اتالعان ماسەلەگە بايلانىستى ەڭبەك جانە حالىقتى الەۋمەتتىك قورعاۋ مينيسترلىگى جانىنداعى مۇگەدەكتىگى بار ادامدارعا قاجەتتى ءجۇرىپ-تۇرۋعا ارنالعان تەحنيكالىق كومەكشى (كومپەنساتورلىق) قۇرالدار مەن قىزمەتتەردىڭ ساپاسىن ارتتىرۋ جونىندەگى جۇمىس توبىنىڭ وتىرىسىندا جان-جاقتى تالقىلاۋ بولدى. جيىن بارىسىندا قوعام بەلسەندىلەرى مەن ساراپشىلار ەرەكشە قاجەتتىلىكتەرى بار ادامداردىڭ ءومىر ءسۇرۋ ساپاسىن ارتتىرۋ بويىنشا بىرقاتار ۇسىنىس ايتتى.
اتالعان جۇمىس توبىنىڭ قۇرامىنا وڭىرلەردىڭ جۇمىسپەن قامتۋ جانە الەۋمەتتىك باعدارلامالار باسقارمالارىنىڭ, «اتامەكەن» ۇلتتىق كاسىپكەرلەر پالاتاسىنىڭ, الەۋمەتتىك وڭالتۋدى دامىتۋدىڭ عىلىمي-پراكتيكالىق ورتالىعىنىڭ, رەسپۋبليكالىق پروتەزدىك-ورتوپەديالىق ورتالىعىنىڭ, ن.باتپەنوۆ اتىنداعى تراۆماتولوگيا جانە ورتوپەديا عىلىمي زەرتتەۋ ينستيتۋتىنىڭ وكىلدەرى مەن ءارتۇرلى ساناتتاعى مۇگەدەكتىگى بار ازاماتتار قاتىستى. جۇمىس توبىنىڭ كەزەكتى وتىرىسىندا كەڭەسكە قاتىسۋشىلار ەرەكشە قاجەتتىلىكتەرى بار ادامداردى وڭالتۋدىڭ تەحنيكالىق قۇرالدارىمەن قامتاماسىز ەتۋدى جانە مۇگەدەكتىگى بار ادامداردىڭ جەكە قاجەتتىلىكتەرىن ەسكەرە وتىرىپ, وڭالتۋ قۇرالدارىنىڭ ساپاسىن ارتتىرۋ جونىندە ماسەلە كوتەردى.
ەڭبەك جانە حالىقتى الەۋمەتتىك قورعاۋ ءمينيسترىنىڭ مالىمەتىنشە, قازىر ەلىمىزدە 104,3 مىڭ مۇگەدەكتىگى بار بالا تۇرادى. ونىڭ ىشىندە 7 جاسقا دەيىنگى 33,7 مىڭ بالا, ءبىرىنشى توپتاعى مۇگەدەكتىگى بار 11,1 مىڭ بالا جانە 7 جاستان 18 جاسقا دەيىنگى ەكىنشى توپتاعى مۇگەدەكتىگى بار 22,7 مىڭ بالا بار. بۇل بالالارعا 27 مەديتسينالىق-الەۋمەتتىك مەكەمەدە وڭالتۋ قىزمەتتەرى ۇسىنىلعان. ماسەلەن, بيىل مۇگەدەكتىگى بار ادامدار الەۋمەتتىك قىزمەتتەر پورتالى ارقىلى 320 مىڭنان اسا قىزمەت العان. 2023 جىلدىڭ باسىنان باستاپ الەۋمەتتىك قىزمەتتەر پورتالى ارقىلى شامامەن 253,5 مىڭ مۇگەدەكتىگى بار ادام وڭالتۋدىڭ تەحنيكالىق قۇرالدارىن, 7,5 مىڭ ازامات ىمداۋ ءتىلى قىزمەتىن, 25,5 مىڭى جەكە كومەكشىنىڭ, 37,2 مىڭى ساناتورلىق-كۋرورتتىق ەمدەۋ قىزمەتىن الدى. بۇعان قوسا قازىر پورتالدا ارناۋلى الەۋمەتتىك قىزمەتتەر كورسەتەتىن 856 مەديتسينالىق-الەۋمەتتىك مەكەمە, 468 وڭالتۋدىڭ تەحنيكالىق قۇرالدارىن جەتكىزۋشى, 27 مىڭنان اسا جەكە كومەكشى, 699 ىمداۋ ءتىلى جانە 104 ساناتورلىق-كۋرورتتىق ەمدەۋ قىزمەتتەرىن ۇسىنۋشى تىركەلگەن.
ال بۇعان بايلانىستى Nazarbayev University ءاسسيستيۆتى تەحنولوگيالار جانە اقپاراتتىڭ قولجەتىمدىلىگى جونىندەگى ساراپشى-مەنەدجەرى زيات ابدىقايىموۆ كورۋ قابىلەتى ناشار ادامدار ءۇشىن جاقسارتىلعان سيپاتتامالارى بار ۇيالى تەلەفوندارمەن قامتاماسىز ەتۋگە بولىنگەن مەملەكەت كەپىلدىك بەرگەن قارجىنى ۇلعايتۋ قاجەتتىگىن ايتادى.
«ەرەكشە قاجەتتىلىكتەرى بار ازاماتتاردىڭ شەتەلدىك پروتەزدىك-ورتوپەديالىق بۇيىمدار وندىرۋشىلەرىمەن, وڭالتۋدىڭ تەحنيكالىق قۇرالدارىمەن ارىپتەستىكتى نىعايتۋدىڭ جانە ەلىمىزدە بىرلەسكەن ءوندىرىس اشۋدى جەدەلدەتۋ قاجەت», دەيدى ەڭبەك جانە حالىقتى الەۋمەتتىك قورعاۋ مينيسترلىگى قوعامدىق كەڭەسىنىڭ مۇشەسى, گۇلميرا بۋراشەۆا. ال مۇگەدەكتىگى بار بالالاردىڭ اتا-انالارىنىڭ وكىلى رەتىندە جيىنعا قاتىسقان تاتيانا يسماعۇلوۆا مىندەتتى گيگيەنالىق قۇرالدار تىزبەسىن كەڭەيتۋدى ۇسىندى.
تالقىلاۋ ناتيجەسىندە مۇگەدەكتىگى بار ادامدار مەن پارلامەنت دەپۋتاتتارىنىڭ پىكىرى جانە قارجى جانە ۇلتتىق ەكونوميكا مينيسترلىگىنىڭ ۇستانىمى ەسكەرىلدى. الداعى ۋاقىتتا ۇسىنىستار بويىنشا تەحنيكالىق قۇرالدارى مەن وڭالتۋ قىزمەتتەرىن, ونىڭ ىشىندە بيۋدجەتتىك قارجىلاندىرۋمەن قامتاماسىز ەتۋ ءتارتىبىن رەتتەيتىن نورماتيۆتىك قۇقىقتىق اكتىلەرگە ءتيىستى وزگەرىستەر مەن تولىقتىرۋلار ەنگىزىلەدى.
وسى ورايدا تەحنيكالىق وڭالتۋ قۇرالداردىڭ تىزبەسى مەن ولاردى قالاي الۋعا بولاتىنى جونىندە قوسشى قالاسى اكىمىنىڭ مۇگەدەكتىگى بار ادامدار ماسەلەسى جونىندەگى كەڭەسشىسى ەلميرا مۇقانوۆادان سۇراپ كورگەن ەدىك.
ء«بىز وڭالتۋ قۇرالدارىن ساتىپ المايمىز. قاجەتتى قۇرالدارعا الەۋمەتتىك پورتال ارقىلى تاپسىرىس بەرەمىز. ۇكىمەت تاراپىنان وعان اقشا بولىنەدى. مىسالى, كرەسلو-اربادا وتىراتىن كىسىلەردىڭ قۇرالى 5 جىلدا ءبىر رەت تەگىن جاڭارتىپ بەرىلەدى. جىلىنا ەكى رەت ورتوپەديالىق اياقكيىم بەرىلەدى (قىسقى جانە جازعى). اتالعان وسال توپتارعا جانە ارداگەرلەرگە اتاۋلى كۇندەرگە ارنالعان ءبىر رەتتىك جانە اي سايىنعى 13 ءتۇرلى كومەك كورسەتىلەدى. 2021 جىلدان بەرى مۇگەدەكتىگى بار ازاماتتارعا الەۋمەتتىك قىزمەتتەر پورتالى ارقىلى قاجەتتى قۇرالدار مەن قىزمەتتەرگە تاپسىرىس بەرۋ تاجىريبەسى ىسكە قوسىلدى. ياعني مۇگەدەكتىگى بار ازاماتتار 55 تەحنيكالىق وڭالتۋ قۇرالدارىن جانە 3 جانە مەملەكەتتىك مەكەمەلەردىڭ ارناۋلى الەۋمەتتىك قىزمەتتەرىنە ءوزىنىڭ ەلەكتروندىق قولتاڭباسىن (ەتسق) پايدالانا وتىرىپ, ونلاين تاپسىرىس بەرە الادى. الەۋمەتتىك پورتال ارقىلى پروتەزدىك-ورتوپەديالىق, سۋردوتەحنيكالىق, تيفلوتەحنيكالىق جانە گيگيەنالىق قۇرالدار, سونداي-اق كرەسلو-اربالارمەن قامتاماسىز ەتۋ قاراستىرىلعان. مۇگەدەكتىگى بار ازاماتتاردىڭ جەكە وڭالتۋ باعدارلاماسىندا تەحنيكالىق, پروتەزدىك-ورتوپەديالىق جانە گيگيەنالىق قۇرالدار قاجەتتىلىگى كورسەتىلگەن بولسا, پورتال ارقىلى تەگىن تاپسىرىس بەرە الادى. ەگەر ازاماتتار تەحنيكالىق وڭالتۋ قۇرالىنىڭ قىمبات ءتۇرىن تاڭداعان جاعدايدا ۇستەمە اقشاسىن ءوزى تولەپ الۋىنا بولادى», دەيدى مامان.
بيىلعى قابىلدانعان الەۋمەتتىك كودەكستى ىسكە اسىرۋ اياسىندا جەرگىلىكتى اتقارۋشى ورگاندار تاراپىنان قۇرىلعان كوميسسيالارعا جاڭا وكىلەتتىكتەر بەرۋ كوزدەلىپ وتىر. ولار مۇگەدەكتىگى بار ادامدارعا كورسەتىلگەن ناشار قىزمەت نەمەسە ساپاسىز قۇرالدار تۋرالى ارىز-تالاپتارىن 5 كۇن ىشىندە قابىلداپ, قارايدى. سونداي-اق انىقتالعان كەمشىلىكتەردى تۇزەتۋ مەرزىمدەرىن كورسەتە وتىرىپ, ءونىم بەرۋشىگە حات جولداۋ جانە ونىڭ ورىندالۋىن باقىلايدى, ءونىم بەرۋشىنى پورتالدان شىعارۋ جانە ساپاسىز ءونىم بەرۋشىلەر تىزىمىنە ەنگىزەدى.
