەگى اپاتتىڭ سانى ازايار ەمەس. ەندى نە ىستەمەك كەرەك؟ ىشكى ىستەر مينيسترلىگى بۇدان بىلاي مۇنداي كەلەڭسىزدىكتەردىڭ الدىن الۋ ءۇشىن قالا ءىشىن تارتىپكە كەلتىرگەن كامەرالار كومەگىنە جۇگىنۋدى ءجون دەپ تاۋىپ وتىر.
اتاپ ايتقاندا, جول ءجۇرۋ قاۋىپسىزدىگىن قامتاماسىز ەتۋ جانە جول-كولىك وقيعالارىنىڭ الدىن الۋ بويىنشا باقىلاۋدى كۇشەيتۋ ماقساتىندا ءىىم اۆتوموبيل جولدارى كوميتەتى مەن «قازاۆتوجول» ۇك اق بىرلەسىپ, بەلگىلەنگەن جىلدامدىق رەجىمىن اسىرعان اۆتوكولىكتەردى تىركەۋ ءۇشىن قالا سىرتىنداعى جولداردا كامەرالار جۇيەسىن ىسكە قوستى. 33 «Zerek-2» باعدارلامالىق-اپپاراتتىق كەشەنى اكىمشىلىك وندىرىستەردىڭ بىرىڭعاي ءتىزىلىمى جۇيەسىمەن ينتەگراتسيالانعان, ياعني نۇسقامالاردى قۇقىق بۇزۋشىلارعا جىبەرۋ اۆتوماتتى رەجىمدە جۇزەگە اسىرىلماق.
– بۇگىنگى تاڭدا «Zerek-2» كەشەنى «شىمكەنت-قىزىلوردا», «شىمكەنت-وزبەكستان» شەكاراسى, «شىمكەنت-تاراز», «تاراز-قاينار», «قوناەۆ-تالدىقورعان» جانە «استانا-پاۆلودار» اۆتوجولدارىندا جۇمىس اتقارۋعا دايىن. وسىنداي باعدارلامالىق كەشەن «كوكشەتاۋ-استانا» تاسجولىندا بۇرىن ىسكە قوسىلعان بولاتىن جانە جولداعى قۇقىق بۇزۋشىلىقتاردى تىركەۋدە جاقسى ناتيجەلەر كورسەتىپ جاتىر, – دەيدى ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.
ايتا كەتسەك, وسى جىلدىڭ جەتى ايىندا ەلىمىزدىڭ جولدارىندا جەتى مىڭعا جۋىق جول-كولىك وقيعاسى تىركەلىپ, 1 200-دەن استام ادام قازا تاپسا, 8 500-گە جۋىق ادام ءتۇرلى دارەجەدەگى جاراقات العان. ونىڭ ىشىندە جىلدامدىق رەجىمىن ساقتاماۋ سالدارىنان قالا سىرتىنداعى تراسسالاردا 730 جول-كولىك وقيعاسى تىركەلگەن. «جوعارىدا اتالعان جولداردا 25 تامىز كۇنگى ساعات 00:00-دەن باستاپ «Zerek-2» كەشەنى شتاتتىق رەجىمدە جۇمىسىن باستايدى. سوندىقتان جۇرگىزۋشىلەردەن جىلدامدىق رەجىمىن جانە اۆتوكولىكتەر اراسىنداعى قاشىقتىقتى ساقتاۋدى سۇرايمىز», دەدى اقتوتى بورانوۆا.
