جاقىندا «اقجايىق» پەن «جەڭىس» كوماندالارى اراسىندا بولعان ويىننان سوڭ ستاديون ءىشى ادەتتەگىدەي گازەت بەتتەرى مەن سۋسىن قۇتىلارىنا تولىپ قالدى. بۇل كوپشىلىكتىڭ كوزى ۇيرەنىپ تە كەتكەن كورىنىس قوي. بىراق ويىن اياقتالىسىمەن قارشاداي بالا قالتاسىنان ارنايى الا كەلگەن پوليەتيلەن قاپشىعىن شىعارىپ, اينالاسىن تازالاي باستاعان.
باستاماشىل بالاقايدىڭ ەسىمى ءاليحان ەكەن. ءوزى 10 جاستا, «جايىق جاستارى» كومانداسىندا جاتتىعىپ جۇرگەن جاس فۋتبولشى بولىپ شىقتى.
– مەن جالعىز ەمەسپىن, جانىمدا مانسۇر, نۇرتاس جانە ءنادىر دەگەن دوستارىم بار. ءبارىمىز كەلىسىپ جاسادىق. ولار جينالعان قوقىستى جاشىككە سالۋعا الىپ كەتتى, – دەدى ءاليحان.
«اقجايىق» كومانداسى مەن ءوڭىردىڭ سپورت سالاسى باسشىلارى ءاليحان مەن دوستارىنا ورالدا وتەتىن كەلەسى ماتچ كەزىندە سىيلىق جاساۋدى جوسپارلاپ وتىر.
باتىس قازاقستان وبلىسى
