تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, «قازاقتەلەكوم» اق جانە ۇيالى بايلانىس وپەراتورلارىنىڭ وكىلدەرى ەلىمىزدە ۇيالى بايلانىستىڭ قولجەتىمدىلىگى مەن ساپاسىنا قاتىستى ماسەلەلەردى تالقىلاۋ بارىسىندا وسىنداي دەرەكتەردى كەلتىردى. قازىرگى ۋاقىتتا بايلانىس وپەراتورلارىنىڭ جۇمىسى قوسىمشا قۇرىلعىلار ورناتۋعا جانە قازىرگى جابدىقتاردى جاڭعىرتۋعا, سونداي-اق وڭىرلەردە ۇيالى بايلانىستى دامىتۋعا باعىتتالعان.
تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسحات ورازبەكتىڭ ايتۋىنشا, استانادا قوسىمشا قۇرىلعىلار ورناتۋدى قاجەت ەتەتىن 600-دەن اسا ورىن بار. ونىڭ 39-ى بويىنشا ماسەلە شەشىلدى. ءتيىستى جۇمىستار وڭىرلەردە دە جۇرگىزىلىپ جاتىر. بۇدان باسقا, سالالىق ۆەدومستۆو اكىمدىكتەرمەن, ۇيالى وپەراتورلارمەن بىرلەسىپ جول كارتاسىنا قول قويادى. الداعى بەس جىلدا 5G جەلىسى بويىنشا 3 مىڭنان اسا بازالىق ستانسا قۇرىلۋعا ءتيىس. بۇل – 5G بويىنشا وتكىزىلگەن اۋكتسيونداردىڭ ناتيجەسى.
– بيىل ءبىز رەسپۋبليكانىڭ ءۇش قالاسىندا 5G جەلىسىن قۇرامىز. قازىرگى كەزدە 200-دەن اسا بازالىق ستانسا استانا, الماتى, شىمكەنت, تۇركىستان جانە تاعى باسقا قالالاردا قۇرىلعان, – دەدى «كسەلل» اق باسقارما توراعاسى اسحات وزبەكوۆ.
«Beeline قازاقستاننىڭ» باس اتقارۋشى ديرەكتورى ەۆگەني ناسترادين 250 جانە ودان ارتىق حالقى بار ەلدى مەكەندەردىڭ بارلىعىندا كەلەسى جىلدىڭ سوڭىنا دەيىن ءۇش ۇيالى بايلانىس وپەراتورى بولاتىنىن جانە كليەنتتەر ءوز تاڭداۋىن جاسايتىنىن جەتكىزدى. ء«بىز 6 وبلىسپەن 250-دەن از ادام تۇراتىن ەلدى مەكەندەرگە ءموبيلدى ينتەرنەتتى قالاي تارتۋعا بولاتىنى تۋرالى جول كارتاسىنا قول قويدىق. بۇل قيىن, ارينە. دەگەنمەن مەملەكەتتىك باعدارلامالار ءبىزدى جاقسى ىنتالاندىرىپ وتىر», دەدى ول.
سونىمەن قاتار ول بىلتىر كومپانيا تۇرعىنداردىڭ كەلىسپەۋشىلىگىنە بايلانىستى ۇيلەر مەن عيماراتتاردىڭ شاتىرلارىنان 300 بازالىق ستانسانى بولشەكتەۋگە ءماجبۇر بولعانىن دا ايتتى.
«موبايل تەلەكوم-سەرۆيس (Tele2/Altel)» كومپانياسى بىلتىر اۋكتسيوندا جەڭىسكە جەتىپ, 5G تەحنولوگياسىن ورناتۋعا مۇمكىندىك الدى. ءبىرىنشى كەزەكتە بۇل ءوسىپ كەلە جاتقان ترافيكتى ءتيىمدى وڭدەۋگە جول اشپاق. «ادامداردا ترافيكتىڭ ساپاسىنا قاتىستى پروبلەمالار بولماس ءۇشىن جاڭا تەحنولوگيالاردى ەنگىزۋ قاجەت. بۇل تۇرعىدا ەڭ الەۋەتتىسى – 5G. بۇگىنگى تاڭدا 5G جەلىلەرىن پايدالانا الاتىن كليەنتتەر سانى شامامەن 15 پايىزدى قۇرايدى. بۇل كورسەتكىش اي سايىن وسەدى», دەيدى «موبايل تەلەكوم-سەرۆيس (Tele2/Altel)» باس ديرەكتورى سەرگەي كونكوۆ.
ءوز كەزەگىندە «كسەلل» اق باسقارما توراعاسى اسحات وزبەكوۆ مەملەكەت تاراپىنان رۇقسات بەرۋ راسىمدەرىن جەڭىلدەتۋ, ال قوعام تاراپىنان ءموبيلدى بايلانىستى ءبىرىنشى قاجەتتىلىك قۇرالى رەتىندە ءتۇسىنىپ, قابىلداۋ بويىنشا قولداۋدىڭ بولعانى ماڭىزدى ەكەنىن اتاپ ءوتتى.
تەلەكوممۋنيكاتسيا يندۋسترياسىنىڭ وكىلدەرى عيماراتتاردى جاڭا ينفراقۇرىلىممەن جابدىقتاۋ قالالاردىڭ ينفراقۇرىلىمدىق كودىنا اينالۋعا ءتيىس دەپ سانايدى. «قازاقتەلەكوم» اق يننوۆاتسيالار جونىندەگى باس ديرەكتورى نۇرلان مەيىرمانوۆ كومپانيانىڭ بۇگىندە 1 700 مىڭ ابونەنتكە قىزمەت كورسەتەتىنىن اتاپ ءوتتى. ونىڭ ايتۋىنشا, وپتيكالىق جەلىدە 1 ابونەنت سەكۋندىنا شامامەن 3,7 تب تۇتىنادى. ياعني ءبىر كليەنتتىڭ ترافيگى ايىنا 300 گب-تان اسادى. ەۋروپادا بۇل كورسەتكىش شامامەن 270 گب-تى, اقش-تا 580 گب-تى قۇرايدى. جالپى, ەلىمىزدە تۇتىنۋ نورمالارى وتە جوعارى. كومپانيا جاڭا جەلىلەردى, اتاپ ايتقاندا, ۇيالى بايلانىستى دامىتۋ ۇستىندە. «جيىلىك سىزىعىمەن جوعارى قوزعالىس, ياعني ميلليمەترلىك دياپازونعا كوشۋ ۇيالى بايلانىس وپەراتورلارىن ءۇي-جايلارعا كوشۋگە ءماجبۇر ەتەتىنىن ءتۇسىنۋ كەرەك. ال بۇل اۋقىمدى جۇمىس», دەيدى ول.
ونىڭ پىكىرىنشە, رەتتەۋشىنىڭ عانا ەمەس, باسقا دا مەملەكەتتىك ورگانداردىڭ كۇش-جىگەرى قاجەت. «ولار دا اتسالىسىپ, ستاندارتتار مەن نورمالاردى قايتا قاراسا دۇرىس بولادى. تيىسىنشە, بارلىق جاڭا عيمارات, قۇرىلىس جاڭا ينفراقۇرىلىممەن جابدىقتالۋعا ءتيىس. بۇل قالالاردىڭ ينفراقۇرىلىمدىق كودىنا اينالۋى كەرەك», دەدى ن.مەيىرمانوۆ.
ۆيتسە-مينيستر اسحات ورازبەكتىڭ ايتۋىنشا, ۆەدومستۆو بيزنەس جانە اكىمشىلىك عيماراتتار يەلەرىنىڭ ۇيالى بايلانىس وپەراتورلارىنا كىرىپ, جابدىقتاردى ورناتۋعا, سونداي-اق وسىنداي عيماراتتاردىڭ ىشىندە ساپالى بايلانىسى بار سىمسىز جەلىلەردى تارتۋعا مۇمكىندىك بەرۋ مىندەتىن زاڭنامالىق تۇرعىدان بەكىتۋگە باستاماشىلىق جاسايدى.
– مامىر ايىندا «تۇرعىن ءۇي قاتىناستارى تۋرالى» زاڭعا تۇزەتۋلەر ەنگىزىلدى. وعان سايكەس بازالىق ستانسالاردى ورناتۋ ءۇشىن تۇرعىنداردىڭ 50 پايىزى قولداۋعا ءتيىس. بۇعان دەيىن تۇرعىنداردىڭ 70 پايىزىنىڭ كەلىسىمى قاجەت بولاتىن. سونداي-اق ءبىز تەلەكوممۋنيكاتسيالىق جابدىق ورناتۋ تۋرالى شەشىم قابىلداۋدى ءۇيدىڭ كەڭەسىنە تاپسىرۋ بويىنشا قوسىمشا تۇزەتۋلەر ەنگىزدىك. بۇلار ءماجىلىستىڭ قاراۋىندا, – دەدى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى تەلەكوممۋنيكاتسيا كوميتەتىنىڭ توراعاسى ەرجان مەيراموۆ.
مينيسترلىك 5G جەلىسىن ساتۋ اۋكتسيونىنىڭ ناتيجەسىندە جاڭا وپەراتور پايدا بولۋى مۇمكىن ەكەنىن دە مالىمدەدى. كوميتەت توراعاسىنىڭ ايتۋىنشا, ۆەدومستۆونىڭ جالپى رەتتەۋشى رەتىندەگى باستى ماقساتى – باسەكەلەستىك ورناتۋ جانە ونى ودان ءارى دامىتۋ. «وسىعان بايلانىستى ەكى ماسەلەنى ايتىپ كەتكەن ءجون. بىرىنشىدەن, ۇكىمەتتىڭ «قازاقتەلەكومنىڭ» ىشىنەن ەكى ءموبيلدى وپەراتوردىڭ بىرەۋىن شىعارۋ تۋرالى ناقتى تاپسىرماسى بار. قازىرگى تاڭدا ينۆەستورلارمەن جۇمىستار جالعاسىپ جاتىر», دەدى ە.مەيراموۆ.
سونىمەن قاتار جىل سوڭىنا دەيىن وسى 5G جەلىسىن ساتۋ ماقساتىندا تاعى دا اۋكتسيون ۇيىمداستىرۋ جوسپارلانىپ وتىرعانىن, ەگەر سول جاقتا باسقا ءبىر ينۆەستور جەڭىپ السا, جاڭا ءبىر بايلانىس وپەراتورىنىڭ پايدا بولۋى ابدەن مۇمكىن ەكەنىن ايتتى.
