پرەزيدەنتىمىز الەمدىك باسەكەگە قابىلەتتى جانە زاماناۋي يننوۆاتسيالىق تەحنولوگياعا ارقا سۇيەيتىن ەكونوميكانى ورنىقتىرۋ, بۇل ءۇشىن مەملەكەتتىك شارۋاشىلىقتىڭ بارلىق سالاسىندا ءوز ءىسىن جەتىك بىلەتىن بىلىكتى ماماندار بولۋى قاجەتتىگىن بۇرىن دا ايرىقشا اتاپ كورسەتكەن بولاتىن. بۇل رەتتە جوعارى وقۋ ورىندارىنىڭ باسەكەگە قابىلەتتىلىگىن كۇشەيتۋدىڭ ماڭىزى زور. ال باسەكەگە توتەپ بەرۋ ەڭ اۋەلى ءبىلىم ساپاسىن ارتتىرۋعا, ءبىلىم الۋشىلارعا جانە ءبىلىم بەرۋشىلەرگە تالاپتارعا ساي جاعداي جاساۋعا بايلانىستى.
قازاقستان مەن ورتالىق ازياداعى ەڭ ۇزدىك جوعارى وقۋ ورىندارىنىڭ قاتارىنداعى الماتى تەحنولوگيالىق ۋنتۆەرسيتەتى تاعام, وڭدەۋ, توقىما جانە جەڭىل ونەركاسىپ سالالارى, ينجينيرينگ جانە IT, بيزنەس, قىزمەت كورسەتۋ مەن قوناقجايلىلىق يندۋسترياسى ءۇشىن ماماندار مەن عىلىمي كادرلار دايارلاپ كەلەدى. ۋنيۆەرسيتەت جاھاندىق ءبىلىم بەرۋ كەڭىستىگىنە بەلسەنە كىرىگىپ, حالىقارالىق اۋقىمدا بارعان سايىن تانىلا ءتۇسۋ ۇستىندە. مۇندا تاڭداعان ماماندىقتار بويىنشا وندىرىستەگى پراكتيكامەن تىكەلەي ءوزارا بايلانىستى قامتيتىن وسى زامانعى عىلىمي-ءبىلىم بەرۋ ۇدەرىسى جوعارى دەڭگەيدە قۇرىلعان. مۇنىڭ ءبارى ونىڭ الەمدىك, وڭىرلىك جانە ۇلتتىق رەيتينگتەردەگى كورسەتكىشتەرىمەن قۋاتتالادى. ماسەلەن, وسى جىلى QS Quacquarelli Symonds ( ۇلىبريتانيا) حالىقارالىق رەيتينگ اگەنتتىگىنىڭ ايقىنداۋى بويىنشا, الماتى تەحنولوگيالىق ۋنيۆەرسيتەتى دۇنيەجۇزىنىڭ 100 ەلىنىڭ تاڭداۋلى وقۋ ورىندارى اراسىندا 801-850 ورىندى يەلەندى. بۇل وتە جاقسى كورسەتكىش دەپ باعالانادى. سونداي-اق QS Stars حالىقارالىق رەيتينگىنىڭ ساراپشىلارى ء«بىلىم بەرۋ» جانە «جۇمىسقا ورنالاسۋ» ساناتتارى بويىنشا اتۋ-دى 5 جۇلدىزبەن اتاپ ءوتتى. قازاقستان جوعارى وقۋ ورىندارىنىڭ ۇلتتىق رەيتينگىندە اتۋ ۇزدىك جوعارى وقۋ ورىندارى بەستىگىنە كىرەدى. بۇل ءبىلىم ساپاسىنا قاتىستى دەرەكتەردىڭ ءبىر پاراسى عانا.
عىلىم جانە جوعارى ءبىلىم مينيسترلىگى ءبىلىم ساپاسىن ارتتىرۋ, ستۋدەنتتەرگە قاجەتتى جاعداي جاساۋ, اسىرەسە جاتاقحانامەن قامتاماسىز ەتۋ ماسەلەسىندە وقۋ ورىندارىمەن تىعىز بايلانىستا. وسى ورايدا ايتار بولساق, اتۋ-دى تاڭداعان مەملەكەتتىك گرانت يەلەرىنىڭ سانى جىلدان-جىلعا كوبەيە تۇسۋدە, سونىڭ وزىندە جاتىنجايعا مۇقتاج ستۋدەنتتەردىڭ 75 پايىزى جاتاقحانادان ورىن الادى, بۇل قولدانىستاعى نورماعا ساي كورسەتكىش. وتكەن جىلى «Egemen Qazaqstan» گازەتىندە ستۋدەنتتەر سانىنىڭ ارتا ءتۇسۋىن ەسكەرە وتىرىپ, تاعى ءبىر جاتاقحانا سالىناتىنىن ايتقان ەدىك. مىنە, جاڭا وقۋ جىلى 300 ورىندىق زامان تالابىنا ساي جاڭا جاتاقحانا عيماراتىنىڭ پايدالانىلۋعا بەرىلۋىمەن باستالماق. بۇعان قوسا تاعى ءبىرلى-ەكىلى جاتاقحانا سالۋ ءۇشىن جەر تەلىمىن الۋ ماقساتىندا الماتى قالاسى اكىمدىگىمەن جۇمىس جۇرگىزىلىپ جاتىر.
سونىمەن قاتار جاتاقحانالاردىڭ بارلىعىندا تيىسىنشە كۇردەلى نەمەسە اعىمداعى جوندەۋ جۇمىستارى جۇرگىزىلدى. قازىرگى كەزدە ءبارى دە جاڭا وقۋ جىلىنا ساقاداي ساي تۇر. ۋنيۆەرسيتەتتىڭ باس كورپۋسىندا دا جوندەۋ جۇمىستارى جۇرگىزىلىپ, جىلۋ جۇيەلەرى جاڭارتىلدى.
قازىرگى ۋاقىتتا 8 مىڭعا جۋىق ستۋدەنت وقيتىن اتۋ-دىڭ عىلىم-ءبىلىم تۇرعىسىنان ايتارلىقتاي ماتەريالدىق-تەحنيكالىق بازاسى بار. مۇندا بەس فاكۋلتەت, ۋنيۆەرسيتەت بازاسىندا قۇرىلعان قازاقستان-شۆەيتساريا قوناق ءۇي بيزنەسى جانە تۋريزم ينستيتۋتى, 3 عىلىمي زەرتتەۋ ينستيتۋتى, 12 وقۋ-عىلىم ورتالىعى, زاماناۋي جابدىقتارمەن جاراقتاندىرىلعان 13 عىلىمي زەرتتەۋ زەرتحاناسى, شاعىن زاۋىتتارعا يە تاعام جانە وڭدەۋ ءوندىرىسى تەحنوپاركى, مەيرامحانا ءىسى مەن قوناق ءۇي بيزنەسى وقۋ ورتالىعى, تاماقتاندىرۋ كومبيناتى, 2 سپورت زالى مەن ستاديون, 2 مەدپۋنكت, باسپاحانا, ستۋدەنتتەرگە قىزمەت كورسەتۋ ورتالىعى بار. ماتەريالدىق-تەحنيكالىق بازا اۋقىمى 70 مىڭ شارشى مەتردى قۇرايدى, وعان 4 وقۋ كورپۋسى, 5 ستۋدەنتتىك جاتاقحانا كىرەدى.
گرانتتار ارقىلى جانە اقىلى نەگىزدە ءبىلىم الۋشىلار سانىنىڭ ارتۋىنا وراي 9 قاباتتان تۇراتىن تاعى ءبىر جاڭا وقۋ كورپۋسىنىڭ قۇرىلىسىن باستاۋ كوزدەلىپ
وتىر.
ۋنيۆەرسيتەت جەتىستىكتەرىنىڭ بارلىعى – ونىڭ پروفەسسور-وقىتۋشىلار قۇرامى مەن بارلىق قىزمەتكەرلەرى ەڭبەگىنىڭ جەمىسى. ولاردىڭ جالاقىسى بيىل 30 پايىزعا كوتەرىلدى. باسقا دا ماتەريالدىق جانە مورالدىق تۇرعىدان قولداۋ شارالارى ءاردايىم نازاردا تۇر.
ءسوز باسىندا, پرەزيدەنت اتاپ كورسەتكەندەي, قازاقستاندا ەكونوميكالىق دامۋدىڭ جاڭا ۇلگىسىنە كوشۋ قولعا الىناتىنىن ايتتىق. سوعان وراي, ەلىمىزدە تۇراقتى سۇرانىستاعى, حالىق تۇتىناتىن تاۋارلار شىعاراتىن جەڭىل ونەركاسىپ سالاسىن جەدەل جاڭعىرتىپ, وركەندەتۋ كەرەك. سوندا مىڭداعان ادام جۇمىس ورىندارى اشىلار ەدى, وسى سالادا باسەكەگە قابىلەتتى وتاندىق تاۋارلار كەڭىنەن ءوندىرىلىپ, ەل ىشىندە جانە سىرتتا سۇرانىسقا يە بولاتىنداي جاعدايلاردى قاراستىرۋدى ۇكىمەت نازارىنا ۇسىنار ەدىك. الماتى تەحنولوگيالىق ۋنيۆەرسيتەتى بۇل ىسكە بەلسەنە ارالاسۋعا دايىن, بۇل ءۇشىن عىلىمي ءبىلىم جانە ماتەريالدىق-تەحنيكالىق تۇرعىدان قاجەتتى بازامىز بار. 65 جىلدان استام ۋاقىتتان بەرى جەڭىل جانە تاماق ونەركاسىبى ءۇشىن دايارلانىپ كەلە جاتقان ماماندار ساپاسىن دا, سانىن دا ارتتىرۋ – ۋنيۆەرسيتەت ۇجىمى ءۇشىن ابىرويلى مىندەت.
تالعات قۇلاجانوۆ,
الماتى تەحنولوگيالىق ۋنيۆەرسيتەتىنىڭ رەكتورى, اكادەميك
