«جىل باستالعالى وبلىس اۋماعىنداعى سۋ ايدىندارىندا 26 ادام قازا بولدى, ولاردىڭ 19-ى – ەرەسەك, جەتەۋى – بالا. بۇل وقيعالاردىڭ دەنى قاۋىپسىزدىك ەرەجەلەرىن ورەسكەل بۇزۋدان بولىپ وتىر», دەيدى وبلىستىق تجد ازاماتتىق قورعانىس باسقارماسى باستىعىنىڭ مىندەتىن اتقارۋشى جاندوس جۇگىنىسوۆ.
قاپەرسىزدىك دەگەننەن شىعادى, وقىس وقيعا قۇربانى قاتارىنداعى ءبىر بالا ەسىك الدىنداعى ارىققا ءتۇسىپ كەتسە, تاعى ءبىرى سەپتيككە قۇلاپ كەتكەن, ارينە, «جازىم بولسا, بىلامىققا دا ءتىس سىناتىنى» انىق. سوندا دا ويناپ جۇرگەن بالاعا باقىلاۋ جاساساق, مۇنداي جاعداي ازايار ەدى.
دەپارتامەنت باستىعىنىڭ بۇيرىعىنا سايكەس وبلىستىق پوليتسيا دەپارتامەنتى, ۇلتتىق ۇلاننىڭ 5547 اسكەري ءبولىمى, جەرگىلىكتى اتقارۋشى ورگان, «قىزىلوردا ەرىكتىلەرى» قوعامدىق قورى وكىلدەرى بىرلەسىپ, وبلىس اۋماعىنداعى سۋ ايدىندارىندا كۇندەلىكتى رەيد جۇرگىزەدى. وسىعان دەيىن 517 رەيد وتكىزىلىپ, 36 مىڭنان استام ادامعا سۋداعى قاۋىپسىزدىك ەرەجەلەرى بويىنشا تۇسىندىرمە جۇمىستارى جۇرگىزىلىپ, ۇنپاراقتار تاراتىلىپتى.
سىرداريانىڭ وبلىس اۋماعىمەن وتەتىن بولىگىنىڭ ۇزىندىعى ؘ– 1 274 شاقىرىم. بۇعان 19 ءىرى, 220 شاعىن كانال جانە 201 كولدى قوسىڭىز. بيىلعى جازعى سۋعا شومىلۋ ماۋسىمىنا جەدەل قۇتقارۋ جاساعىنىڭ ءجۇزۋ قۇرالدارى, سۇڭگۋىر جاراقتارى مەن جابدىقتارى 27 ءساۋىر كۇنى دايىندىققا كەلتىرىلدى. جاساقتا 69 قۇتقارۋشى, 19 اۆتوكولىك, 23 ءجۇزۋ قۇرالى, 34 سۇڭگۋىر جاراعى بار. ارناۋلى اۆتوكولىكتەر قاجەتتى قۇتقارۋ قۇرال-جابدىقتارمەن تولىق جاراقتاندىرىلعان. ال وقىس جاعدايدى تالداعان ماماندار كوپ وقيعانىڭ سەبەبى – قاۋىپسىزدىك ەرەجەلەرىن ورەسكەل بۇزۋ ەكەندىگىن ايتادى.
ارينە, اسپان اينالىپ جەرگە تۇسەردەي ىستىقتا ويىن بالاسى تىيىمىڭدى تىڭدامايتىنى راس. جىل ون ەكى اي بالالار اراسىندا كەزدەسۋ وتكىزەتىن توتەنشەلىكتەر جىل باسىنان بەرى 115 740 وقۋشىنىڭ قاتىسۋىمەن «سۋداعى قاۋىپسىزدىك ەرەجەلەرى», «سۋدا زارداپ شەگۋشىلەردى قۇتقارۋ, العاشقى دارىگەرگە دەيىنگى مەديتسينالىق كومەك كورسەتۋ تاسىلدەرى» تاقىرىپتارى بويىنشا 212 ينتەراكتيۆتى ساباق وتكىزگەن.
«وبلىس سۋ ايدىندارىنداعى 63 قاۋىپتى ايماققا 310 ەسكەرتۋ تاقتايشاسى قويىلىپ, 68 بيلبورد ورناتىلدى. وبلىستىق پوليتسيا دەپارتامەنتىمەن بىرلەسىپ, سۋعا شومىلۋ ماۋسىمى كەزەڭىندە «اكىمشىلىك قۇقىق بۇزۋشىلىق تۋرالى» كودەكستىڭ 364-بابىنا سايكەس 93 ادامعا ەسكەرتۋ بەرىلىپ, 412-باپ بويىنشا ءبىر تۇرعىنعا ايىپپۇل سالىندى جانە وسى كودەكستىڭ 440-بابى بويىنشا 2625 ازاماتقا اكىمشىلىك شارا قولدانىلدى», دەيدى جاندوس شايىم ۇلى.
جالپى, وزەندەر مەن سۋ ايدىنىنداعى سۋعا كەتۋ جاعدايلارى ابدەن سارالانىپ بارىپ, ونداعى قاۋىپتى اۋماقتار بەلگىلەنەدى. وسى كۇنى 63-كە جەتىپ وتىرعان وسىنداي ورىن قاتارى تاعى ارتۋى مۇمكىن.
بيىلعى جاڭالىق, وبلىس اكىمىنىڭ قاۋلىسىنا سايكەس شيەلى اۋدانىندا اقوردا, سىرداريا اۋدانىندا قالعانداريا, قارماقشى اۋدانىندا مۇراتباەۆ جانە قازالى اۋدانىندا قاشقان سۋ اۋماقتارى كوممۋنالدى جاعاجاي بولىپ اشىلدى. ال 300 مىڭعا جۋىق تۇرعىنى بار وبلىس ورتالىعىندا ماۋسىم بويىنا 2-اق جاعاجاي جۇمىس ىستەيدى. قىزىلوردادا سۋعا تۇسەتىن اۋماقتاردى كوبەيتۋ, كوممۋنالدىق جاعاجاي اشۋ جونىندە ايتىلىپ جۇرگەلى ءبىراز جىل بولدى. بۇل باعىتتا ءتيىستى ورىندارعا ءتۇرلى ۇسىنىس تا بەرىلگەن. بىراق ازىرگە ايتىلعان ءسوزدىڭ ىسكە اينالۋى قيىن بولىپ تۇر. كەلەر جىلى قالانىڭ ءدال ىرگەسىندەگى ەدەلۆەيس ساياجايىنداعى كول وسىنداي جاعاجايعا اينالۋى مۇمكىن دەگەن ءۇمىت بار.
قىزىلوردا
