مەكتەپ فورماسىنا قارجى ءبولىندى

– ەل ۇكىمەتىنىڭ مەم­لە­كەت­تىك ءبىلىم بەرۋ ۇيىمدارىنىڭ مەم­­لە­كەت­تىك اتاۋلى الەۋمەتتىك كومەك الۋعا قۇقىعى بار وتباسى­لاردان, سونداي-اق مەملە­كەت­تىك اتاۋلى الەۋمەتتىك كو­­مەك المايتىن, جان­ باسىنا شاققانداعى تابىسى ەڭ تو­­مەنگى كۇنكورىس دەڭگەيىنىڭ شا­­ماسىنان تومەن وتباسىلاردان شىققان ءبىلىم الۋشىلارى مەن تاربيەلەنۋشىلەرىنە جانە جەتىم بالالارعا, اتا-اناسىنىڭ قام­قورلىعىنسىز قالىپ, وتبا­سى­لاردا تۇراتىن بالالارعا, تو­تەن­شە جاعدايلاردىڭ سالدارىنان شۇعىل جاردەمدى تالاپ ەتەتىن وتباسىلاردان شىق­­­قان بالالارعا جانە وزگە دە سانات­تاعى ءبىلىم الۋشىلار مەن تاربيەلەنۋشىلەرگە قار­جى­لاي جانە ماتەريالدىق كو­مەك كورسەتۋگە بولىنەتىن قارا­جات­تى قالىپتاستىرۋ, جۇمساۋ باعى­تى مەن ولاردى ەسەپكە الۋ قاعيدالارىن بەكىتۋ تۋرالى قاۋلىسىنا سايكەس, 2023 جىلعا الەۋمەتتىك قورعالماعان و­تبا­سى­­لاردان شىققان 52 305 وقۋ­شىنى مەكتەپ فورماسى­مەن جانە كەڭسە كەرەك-جاراق­تارىمەن قامتاماسىز ەتۋ ءۇشىن 2,1 ملرد تەڭگە بولىنگەن. ءار بالاعا 40 567 تەڭگەدەن كەلەدى. بۇگىنگى تاڭدا 1 178 وقۋشىنىڭ اتا-اناسىنىڭ جەكە ەسەپ شوتىنا ءار بالاعا 40 567 تەڭگەدەن قاراجات اۋدا­رىلدى. قالعان 51 127 وقۋ­شى­نىڭ اتا-اناسىنىڭ جەكە ەسەپ شوتىنا تامىز ايىنىڭ 15-نە دەيىن قاراجات اۋدارىلاتىن بولادى, – دەدى الماتى وبلىستىق ءبىلىم باسقارماسىنىڭ باسشىسى س.بەسپاەۆا.

بالالاردى مەكتەپ فورماسىمەن جانە وقۋعا قاجەتتى كەڭسە تاۋارلارىمەن تولىق قام­تا­ما­سىز ەتۋ ماقساتىندا وسى جىلعى تا­مىزدىڭ 12-ءى كۇنى ەسىك قا­لا­سىندا, 19 تامىزدا تالعار قا­لا­­­سىندا وتاندىق تاۋار ون­دىرۋ­­­شىلەردىڭ قاتىسۋىمەن مەكتەپ جارمەڭكەلەرى ۇيىم­داس­تى­رى­لادى.

– جاڭا وقۋ جىلىندا 7 بالام تالعار قالاسىنداعى اباي اتىنداعى №3 ورتا مەكتەپكە بارادى. ونىڭ بارلىعىن كە­رەك-جاراقپەن قامتاماسىز ەتۋگە شامامىزدىڭ كەلمەسى انىق. سول سەبەپتى ۇكىمەتتىڭ جانە قا­يى­رىم­دى ازاماتتاردىڭ كومەگىنە جۇگىنۋگە تۋرا كەلەدى. ويتكەنى باعا شارىقتاپ تۇر. اياقكيىم باعاسى 20 مىڭ تەڭ­گەدەن جوعارى بولماسا, تومەن ەمەس. ساناپ بەرەتىن قالام-داپتەردىڭ دە ءبىر توق­سانعا جەتكىلىكسىز. بىل­تىر بيۋدجەتتەن ءار بالاعا 37 مىڭ تەڭگەدەن بولىنگەن. ونى سا­باق­قا كىرۋگە ءبىر كۇن قالعاندا قو­لىمىزعا ال­عان­بىز. بيىلعا قۇجات وتكىزدىك, تامىزدىڭ 15-ىنە دەيىن تۇسەدى دەپ ۋادە بەردى. بۇعان دا شۇكىرشىلىك ەتەمىز, – دەگەن 12 بالانىڭ اناسى گۇلناز وتىنبەكوۆانىڭ مەكتەپ جاسىنداعى جەتى بالاسىنىڭ ۇلكەنى 11-سىنىپقا بارسا, ۇي­دەگى ونىنشى بالا, ياعني 7 جاسار ءامينا 1-سىنىپتىڭ تابال­دى­رى­عىن اتتايدى.

جالپى, جاڭا وقۋ جىلىندا الماتى وبلىسى بويىنشا 1-سىنىپقا 38 700 بالدىرعاندى مەكتەپكە قابىلداۋ جوسپارلانىپ وتىر. بىلتىر 37 015 بالا مەكتەپ تابالدىرىعىن العاش اتتاعان بولاتىن.