وتاندىق تۇڭعىش «اراي» اۋە كەمەسىنىڭ ءوندىرىسى عالىمداردى بەيجاي قالدىرمادى. ەرەكشە تەحنولوگيالىق جەتىستىكتەرى بار اۋە كەمەسى كەز كەلگەن جەردە ۇشىپ-قونۋعا قولايلى. اتالعان ۇشاقتى 2011 جىلى قۇرىلعان «AviaMaster Aircraft» كاسىپورنى شىعارعان. ۇشاقتىڭ بارلىق قۇرامداس بولشەگى اقش پەن كانادانىڭ اۆياتسيا بيلىگىنىڭ ماقۇلداماسىنان وتكەن. جوبا اۆتورى داۋرەن ۋاليەۆ عالىمدارعا ونىڭ مۇمكىندىكتەرىن ءتۇسىندىرىپ بەردى. «ۇشاق 1 مىڭ شاقىرىمعا دەيىن ۇشا الادى. 4,5 مىڭ بيىكتىككە كوتەرىلەدى. اۆتوموبيل بەنزينىمەن ۇشادى. وتە قاراپايىم ۇلگىدە قۇراستىرىلعان», دەدى جوبا اۆتورى.
ەلىمىزدە جاسالعان بۇل ۇشاقتى اۋىل شارۋاشىلىعى سالاسىندا, بارلاۋ قىزمەتىندە پايدالانۋعا بولادى. سىيىمدىلىعى ءتورت ادامعا ارنالعان اۋە كەمەسى 690 كيلوگرامم جۇك كوتەرە الادى. ساعاتىنا نەبارى 30 ليتر جانارماي جاعادى. ەرەكشە تەحنولوگيالىق جەتىستىكتەرى بار, كەز كەلگەن جەرگە ۇشىپ-قونۋعا قولايلى اۋە كەمەسىنە قازىردىڭ وزىندە شەت مەملەكەتتەردەن سۇرانىس ءتۇسىپ جاتقان كورىنەدى.
وتاندىق «ارايدى» وقۋ-تاكتيكالىق ۇشاق رەتىندە پايدالانۋ ءۇشىن ارنايى تەحنيكالىق ساراپتامادان وتكىزگەن. ۇلتتىق قاۋىپسىزدىك كوميتەتى شەكارا قىزمەتىنىڭ اكادەمياسى اۋە كەمەسىن شەكارا كۇزەتىندە پاترۋلدىك-باقىلاۋ ۇشاعى رەتىندە پايدالانۋ ءۇشىن زەرتتەۋلەر جۇرگىزگەن. سونىمەن قاتار اۋىل شارۋاشىلىعى سالاسىندا دا ءونىمنىڭ ساپاسىنا وڭ اسەر ەتۋدە ءتيىمدى قىزمەت اتقاراتىنى ايتىلدى.
ايتا كەتەرلىگى, ەندىگى ۋاقىتتا ەلىمىزدە قۇراستىرىلاتىن اۋە كەمەسىنىڭ مۇمكىندىگى ارتقان. بۇرىن تەك قورعانىس سالاسىنىڭ قاجەتىنە قىزمەت ەتەتىن تەحنيكالاردى ماماندار وزگە دە باعىتتار بويىنشا ءتيىمدى پايدالانۋدى كوزدەپ وتىر. ونەرتاپقىشتاردىڭ مۇنداي وزىق يدەياسى مەملەكەت تاراپىنان قولداۋ تاۋىپ, گرانت ءبولىنىپ, جوبا ىسكە اسقان. اۆياتسيا سالاسىنداعى وتاندىق عالىمداردىڭ جۇمىسى تانىستىرىلعان ءىس-شارادا شاعىن اۆياتسيانى ودان ءارى دامىتۋ ماسەلەلەرى دە تالقىلاندى.
سونداي-اق كورمەگە وتاندىق عالىمدار قۇراستىرعان ۇشقىشسىز ۇشاتىن اپپاراتتار قويىلدى. ولاردىڭ كەيبىرى 5 جارىم ساعات ۇشسا, اراسىندا 15 مىڭ شاقىرىمعا دەيىن ۇشاتىندارى دا بار ەكەن. وتاندىق ونەرتاپقىشتاردىڭ جۇمىستارىنا قولداۋ كورسەتىلەتىنى دە ايرىقشا اتالدى.
الماتى وبلىسى
