بۇگىندە تالدىقورعاننىڭ ىرگەسىندەگى كوكتال اۋىلىندا ورنالاسقان شەبەرحانا ءوز جۇمىسىمەن كوپشىلىكتى قۋانتىپ كەلەدى. بىلتىر عانا اشىلعان شەبەرحانا از ۋاقىتتا جەتىسۋلىقتاردىڭ كوز قۋانىشىنا اينالىپ ۇلگەرگەن. تۇتىنۋشىلار ءۇشىن باعاسى دا ءتيىمدى, ال تاپسىرىس بەرگەن ادامنىڭ ەشبىرى وكىنگەن ەمەس. ءبارى مۇقيات تىگىلىپ, سۇرانىسقا ساي قىزمەت كورسەتەدى.
«شەبەرحانا اشۋ – انامىزدىڭ يدەياسى. انامىزدىڭ باستاۋىمەن ىسكە كىرىسكەنبىز. وتباسىلىق ءبىر ءىس باستاۋدى جوسپارلادىق جانە ول قازىر جەمىستى بولىپ جاتىر. باستاپقىدا تەك كورپەمەن اينالىسامىز دەگەن وي بولعان, ارتىنشا تىگۋ شەبەرحاناسىن اشتىق. قازىر قىز جاساۋى, ەسكى كورپەنى جاڭارتۋ, ءتور كورپەلەر, ماتراستار, بالالارعا ارنالعان كورپەلەر تىگۋمەن اينالىسامىز. بۇگىندە تەك تالدىقورعاننان ەمەس, جان-جاقتان تاپسىرىس كوپ تۇسەدى. انامىز جاقىندا باقيعا اتتاندى. انامىز باستاپ كەتكەن ءىستى مۇرا رەتىندە قاراپ, باعالاپ, جۇمىسىمىزدى ادال جانە تياناقتى جالعاستىرىپ كەلەمىز», دەيدى جاس شەبەر.
سالتاناتتىڭ انامىز دەپ وتىرعانى – ەنەسى الماگۇل وڭعارباەۆا. ءومىرىنىڭ سوڭعى جىلدارىندا وڭىردەگى «اتامەكەن» كاسىپكەرلەر پالاتاسىندا ادامي كاپيتالدى دامىتۋ ءبولىمىنىڭ باسشىسى بولعان. ال سالتانات كىشى ۇلى ادىلەتتىڭ جارى.
اتالعان شەبەرحانادا ءجۇن جۋ, ءجۇن تۇتەتىن, كورپە سىرۋ ماشيناسى, ماتراس تىگەتىن, كەسكىندەيتىن لازەر اپپاراتى جانە تىگىن ماشيناسى بار. بارلىق قۇرىلعىنى قىتايدان ارنايى تاپسىرىسپەن العان. جاھاندىق ىندەتتىڭ سالدارىنان كەيبىر تەحنيكالىق جابدىقتار كەشىگىپ جەتكەن ەكەن. جاقىن ارادا جاستىقتى قايتا وڭدەۋ ماشيناسىن الۋدى جوسپارلاپ وتىر. ال ماتالاردى الماتىدان الادى. تۇتىنۋشىلاردىڭ سۇراۋىمەن جانە جەكە شەبەرلەردىڭ تاجىريبەسىنە سۇيەنىپ ءارتۇرلى ساپاداعى ماتالارمەن جۇمىس ىستەيدى.
«كوكتەم مەن جاز ايلارىندا تاپسىرىس كۇرت وسەدى. توي-تومالاق كوپ, اسىرەسە جاڭادان وتاۋ قۇرعان جاستار ءتۇرلى نۇسقادا كورپە, جاستىق تىگۋىمىزدى سۇرايدى. دەگەنمەن شۇكىر, جۇمىسىمىز جىلدىڭ بارلىق مەزگىلىندە دە توقتاعان ەمەس. ۇيلەنۋ ماۋسىمى باسەڭدەگەن سوڭ كوبىنەسە كورپەلەردى قايتا وڭدەۋمەن اينالىسامىز. ەرىنبەسەڭىز ءىس كوپ, تەك سونىڭ جولىن تابا ءبىلۋ قاجەت», دەيدى س.زاۋرەنبەك.
شىنى كەرەك, ءبىزدى قىزىقتىرعان ەنە مەن كەلىن اراسىنداعى ىستىق بايلانىس. قازاقتىڭ ءداستۇرلى ۇعىمىندا ەنە – ۇلكەن مەكتەپ. مۇنى جاس كەلىن جاقسى باعامداعان. تىگىن شەبەرحاناسىن بىرلەسىپ اشۋ ارقىلى مارقۇم ەنەسىنەن كوپ ءىس ۇيرەنگەنىن جاسىرمايدى. ايتقان اقىلى, كورسەتكەن ونەگەسى جادىندا. يگىلىكتى ءىستى بۇگىندە ۇزبەي جالعاستىرىپ, ابىروي بيىگىندە وتىر. ءتىپتى كەلەشەكتە شەبەرحانانى كەڭەيتىپ, ودان ءارى دامىتۋعا كۇش سالماق.
«ەنەم انامداي بولىپ كەتكەن اقىلدى, پاراساتتى, ەڭبەكقور جان ەدى. شىنى كەرەك, وسىعان دەيىن تىگىن تىگۋ جاعىن بىلمەيتىنمىن, ەنەمنىڭ جانىندا ءجۇرىپ ۇيرەندىم. بۇگىندە بۇل ىسكە ۇلكەن ماحابباتپەن كىرىسەمىن. العا قويعان ماقساتىمىز كوپ. ساتىلىم اينالىمىن وسىرسەك, جۇمىس ورىندارىن كوبەيتسەك, ءوزىمىزدىڭ دۇكەنىمىزدى اشىپ, تازا ەكولوگيالىق تاۋارىمىزدى قازاقى ناقىشتا شەتەلدەرگە ەكسپورتتاپ, «ماقتا قىز» ونىمدەرىن برەندكە اينالدىرساق دەگەن ارمانىمىز بار. باستاعاندا ارمان ەدى, ارمانىمىز ماقساتقا اينالدى. الدا جۇمىس كوپ, تەك ەڭبەكتەنۋىمىز قاجەت», دەيدى كاسىپكەر كەلىن اعىنان جارىلىپ.
جاس كاسىپكەر مەملەكەتتىڭ شاعىن جانە ورتا بيزنەستى دامىتۋعا ارنالعان جوبالارى اياسىندا قۇرىلعىلارىمىزدى تومەنگى پايىزبەن نەسيەگە العان. قوسىمشا جۇمىسپەن قامتۋ ورتالىعى جۇمىسشىلاردى جالاقىمەن دەمەپ وتىرادى. بۇل تۇرعىدا مەملەكەتتىك جوبالارعا ءوز العىسىن ءبىلدىرىپ جاتىر. قازىر تاۋارلارعا بارىنشا جارناما جاساپ, باسقا وڭىرلەرگە دە ساتۋدى ويلاستىرىپ ءجۇر.
ءيا, قالاي بولعاندا دا ەرىنبەگەن ادام ەڭبەكپەن بيىككە شىعادى. جەتىسۋدا مۇنداي جاستار كوپ. ءتۇرلى سالادا ءوز باعىن سىناپ جاتقاندارعا وبلىس اكىمدىگى بارىنشا جاردەمدەسىپ كەلەدى. ماسەلەن, العاش رەت جاستاردىڭ باستامالارىن قولداۋ ماقساتىندا «تاۋەلسىزدىك ۇرپاقتارى» گرانتىنا بايقاۋ جاريالاندى. مادەنيەت, عىلىم, بيزنەس, مەديا جانە IT سالالارى بويىنشا 100-گە جۋىق جوبا قابىلدانىپ, سونىڭ ىشىندە 10 جوبا قولداۋ تاپتى. كۇنى كەشە «Jetisy jastary» ورتالىعىندا سول جالىندى جاستارعا قايتارىمسىز 3 ميلليون تەڭگەلىك سەرتيفيكات تابىستالدى. بۇل وڭىرگە سالتانات سەكىلدى ىسكەر تاعى دا 10 جاس كاسىپكەر قوسىلدى دەگەن ءسوز.
جەتىسۋ وبلىسى
