Maqsut Narikbayev University 2 دوكتورانتى, 2 ماگيسترانتى گەرمانيادا تاعىلىمدامادان وتەدى. ولار گەرمانياداعى مەملەكەتتىك باسقارۋ سالاسىنداعى ماڭىزدى ىستەرگە قاتىسىپ, تاجىريبە جينايدى. جوبا جەتەكشىسى, زاڭ عىلىمدارىنىڭ دوكتورى, پروفەسسور رومان مەلنيكتىڭ ايتۋىنشا, مۇنداي مۇمكىندىك ءوزارا تىعىز بايلانىستىڭ ارقاسىندا جۇزەگە اسىپ وتىر.
– Maqsut Narikbayev University نەمىس سەرىكتەستەرىمەن ۇنەمى بايلانىستا ءارى ستۋدەنتتەردىڭ, دوكتورانتتاردىڭ, وقىتۋشىلاردىڭ ءبىلىمىن جاقسارتۋدا بىرلەسە جۇمىس ىستەيدى. بۇل جوبا دا وسىنداي جۇيەلى قارىم-قاتىناس ناتيجەسىندە جۇزەگە استى. گەرمانياداعى سەرىكتەستەرىمىزدىڭ ىنتىماقتاستىقتى جاقسارتۋعا, جاڭا تاجىريبەلەردى سىناپ كورۋگە ارقاشان اشىق ەكەنىن اتاپ وتكىم كەلەدى. بۇگىندە نەمىس قورلارى دا, نەمىس ۋنيۆەرسيتەتتەرى دە, جالپى, گەرمانيا ءبىزدىڭ ەلىمىزدى ءبىلىم مەن عىلىم سالاسىنداعى سەنىمدى ءارى تۇراقتى ارىپتەسى رەتىندە قاراستىرادى. سوندىقتان باستامالارىمىزدى ىسكە اسىرۋعا ۇنەمى قولداۋ كورسەتەدى, – دەدى ر.مەلنيك.
ءبىزدىڭ گەرمانيادان ۇيرەنەرىمىز كوپ. ويتكەنى اكىمشىلىك قۇقىق سالاسىنداعى نەمىس تاجىريبەسى زاڭ سالاسىنداعى وزىق ۇلگى رەتىندە ەسەپتەلەدى. مىسالى, ەلىمىزدە جەكە تۇلعالارعا زاڭسىز كەلتىرىلگەن زالالدى وتەۋ تۋرالى ماسەلە ءالى شەشىلگەن جوق. سونداي-اق جەرگىلىكتى ءوزىن-ءوزى باسقارۋ ينستيتۋتتارى ءالى دە جەتىلدىرۋدى قاجەت ەتەدى. ال وسى جاعىنان گەرمانيا وتە تاجىريبەلى مەملەكەت.
تاعىلىمدامادان وتۋگە مۇمكىندىك العانداردىڭ ءبىرى – ءادىلحان ىلدەباەۆ. ونىڭ ايتۋىنشا, بۇنداي تاعىلىمداما دامىعان ەۋروپا ەلدەرىندەگى بيۋروكراتيالىق ۇدەرىستەردىڭ قالاي جۇمىس ىستەيتىنىن قاراستىرۋعا مۇمكىندىك بەرەدى. سونىمەن قاتار ەكىنشى تاراپ تا ءبىزدىڭ ەلىمىزدەگى اكىمشىلىك قۇقىقتىق جاعدايدىڭ قانداي ەكەنىن بىلۋگە مۇددەلى.
– بۇل تاعىلىمداما گەرمانيانىڭ زاڭ سالاسىنداعى كوپ جىلدىق تاجىريبەسىن ەسكەرە وتىرىپ جۇزەگە اسىرىلدى دەپ ايتۋعا بولادى. وندا مەن نەمىس شەنەۋنىكتەرىنىڭ اكىمشىلىك اكتىلەردى قابىلداۋعا قالاي قارايتىنىن, قانداي شەشىم قابىلدايتىنىن, قانداي ادىستەرمەن جۇمىس ىستەيتىنىن كورىپ, ءبىلىپ, ۇيرەنەمىن. العان تاجىريبەمدى ءوز ەلىمىزدەگى اكىمشىلىك قۇقىق سالاسىن دامىتۋعا پايدالاناتىن بولامىن, – دەدى Maqsut Narikbayev University ستۋدەنتى ءادىلحان.
زاڭ عىلىمدارىنىڭ دوكتورى, پروفەسسور رومان مەلنيكتىڭ ايتۋىنشا, ستۋدەنتتەردىڭ پراكتيكالىق داعدىلاردى يگەرۋىنىڭ ەڭ جاقسى ءتۇرى ول – تاعىلىمداما.
– مەنىڭ ويىمشا, ەگەر ءبىز وزگەرىستى قالاساق, مەملەكەتتىك بيلىكتى ۇيىمداستىرۋدىڭ بارلىق زاماناۋي تاجىريبەلەرىن زەرتتەپ, ولاردى ەنگىزۋ مۇمكىندىگىن قاراستىرىپ, ۇلتتىق, تاريحي, ەكونوميكالىق ەرەكشەلىكتەرىمىزدى ەسكەرە وتىرىپ جۇزەگە اسىرۋىمىز قاجەت. وسى تۇستا ماسەلەلەردى شەشۋدىڭ جاڭا تاسىلدەرىن تابا الاتىن, ونى دامىتىپ ەنگىزە الاتىن جاس, ءبىلىمدى, شىعارماشىل تۇلعالار قاجەت. مۇنداي جوبالار ءبىزدىڭ جاستارىمىزعا جاڭا جول اشادى, ولارعا باسقا ەلدەرمەن بايلانىس ورناتۋعا مۇمكىندىك بەرەدى, – دەيدى اكىمشىلىك جانە نەمىس قۇقىعى عىلىمي مەكتەبىنىڭ جەتەكشىسى رومان مەلنيك.
