تاعىلىمى مول شاراعا دۋالى اۋىز, شەجىرەكەۋدە قاريالار قاتىسىپ, وسكەلەڭ ۇرپاققا ونەگە كورسەتتى. اقىل دوداسىنا وبلىس قالالارى مەن اۋداندارىنىڭ اقىلگوي قاريالارى قاتىسىپ, جۇرتشىلىق الدىندا بەرىپ جۇرگەن باتالارىن جالپى كوپشىلىك پەن ادىلقازىلار القاسىنىڭ سارابىنا سالدى.
سان عاسىرلار وتسە دە, قازاق حالقىنىڭ وزگەرىسسىز, سالتى بولىپ قالىپتاسقان ءداستۇرىنىڭ ءبىرى – باتا بەرۋ. بۇگىندە حالقىمىزدىڭ وسىناۋ تاعىلىمدى ءداستۇرى قايتا جاڭعىرىپ, جاڭارۋ ۇستىندە. ارداگەرلەر ۇيىندە وتكەن شارا وسى تۇجىرىمىمىزدىڭ جارقىن ءبىر دالەلى ىسپەتتى.
ايگىلى تولە بيدەن بالا كەزىندە باتا العان ەسكەلدى اۋليە ۋاقىت وتە كەلە اۋزىنا قالىڭ ەل قاراعان دارا دا دانا تۇلعاعا اينالدى. وسىناۋ جان تولقىتار كورىنىسپەن اشىلعان بايقاۋدا وبلىستىق ارداگەرلەر ۇيىمىنىڭ توراعاسى ەرمەك كەلەمسەيىت ءسوز سويلەپ, باتاگوي قاريالارعا ساتتىلىك تىلەدى.
ەل مەن جەرگە, ەل مەرەيىن كوتەرەر ەرلەرگە, جەلكىلدەپ ءوسىپ كەلە جاتقان جاس ۇرپاققا اق تىلەكتەر اعىتىلعان بايقاۋدىڭ العاشقى كەزەڭىندە قازىنالى قارتتار وزدەرى دايىنداپ اكەلگەن باتالارىن ادىلقازىلار القاسىنىڭ سارابىنا سالسا, ەكىنشى كەزەكتە جەرەبە بويىنشا بەلگىلەنگەن تاقىرىپقا باتا بەردى. تۇساۋكەسۋ مەن اس باتاسى, ساپار مەن ناۋرىز باتاسى ءتارىزدى تاقىرىپتارعا بەرىلگەن باتالار قاريالاردىڭ باسەكەگە قانشالىقتى دايىندالىپ كەلگەندىكتەرىن, ياعني جالپى ءومىر تاجىريبەلەرىنىڭ دە مولدىعىن بايقاتتى. ايتسە دە «جۇيرىكتەن جۇيرىك وزار جارىسقاندا» دەگەندەي, تۇپتەپ كەلگەندە باعى مەن بابى بىردەي شاپقان قاراتالدىق قاريا سەيفوللا ەرجان ۇلى 1-ورىنعا لايىق دەپ تانىلدى. جۇلدەلى ەكىنشى, ءۇشىنشى ورىنداردى تالدىقورعاندىق قۋانىش كۇنبولاتوۆ پەن الاكولدىك ادىلعازى ءنۇسىپوۆ اقساقالدار ءوزارا ءبولىستى. وزگە قاتىسۋشىلارعا ىنتالاندىرۋ سىيلىعى بەرىلدى.
بايقاۋ سوڭىندا ادىلقازىلار القاسىنىڭ توراعاسى امىرە ءارىن ءسوز الىپ, تاعىلىمى مول شارانىڭ ءوتۋى مەن ماڭىزى جايىندا ايتىپ ءوتتى. ودان كەيىن وبلىسىمىزدىڭ تۇكپىر-تۇكپىرىنەن ات تەرلەتىپ كەلگەن قاريالار اق داستارقان باسىندا شۇيىركەلەسىپ, ۇلاعاتى مول اڭگىمە ءوربىتتى.
جەتىسۋ وبلىسى
