بەلگىلى قازاقستاندىق گرافيك-ديزاينەر ساۋلە بەكسۇلتانوۆا ديزاين مەن ونەردى تاماشا ۇيلەستىرەدى. ونىڭ پورتفوليوسىنىڭ ۇلكەن بولىگىن تابيعاتتىڭ جارقىن كورىنىستەرى, اسىرەسە جانۋارلار الەمىنىڭ سۇلۋلىعى قۇرايدى. ونىڭ لينوگراۆيۋرا مەن تسيفرلىق ونەردىڭ ۇيلەسىمى بولىپ سانالاتىن يننوۆاتسيالىق جۇمىسى ايتۋعا تۇرارلىقتاي.
ساۋلەنىڭ گرافيكالىق جۇمىستار سەرياسى سيممەتريالى دوڭگەلەك كومپوزيتسيالى فراكتالدار تۇرىندە بەرىلگەن. فراكتالدار ءبىر-ءبىرىنىڭ ۇستىنە قويىلعان تابيعاتتىڭ ءارتۇرلى لينوگراۆيۋرا ەلەمەنتتەرىنەن تۇرادى. ولار – جانۋارلار مەن وسىمدىكتەر الەمىنىڭ وكىلدەرى. بۇل سەريا كوپتەگەن حالىقارالىق زاماناۋي ونەر كورمەسىندە جۇرتشىلىق نازارىنا ۇسىنىلعان. ماسەلەن, «Forest Fractal 7» جۇمىسى بيىلعى ماۋسىم ايىندا لوندون مەن افينادا وتكەن The Holy Art «Art On Loop London-Athens» كورمەسىنەن ورىن الدى. ال «Meadow Flora Fractal 2» جۇمىسى وسىمدىكتەر الەمىنە ارنالعان ايگىلى كانادالىق Exhibizone «Gardenia 2023» كورمەسىنە قويىلدى.
ساۋلە بەكسۇلتانوۆانىڭ فراكتالدى شىعارمالارعا باي ونەرى تابيعات شەجىرەسىن اشا تۇسەدى. ءار جۇمىسى جەر بيوسفەراسىنداعى ءوزارا بايلانىستى بەينەلەي وتىرىپ, ونىڭ ەكوجۇيەلەرىنىڭ نازىك تەپە-تەڭدىگىنە باسا نازار اۋدارادى. قالىڭ ورماننان قۇلازىعان شولگە دەيىنگى ءاربىر تابيعي مەكەن سۋرەتتەلىپ, ءومىردىڭ كەڭ گوبەلەنىندە تاپتىرماس قۇندىلىعىمەن تانىلادى. ول ءوز جۇمىسىندا تابيعاتتاعى سيمبيوتيكالىق قارىم-قاتىناسقا ەرەكشە ءمان بەرىپ, فلورا مەن فاۋنانىڭ ءوزارا تەرەڭ تاۋەلدىلىگىن ەسكە سالادى.
جاھاندىق ەكولوگيالىق ماسەلەلەر – كليماتتىق اۋىتقۋلاردان باستاپ, ورمانداردىڭ جاپپاي وتالۋىنا دەيىن كەز كەلگەن سۋرەتشىنىڭ تابيعات-انانى ساقتاۋ جولىنداعى پەرزەنتتىك پارىزى. بۇل تاقىرىپ – ساۋلە بەكسۇلتانوۆانىڭ جۇمىسىنىڭ اينىماس وزەگى. ونىڭ سۋ سەرياسى سۋ رەسۋرستارى مەن سۋلى جەرلەردى ساقتاۋدىڭ قاجەتتىلىگىن ساناعا سىڭىرەدى. سوندىقتان «Ocean Fractal» جانە «See Fractal» جۇمىستارى وسى جىلدىڭ ماۋسىم ايىندا اقش-تاعى Colors of Humanity Art Gallery جىل سايىنعى سۋ كورمەسىندە كەلۋشىلەر نازارىن اۋداردى. وسى اتاۋلى كورمەگە كانادا, قىتاي, گەرمانيا, ءۇندىستان, يرلانديا, جاپونيا, قازاقستان, نيدەرلاند, پولشا جانە وڭتۇستىك كورەيا سياقتى 11 ەلدىڭ سۋرەتشىلەرىنىڭ جۇمىستارى قويىلدى. بۇل جىل سايىنعى ءىس-شارانىڭ ۇيىمداستىرۋشىلارى ساحارانىڭ وڭتۇستىگىندەگى افريكاداعى تازا سۋ مەن ءتيىستى سانيتارياعا قولجەتىمدىلىكتىڭ جوقتىعىنان ورىنسىز زارداپ شەگەتىن قاۋىمدارعا تۇراقتى سۋ شەشىمدەرىن ۇسىناتىن كوممەرتسيالىق ەمەس The Water Project ۇيىمىنا قايىرىمدىلىق جاسايدى.
وسىنداي جوبالارعا قاتىسۋ ساۋلە بەكسۇلتانوۆانىڭ شىعارماشىلىعىن ەلىمىزدەگى قورشاعان ورتانى قورعاۋعا سەرپىن بەرۋ باعىتىندا جالعاستىرۋعا شابىتتاندىرا تۇسەدى. وسىنداي ەكولوگيالىق جوبالارعا قاراجات جيناۋدى كوزدەيتىن ونەر جوبالارى كوبەيە تۇسسە, نۇر ۇستىنە نۇر.
