2023 جىلدىڭ ءبىرىنشى جارتىجىلدىعىندا ەكىنشى دەڭگەيدەگى بانكتەردىڭ جەكە تۇلعالارعا جاڭادان بەرگەن قارىزدارىنىڭ كولەمى 2022 جىلدىڭ ءبىرىنشى جارتىسىمەن سالىستىرعاندا 13,4 پايىزعا ۇلعايىپ, 5 993,2 ملرد تەڭگەنى قۇراعان. مەرزىمى وتكەن بەرەشەگى 90 كۇننەن اساتىن قارىزداردىڭ ۇلەسى – 5,5 پايىز نەمەسە 519 ملرد تەڭگە. قارجى نارىعىن رەتتەۋ جانە دامىتۋ اگەنتتىگىنىڭ بىزگە بەرگەن دەرەگىنە قاراساق, تۇتىنۋشىلىق كرەديت بەرۋ نارىعىنىڭ كوشباسشىلارى – Kaspi Bank (تۇتىنۋشىلىق پورتفەلىنىڭ جالپى سوماسىنىڭ 33 پايىزى) پەن Halyk Bank (23,9 پايىز).
حالىققا ۇسىنىلعان بانك سەكتورىنىڭ كرەديتتەرى نەگىزىنەن ەلىمىزدىڭ ءىرى قالالارىندا – الماتى (28,3 پايىز) جانە استانادا (16,9 پايىز) شوعىرلانعان. ونىڭ ىشىندە يپوتەكالىق قارىزدار پورتفەلى ءىرى ەكونوميكالىق ورتالىقتارعا دا تيەسىلى: استانا قالاسى (29,8 پايىز), الماتى قالاسى (24 پايىز) جانە قاراعاندى وبلىسى (6,3 پايىز).
ارينە, تۇتىنۋشىلىق زايم سەگمەنتىندە جتسم-ءنىڭ ماڭىزى وتە ۇلكەن. قازىر جتسم-ءنىڭ شەكتى ءمانى – 56 پايىز.
«بۇل ءمان ۇلتتىق بانك باسقارماسىنىڭ 2012 جىلعى قاۋلىسىمەن بەلگىلەندى جانە سودان بەرى وزگەرگەن جوق. وسىعان بايلانىستى كەپىلسىز تۇتىنۋشىلىق كرەديتتەر بويىنشا مولشەرلەمەلەردى شەكتەۋ ءۇشىن اگەنتتىك نارىقتىق جاعدايلارعا بايلانىستى كەپىلسىز تۇتىنۋشىلىق كرەديتتەر بويىنشا جتسم-ءنىڭ شەكتى ءمانىن رەتتەۋدى ۇسىنادى. وسىلايشا, جتسم-ءنىڭ شەكتى ءمانىن ەسەپتەۋدى پايىزدىق مارجا, تاۋەكەل ءۇشىن سىيلىقاقى, وپەراتسيالىق شىعىستار جانە قورلاندىرۋ قۇنى سياقتى 4 فاكتوردىڭ دەڭگەيىنە بايلانىستى جۇزەگە اسىرۋ ۇسىنىلادى. اگەنتتىك جوعارىدا اتالعان فاكتورلارعا بايلانىستى كەپىلسىز تۇتىنۋشىلىق قارىزدار بويىنشا جتسم-ءنىڭ شەكتى مولشەرىن قايتا قاراۋدى جوسپارلاپ وتىر», دەلىنگەن بەرىلگەن جاۋاپتا.
ەسكە سالا كەتسەك, وسىعان دەيىن كەپىلسىز تۇتىنۋشىلىق قارىزدار ءۇشىن جتسم مولشەرىن 56 پايىزدان 40 پايىزعا دەيىن تومەندەتۋ تۋرالى ۇسىنىستار ايتىلعان ەدى.
ايتا كەتەيىك, جتسم – نەسيە تولەنەتىن مەرزىم كەزىندەگى كليەنتتىڭ بانككە تولەيتىن بارلىق سوماسىنىڭ جيىنتىعى. وعان سىياقى مولشەرلەمەسىنەن بولەك كوميسسيا, ساقتاندىرۋ, باعالاۋ, دەلدالدار قىزمەتى جانە كرەديتوردىڭ باسقا دا تولەمدەرى كىرەدى. ساراپشىلاردىڭ ايتۋىنشا, كەپىلسىز تۇتىنۋشىلىق نەسيە ءۇشىن جتسم-ءنىڭ تومەندەتىلۋى – ازاماتتار ءۇشىن ءتيىمدى بولعانىمەن, قارجى ينستيتۋتتارى ءۇشىن ۇنامسىز باستاما.
