«Amer International Group» نەگىزىن قالاۋشى جانە باسقارما توراعاسى ۆان ۆەنينمەن كەزدەسۋ بارىسىندا ۆيتسە-پرەمەر ەكى ەل اراسىنداعى بيزنەس تىعىز دوستىق سەرىكتەستىكتە دامۋعا ءتيىس ەكەنىن اتاپ ءوتتى.
«كومپانيانىڭ مەتالل وڭدەۋمەن اينالىساتىنىن, شيكىزاتتى وڭدەۋدىڭ جەتكىلىكتى تەرەڭ ۇدەرىسىن ەنگىزگەنىن بىلەمىز جانە بىزگە قازاقستاندا مەتالل وڭدەۋ ءوندىرىسىن ۇيىمداستىرۋعا كومەكتەسۋدى ۇسىنامىز. قازاقستان وسى سالاعا ينۆەستيتسيا سالۋعا مۇددەلى. ۇلتتىق زاڭناماعا سايكەس ۇكىمەت ينۆەستيتسيالىق كەلىسىمشارت جاساسۋ ارقىلى ينۆەستيتسيالىق پرەفەرەنتسيالار بەرەدى. جاڭا ينۆەستيتسيالىق قۇرال – ينۆەستورلارعا ەرەكشە جاعداي, ونىڭ ىشىندە تۇراقتىلىق ۇسىناتىن ينۆەستيتسيالار تۋرالى كەلىسىم ەنگىزىلدى. سىزدەردى وسى باعىتتا بىزبەن جۇمىس ىستەۋگە, پراكتيكالىق تۇرعىدا ەكىجاقتى ىنتىماقتاستىق ورناتۋعا شاقىرامىز», دەدى س.جۇمانعارين.
قازاقستاننىڭ ۆيتسە-پرەمەرى كومپانيانى بارلاۋ مەن وندىرۋدەن باستاپ مەتالداردى وڭدەۋگە دەيىنگى بارلىق ۇدەرىستى جولعا قويۋعا قاتىسۋعا شاقىردى.
«جارتىلاي وتكىزگىشتەر وندىرىسىندەگى بىلىممەن ءبولىسىپ, ماماندارىمىزعا مەتالداردى وڭدەۋ تەحنولوگيالارىن ۇيرەتسەڭىزدەر», دەدى ۆيتسە-پرەمەر.
ءوز كەزەگىندە ۆ.ۆەنين قازاقستاندىق تاراپتىڭ ۇسىنىستارىن جاقسى قابىلدادى.
«بۇگىن 200 قىتايلىق كومپانيانىڭ ىشىندە ءبىز ءبىرىنشى 20-عا, ال جەكەمەنشىك 100 كومپانيانىڭ ىشىندە ۇزدىك بەستىككە كىرەمىز. «Global Fortune» 500 الەمدىك رەيتينگىندە قازىرگى ۋاقىتتا جىلىنا 100 ملرد دوللاردان اسا كىرىسپەن 124-ورىندا تۇر. وڭدەۋ تەحنولوگيالارىنىڭ ارقاسىندا ءبىز شيكىزاتتىڭ قۇنىن الدىمەن 10 ەسە, سودان كەيىن 100 ەسە, ال كەيبىر تاۋار بويىنشا ونىڭ شيكىزاتىنىڭ باستاپقى قۇنىنان 1 000 ەسە ارتتىرامىز. ەگەر بىزگە وندىرۋدەن قايتا وڭدەۋگە دەيىنگى جوبالارعا قاتىسۋدى ۇسىنساڭىز جانە قازاقستاندا ينۆەستيتسيالىق جوبالاردى جۇزەگە اسىرۋ كەزىندە جەڭىلدىكتەر بولسا, وندا ءبىز وسىنداي شارتتارمەن قاتىسۋعا مۇددەلىمىز», دەدى ۆ.ۆەنين.
كادرلاردى دايارلاۋعا قاتىستى «Amer International Group» نەگىزىن قالاۋشى ونىڭ كومپانياسى ينۆەستورلارمەن وسى باعىتتا ىنتىماقتاساتىنىن اتاپ ءوتتى.
سونداي-اق ۆ.ۆەنين اۋىل شارۋاشىلىعى سالاسىنداعى ىنتىماقتاستىققا قىزىعۋشىلىق ءبىلدىردى. تاراپتار قازاقستاندىق دەلەگاتسيا ورالعاننان كەيىن يندۋستريا جانە ينفراقۇرىلىمدىق دامۋ مينيسترلىگى ىنتىماقتاستىق ءۇشىن ۇسىنىستار پۋلىن دايىنداپ, قىتايلىق تاراپقا قاراۋعا جىبەرەتىنىنە كەلىستى.
سونىمەن قاتار س.جۇمانعارين «Huawei» كومپانياسىنىڭ كەڭسەسىندە بولدى. كومپانيا كەڭسەسىنىڭ كورمە زالىندا قازاقستاندىق دەلەگاتسيا جوعارى اعىننان تومەنگە دەيىن, كومىر وندىرۋدە, تاۋ-كەن ونەركاسىبىندە, پورت ينفراقۇرىلىمىندا جانە باسقا دا سالالاردا, ميلليون حالقى بار قالالاردىڭ كولىك جانە ينفراقۇرىلىمىن باسقارۋدا, مۇناي ونەركاسىبىنىڭ تولىق وندىرىستىك تسيكلى ۇدەرىسىنە تسيفرلىق شەشىمدەر مەن AI ەنگىزۋ ناتيجەلەرىن ۇسىندى.
مىسالى, «Smart City Intelligent Operation Center» قالا تۇرعىنىنىڭ ۇكىمەتتىڭ ۋاكىلەتتى ورگانىنا ءوتىنىشىن 30 مينۋت ىشىندە قۇرۋعا مۇمكىندىك بەرەدى, ال ءوتىنىمدى ورىنداۋ 24 ساعاتقا دەيىن سوزىلادى. «Smart Port» تيانتسزين پورتىنداعى كونتەينەرلەردى تيەۋ كەزىندەگى اۋىر جۇمىستى قاشىقتان باسقارۋ جانە باقىلاۋعا اۋىستىردى. كومىر شاحتالارىندا 5G+AI تەحنولوگياسىنا نەگىزدەلگەن «Coal Sheater Remote Control» ارقىلى جۇمىس ۇدەرىسى تولىعىمەن جەر بەتىنەن باسقارىلادى.
س.جۇمانعارين «Huawei Technologies Co. Ltd.» اتقارۋشى ۆيتسە-پرەزيدەنتى, سىرتقى كوممۋنيكاتسيالار دەپارتامەنتىنىڭ پرەزيدەنتى ۆان تسزيانفەنمەن كەزدەسۋ بارىسىندا تسيفرلاندىرۋدىڭ سوڭعى ترەندتەرى مەن قازاقستاندىق تسيفرلىق ەكوجۇيەنى دامىتۋ ءۇشىن ىنتىماقتاستىق مۇمكىندىكتەرىن تالقىلادى.
«الەمدە تانىمال كومپانيالار كوپ ەمەس. ءبىر كەزدەرى مەن «Nokia» كومپانياسىندا بولدىم, ال قازىر «Huawei-دە» ءجۇرمىن. «Huawei» كەيىنگى جىلدارى جاساعان ۇلكەن ۇمتىلىس – قىتايدىڭ ءوزى جاساعان ۇلكەن سەرپىلىستىڭ كورىنىسى. ءبىز كومپانيانىڭ تسيفرلىق تەحنولوگيالاردى ەنگىزۋدەگى تاجىريبەسىمەن بولىسۋىنە وتە مۇددەلىمىز, تسيفرلىق ەكوجۇيەمىزدى دامىتۋ ءۇشىن ىنتىماقتاستىقتىڭ ۇلكەن الەۋەتىن كورىپ وتىرمىز. بيىل «Huawei Technologies» جانە قتج ۇلتتىق كومپانياسى جاڭا تەحنولوگيالاردى پايدالانا وتىرىپ, قازاقستانداعى تەمىرجول جەلىسىن تسيفرلاندىرۋعا قاتىستى كەلىسىمگە قول قويدى. بۇل ىنتىماقتاستىق قازاقستاننىڭ ساۋدا-كولىك بايلانىسىن دامىتۋعا وڭ اسەر ەتەتىنىنە, قازاقستاننىڭ ورتالىق ازيانىڭ تسيفرلىق حابىنا اينالۋىنا نەگىز بولاتىنىنا سەنىمدىمىن», دەپ اتاپ ءوتتى ۆيتسە-پرەمەر.
ءوز تاراپىنان ۆ.تسزيانفەن قازاقستاندىق دەلەگاتسيانىڭ «Huawei» كەڭسەسىنە كەلگەنى ءۇشىن ريزاشىلىعىن ءبىلدىردى. كومپانيا وكىلدەرى قازاقستاننىڭ «تسيفرلىق قازاقستان مەن ەۋرازيالىق حابقا اپارار جولى» اتتى تسيفرلىق دامۋىنا قاتىستى ءوز ۇسىنىستارىن بەردى.
