ولگا بيبيك ارنايى وقۋ بىتىرگەن كاسىبي سۋرەتشى ەمەس, اۋىلدى اينالا قورشاپ جاتقان اراقاراعاي ورمانىنداعى قايىڭ كومىرىن دايىندايتىن تسەحتا ەڭبەك ەتەدى. كومىر سالاتىن قاعاز قاپشىق تىگەدى. كۇندەلىكتى جۇمىسى مەن ءۇي شارۋاسىنان قولى قالت ەتكەندە عانا سۋرەت سالۋعا وتىرادى.
اۋەسقوي سۋرەتشىنىڭ ايتۋىنشا, قايىڭنىڭ قابىعى تابيعات سۋرەتتەرىن سالۋعا اسا ىڭعايلى. قىلقالام شەبەرى قابىقتى ارى-بەرى اۋدارىپ, سىرتىنداعى قوڭىرقاي بۇرتىك-بۇدىرلەرگە ءۇڭىلىپ وتىرىپ, قانداي سۋرەت سالۋعا بولاتىنىن بىردەن تۇسىنەدى ەكەن. ورمان قىزىنىڭ قولىنان شىققان كوركەم تۋىندىلاردىڭ دەنى پەيزاج جانرىنا ارنالعان.
جاستايىنان سۋرەت سالۋعا بەيىم بولىپ وسكەن ولگا مەكتەپ بىتىرگەن سوڭ ءارى قاراي وقي الماي قالعانى بولماسا, بۇگىنگە دەيىن قولىنان قىلقالامىن تۇسىرمەگەن. ال قايىڭ قابىعىنا سۋرەت سالۋمەن 15 جىلدان بەرى اينالىسىپ كەلەدى. سالعان سۋرەتتەرىن كوبىنە اعايىن-تۋىستارى مەن جاقىن تانىستارى كەيدە قيىلىپ سۇراپ, تەگىن الىپ كەتەدى, كەيدە ازىن-اۋلاق اقشاعا ساتىپ الىپ جاتادى.
– كوڭىل كۇيىڭ بابىندا تۇرسا, ءبىر-ەكى ساعاتتىڭ ىشىندە ءبىر سۋرەت سالىپ تاستاۋعا بولادى. كوبىنە اكريلدى بوياۋ پايدالانامىن. سۋرەت سالىپ بولعان سوڭ, بەتىنە ءتۇسسىز لاك جاعىپ شىعامىن. ورماننىڭ ىشىنەن قايىڭنىڭ قابىعىن تاڭداپ ءجۇرىپ ىزدەپ تابۋ وڭاي شارۋا ەمەس. قابىقتى قايىڭنان سىلىپ الاتىن ۋاقىتى بولادى. قايىڭ قابىعىن مامىردان باستاپ ماۋسىمنىڭ باسىنا دەيىن عانا جينايدى. ودان كەشىكسەڭىز قابىق اعاش دىڭىمەن ءبىتىسىپ كەتەدى, سىلىپ الا المايسىز. كارى اعاشتاردان الۋعا بولادى. بىراق مۇنداي قابىقتاردىڭ تەسىگى كوپ, ساپاسىز بولىپ كەلەدى. مەن وزىمە قاجەت قايىڭ قابىقتارىن ادەتتە كوكتەمدە جيناپ الامىن. قىستا بوس ۋاقىتىم كوبىرەك, سوندىقتان بۇل مەزگىلدى مەن شىعارماشىلىققا ارنايمىن, – دەيدى ولگا.
سۋرەتشى شىعارمالارىندا نەگىزىنەن ورماننىڭ تابيعاتى, جىلدىڭ ءتورت مەزگىلى بەينەلەنگەن.
قوستاناي
