ءتورت مەكتەپ تۇلەكتەرى تۇگەل گرانتقا ءتۇستى

بيىلعى جاڭالىق ماڭعىستاۋ وبلىسىنداعى 4 مەكتەپتىڭ 11-سىنىپ وقۋشىلارىنىڭ تۇگەلدەي مەم­لە­كەتتىك گرانتقا قول جەتكىزۋى بولدى. اقتاۋ قالاسىنداعى فيزيكا­ماتەماتيكا پاندەرىن تەرەڭدەتىپ وقىتاتىن №11 ليتسەيدىڭ 11 «ا»­­ سىنى­بىنىڭ 23 وقۋشىسى ءبى­لىم گرانتىنا قول جەتكىزدى. سى­نىپ­­تاعى 19 تۇلەك ەلىمىزدىڭ ۋني­ۆەر­سي­تەتتەرىنە, قالعان 4 وقۋشى شە­تەل­­دىڭ جوعارى وقۋ ورىندارىنا گرانتقا وقۋعا ءتۇستى. سونداي-اق مۇنايلى اۋدانىنداعى №13 مەك­تەپ-گيمنازياسىنىڭ 13 تۇلەگى, قى­زىلتوبە ليتسەيىنىڭ 15 تۇلەگى, تۇپ­قا­راعان اۋدانىنداعى اقشۇقىر مەك­تەپ-ليتسەيى 11 «ا» سىنىبىنىڭ 14 وقۋ­شىسى مەملەكەتتىك گرانت­ يەگەرى اتاندى. اقشۇقىر مەك­تەپ-ليتسەيى – وڭىردەگى ايتۋلى ءبى­لىم وردالارىنىڭ ءبىرى. تۇلەگى تۇ­گەل ءبىلىم گرانتىن يەلەنگەن سىنىپ­تىڭ ەكى وقۋشىسى «التىن بەلگى» يەگەرى اتانسا, ءبىر وقۋشىسى «ۇزدىك اتەستاتتى» يەلەندى. وقۋ جىلىنىڭ قورىتىندىسى بويىنشا «جىل وقۋشىسى», «جىل ونەرتاپقىشى» جانە «جىل جاس عالىمى» اتالىم­دا­رىنىڭ جۇل­دەگەرلەرى دە وسى سىنىپتا. سىنىپ­تىڭ 91 پايىزى ۇبت-دان 100-دەن جوعارى ۇپاي جيناپ, جاقسى كورسەتكىش كورسەتتى. ەندى سىنىپتىڭ بارلىق وقۋشىسى 100 پايىز مەملەكەتتىك گرانت يەگەرى اتانىپ, سەنىمدى اقتادى.

– ۇلتتىق بىرىڭعاي تەستىلەۋ – وقۋ­شىنىڭ 11 جىل بويى العان ءبىلى­مىنىڭ ناتيجەسى, قورىتىندىسى. سون­دىقتان دا ءاربىر ءبىتىرۋشى تۇ­لەك­ ءۇشىن ۇبت-نىڭ ماڭىزى زور. ما­عان دا وزگە تۇلەكتەر سەكىل­دى قور­قىنىشتى ءارى قيىن كورىن­دى. مەك­تەپ تاريحىنداعى العاش­قى­ «ال­تىن بەلگىگە» ۇمىتكەر بول­عان­دىق­­تان جاۋاپكەرشىلىك ەسەلەي ءتۇستى. مەم­­لەكەتتىك ەمتيحاندى ەستەن شى­عار­ماي, كوڭىل ءبولىپ دايىندالۋ قاجەت ەدى. گرانتقا تۇسسەم دەگەن ارمان كەي­دە ۋايىم سىيلاعان كەزدەرى بول­دى. «ورىندى قارەكەت ورىنسىز ۋايىم-قايعىنى سەيىلتەدى» دەپ اباي اتامىز ايتقانداي, مەن دە قۇر­ ۋايىمداعاننان گورى ارەكەتكە كىرى­سەيىن دەپ دايىندىقتى باس­تاپ­­ كەتتىم. دايىندىقتى ەرتە باس­­تا­عاننىڭ ارتىقشىلىقتارى وتە كوپ. بىل­مەي­ جۇر­گەن تاقىرىپتارىڭدى ۇيرە­نە­سىڭ, ءتىپتى تاڭداعان ءپانىڭنىڭ كىرىس­پە­­سى­نەن باستاپ وقۋعا مۇم­كىن­دىك بار.­ دايىندىق اراسىندا ءتۇرلى سايىس­قا, وبلىستىق وليم­پياداعا قاتى­سىپ ۇلگەردىم. ويتكەنى باس كوتەر­مەي ۇبت-عا دايىن­دالا بەر­سەڭ قورقىنىشىڭ ەسەلەنە بەرەدى. سون­دىقتان كوڭىل كوتەرۋ ماق­سا­تىن­دا دەبات تۋرنيرلەرىنە, شە­شەن­دىك ونەر سايىستارىنا قا­تىس­تىم.­ جۋىردا ءبىز اسىعا كۇتكەن كون­كۋرستىڭ قورى­تىندىسى جا­­ريا­­­لان­دى. تىزىمنەن ءوز ەسىمىڭدى ىزدەپ وتىرعان كەزدەگى تولقۋ, قوبال­جۋدى سوزبەن ايتىپ جەتكىزە المايمىن. شۇكىر, تىزىمنەن ءوز ەسىمىمدى تاپتىم. مەن مۇنى تىنىمسىز ەڭبەكتىڭ ناتيجەسى دەپ بىلەمىن. از-ازدان ۇزدىكسىز دا­يىن­دالىپ, قارىس قاداممەن ۇل­كەن ماق­سات­تارعا جول اشىلدى.­ ءبىر كەز­دە سى­نى­بىمىزدىڭ بارلىعى, ياعني 13 وقۋشى دا گرانتقا ءتۇستى دە­گەن ءسۇيىن­شى حابار كەلدى. بۇل, ءتىپ­تى قۋا­نىشىمىزدى ەسەلەپ جى­بەر­دى. اتا-انالارىمىزعا, سۇيىكتى ۇس­تاز­دا­­رىمىزعا العىس ايتامىن, – دەيدى مۇ­­نايلى اۋدانى №13 مەكتەپ-گيم­­نا­زياسىنىڭ تۇلەگى بازارباي بەكارىس.

بەكارىستىڭ قۋانىشتى ءسوزىن اناسى راۋشان اۆەزوۆا « ۇلىم كەشە عانا مەكتەپ تابالدىرىعىن اتتاپ ەدى, مىنە ەندى ۇلكەن ومىرگە قا­دام باسقالى وتىر» دەپ جالعادى. «اللا­عا شۇكىر مەكتەپتەگى ەمتيحان­دا­­رىن جاقسى تاپسىرىپ, ۇبت-دان دا­ ويداعىداي ۇپاي جيناپ, جو­عا­رى وقۋ­ ورىندارىنا كونكۋرسقا قاتىس­تىق.­ كۇنى-ءتۇنى تىلەپ, بالام ءوز ويىن­­داعى ارمانداعان جوعارى وقۋ ور­نىنا تۇسسە ەكەن دەپ دۇعا جاساپ ءجۇر­دىم. بالامنىڭ «گرانتقا ءتۇستىم» دەگەن قۋانىشتى حابارىن ەستىگەندە قۋان­عاننان جىلاپ جىبەردىم. بۇل – قۋانىشتىڭ كوز جاسى. بالام ءوزى ارمانداعان جوعارى وقۋ ورنى­نا­ ءتۇستى, بالا كۇنىنەن جاق­سى­ كورەتىن ماتەماتيكا ءپانىنىڭ مۇ­عا­لى­مى بولماق. 11 جىل بويى ءبىلىم نارى­مەن سۋسىنداتىپ, ءتالىم-تاربيە بەر­گەن ۇستازدارىنا مىڭ العىس», دەي­دى ول.

ماڭعىستاۋدا تۇلەكتەر مەن اتا-انالار, ۇستازدار قۋانىپ, حا­لىق­ ءسۇيسىنىپ جاتىر. ءبىر ەمەس بىر­نەشە سىنىپ تۇلەكتەرىنىڭ تۇ­تاس­تاي مەملەكەتتىك گرانتقا قول جەت­كىزۋى – توسىن جاڭالىق. بۇل – ماڭ­عىس­تاۋ­لىق ۇستازدار ەڭبەگىنىڭ ناتي­جەسى. ۇستازىنىڭ سەنىمىن اقتا­عان تۇلەك­تەر ءۇشىن, تۇلەگىنىڭ تو­ما­عا­سىن سى­پى­رىپ بيىككە ۇشىرعان ۇستازدار ءۇشىن قۋاندىق.

ماڭعىستاۋ وبلىسى