شاھار تۇرعىندار ءۇشىن جايلى بولۋعا ءتيىس. ول ءۇشىن قوعامدىق نىسانداردىڭ مەيلىنشە كوپ بولعانى دۇرىس. تۇرعىنداردىڭ بۇل پىكىرىمەن «Amanat» فراكتسياسىنىڭ مۇشەلەرى پاۆەل كازانتسەۆ پەن مارات ءباشىموۆ تە كەلىسەدى. ءارى قالاداعى ساياباقتار, الاڭدار, باسقا دا نىساندار پارتيانىڭ سايلاۋالدى باعدارلاماسىن ىسكە اسىرۋ جونىندەگى جول كارتاسىنا كىرىستىرىلگەن.
– قوعامدىق ورىندار – قازىرگى زاماناۋي قالالاردى دامىتۋدىڭ وزەگى. قالا تۇرعىندارى دەمالاتىن جانە سەرۋەندەيتىن ورىندار, جاياۋ جۇرگىنشىلەر جولاعى, الاڭدار, كوشەلەر, سكۆەرلەر, بۋلۆارلار حالىقتىڭ ءومىر ساپاسىنا تىكەلەي اسەر ەتەدى. ولار بۇۇ ينديكاتورىندا ءبىرىنشى ورىندا تۇر. سوندىقتان قوعامدىق ورىندار مەن اۋلالاردى دامىتۋ ماسەلەسى پارتيانىڭ سايلاۋالدى باعدارلاماسىندا قامتىلعان. تيىسىنشە, بۇل جۇمىس دەپۋتاتتار باقىلاۋىندا بولادى. وسىنداي جابدىقتالعان ورىنداردى ەلوردانىڭ وزگە دە اۋداندارىنان, ءتىپتى ەلىمىزدىڭ بارلىق قالاسىنان كورگىمىز كەلەدى. پرەزيدەنت قالانى كوركەيتۋ بارىسىندا ورىن الاتىن ولقىلىقتاردى سىنعا الدى. سەبەبى تۇرعىن ءۇي تۇرعىزىلعانىمەن, وعان جاقىن ماڭدا مەكتەپ, بالاباقشا, اۋرۋحانا, ءتىپتى دەمالۋعا ارنالعان اۋلا سالىنبايدى. كۇنى كەشە عانا بايقوڭىر كەش دامىپ كەلە جاتقان اۋدانداردىڭ ءبىرى ەدى. بۇگىندە اۋدان گۇلدەنىپ, اتا-انالار بالالارىمەن بىرگە سەرۋەندەي الاتىن كەرەمەت الاڭدار پايدا بولدى. دامىعان الەۋمەتتىك ينفراقۇرىلىمسىز باياندى بولاشاق بولمايدى, – دەدى مارات ءباشىموۆ.
دەپۋتاتتار 13-تەن استام شاعىن ارحيتەكتۋرالىق نىسان ورنالاسقان «جۋرناليستەر اللەياسىن» باقىلادى. استانانىڭ 25 جىلدىعى قارساڭىندا اشىلعان الاڭدا شاعىن ساۋلەت فورمالارى, جارىق باعانالارى, ورىندىقتار قويىلىپ, دەمالىس ايماقتارى قۇرىلعان. بۇعان قوسا 230-دان استام جاسىل جەلەك وتىرعىزىلىپتى.
– تەز كوركەيىپ كەلە جاتقان قالادا, ادەتتە, دەمالىس ينفراقۇرىلىمى ءسال كەشەۋىلدەپ داميدى. ءدال قازىر ءبىز «جۋرناليستەر اللەياسىندا» تۇرىپ, بۇل جەردىڭ قالاي وزگەرگەنىنە كۋا بولىپ وتىرمىز. ونىڭ ۇستىنە, مۇندا جاستار تۇراتىن بىرنەشە تۇرعىن ءۇي كەشەنى بوي كوتەردى. بىلتىر بايقوڭىر اۋدانىندا نەبارى 2 قوعامدىق ورىن بولسا, بيىل ونىڭ سانى 9-عا جەتكىزىلمەك. سونداي-اق قۇرىلىس بارىسىندا قانداي ماتەريالدار پايدالانىلاتىنىنا نازار اۋدارۋ قاجەت, – دەدى پاۆەل كازانتسەۆ.
سونداي-اق فراكتسيا مۇشەلەرى كەنەسارى كوشەسىندەگى «7 كونتينەنت» تۇرعىن ءۇي كەشەنىنىڭ اۋلاسىن دا تەكسەردى. مۇندا تۇرعىندار ءۇشىن ەكى سپورت الاڭى, اتكەنشەكتەرى بار دەمالىس ايماعى, بالالار ويىن الاڭدارى مەن ارنايى جۇگىرۋ جولى ورناتىلعان. جالپى, حالىق يگىلىگى ءۇشىن بايقوڭىر اۋدانىندا تاعى 23 قوعامدىق ورىندى پايدالانۋعا بەرۋ جوسپاردا بار.
«Amanat» پارتياسىنىڭ استانا قالالىق سايلاۋالدى باعدارلاماسى اياسىندا الداعى بەس جىلدا 120 سپورت الاڭىن ورناتىپ, 796 اۋلانى اباتتاندىرۋ جوسپارلانىپ وتىر. بۇل 750 مىڭ تۇرعىنعا قولايلى ورتا قالىپتاستىرۋعا مۇمكىندىك بەرەدى. سونداي-اق قاتتى تۇرمىستىق قالدىقتارعا ارنالعان 2,4 مىڭنان استام كونتەينەر قويىلىپ, 175 كونتەينەر الاڭى جابدىقتالادى. ال «تەمىرجول», «كوكتال», ء«وندىرىس», «وڭتۇستىك-شىعىس» جانە وزگە دە تۇرعىن جايلاردا اۋلا اۋماعى اباتتاندىرىلماقشى.
