اتباسار اۋدانىنداعى قاشقار وزەنىنىڭ جاعاسىن جايلاعان قانشاما اۋىلدىڭ بىرنەشە جىلدان بەرى كورگەن كۇنى – وسى. بۇل ماسەلە بيىل عانا تۋىنداپ, بۇگىن عانا ايتىلىپ وتىرعان جوق. قاشقار وزەنىنىڭ ۇستىنە سالىنعان, بۇل كۇندە قيامەتتىڭ قىلكوپىرى ءتارىزدى بولىپ تۇرعان كوپىر ەسەنگەلدى, نوۆومارينوۆكا, سەپە, سوچينسكوە اۋىلدارىنا ورتاق. وسى ەلدى مەكەندەردىڭ تۇرعىندارى جالعىز كوپىر ارقىلى قاتىنايدى. وبلىستىق ماڭىزعا يە اتباسار-سوچينسكوە تاسجولىن جالعاپ جاتقان كوپىر قاۋساعالى – بەس-التى جىل. سودان بەرى ءتورت اۋىلدىڭ تۇرعىندارى جىل سايىن كوكتەمدە اساۋ وزەننەن وتە الماي, ابىگەرگە تۇسۋدە. ادام ايتقىسىز قيىنشىلىق وسى كەزدە تۋىندايدى. اۋىل تۇرعىندارى قارعا ادىم جەر ۇزاپ شىعا المايدى. ازىق-ت ۇلىگى تاۋسىلىپ, ءدارى-دارمەك جەتكىزۋدىڭ ءوزى قيىن. مەكتەپ وقۋشىلارى اۋدان ورتالىعىندا وتەتىن ءبىلىم سايىسىنا قالت-قۇلت ەتكەن قايىقپەن قاتىنايدى ەكەن. ولار وزەننەن ءوتىپ بولعانشا اتا-انالارى جاعالاۋدا جانىن شۇبەرەككە ءتۇيىپ, يمانى قاسىم بولىپ تۇرادى. تىرشىلىككە قاجەتتى ءبىرىنشى كەزەكتەگى تاۋارلاردى توتەنشە جاعداي قىزمەتى قايىقپەن تاسىپ الەك.
قارجىنىڭ جوقتىعىنان ەمەس, ۇزىن-ىرعاسى 200 مەترگە جۋىق كوپىرگە 600 ملن تەڭگە قاراجات بولىنگەن. قارجى بولىنگەلى بىرنەشە جىل وتسە دە, كوپىردىڭ بىتەتىن ءتۇرى كورىنبەيدى. اۋدان اكىمدىگى جول وبلىستىق ماڭىزداعى بولعان سوڭ ءبىزدىڭ ەش قاتىسىمىز جوق دەپ ات-تونىن الا قاشىپ وتىر.
– تاسجول وبلىستىق ماڭىزعا يە. ونداعى كوپىردىڭ تاعدىرى دا وبلىستىق جولاۋشىلار كولىگى جانە اۆتوموبيل جولدارى باسقارماسىنا بايلانىستى, – دەيدى اۋدان اكىمىنىڭ ءباسپاسوز حاتشىسى ميحايل مايەر.
باسقارمانىڭ بەرگەن مالىمەتىنە قاراعاندا, اتباسار-سوچينسكوە تاسجولىنىڭ 19-ىنشى شاقىرىمىنداعى كوپىر قۇرىلىسى 2021 جىلى باستالعان ەكەن. العاشقى مەجە بويىنشا الدەقاشان اياقتالۋعا ءتيىستى ەدى. باستاپقى جوبا بويىنشا قۇرىلىس جۇمىسىنىڭ قۇنى 600 ملن تەڭگە دەپ ەسەپتەلسە كەرەك. بىراق بۇل جوبا 2018 جىلى جاسالعان. قۇرىلىس ارادا ءۇش جىل وتكەن سوڭ بارىپ باستالعان. وعان شەيىن قاجەتتى ماتەريالداردىڭ قۇنى كۇرت قىمباتتاپ كەتكەن. ماسەلەن, وسى ۋاقىت ارالىعىندا مەتالل قۇرىلعىلارىنىڭ قۇنى 107 پايىزعا دەيىن وسكەن. ءسال عانا تاراتىپ ايتساق, سول كەزدە مەتالدىڭ ءار تونناسى سول ۋاقىتتا 212 462 مىڭ تەڭگە بولسا, قازىرگى نارىقتاعى باعاسى – 465 مىڭ تەڭگە شاماسىندا. دەمەك, جوبا تۇزەتىلۋى كەرەك. وسى ارادا ءبىر ايتا كەتەر بازىنا بار. ەگەر وسى جۇمىس ۋاقىتىندا, تىڭعىلىقتى اتقارىلىپ, جۇزەگە اسىرىلعاندا بيۋدجەتتىڭ قىرۋار قارجىسى شىعىن بولمايتىن ەدى.
باسقارما باسشىسى ۆلاديمير كۋلاكوۆتىڭ ايتۋىنا قاراعاندا, كوپىر قۇرىلىسىن اياقتاۋ 2004 جىلعا جوسپارلانۋدا. ءالى دە ساراپتاما جاسالادى. جاڭا باعا بەلگىلەنەدى.
ءبىر كوپىردىڭ جىرى قانشاما جىل بويى سوزىلىپ كەلەدى. «جانى اشىماستىڭ جانىندا باسىڭ اۋىرماسىن» دەگەندەي, تاعى دا كوكتەم كەلىپ, سۋ تاسىماي ما؟ قاشقار وزەنىنىڭ بويىنداعى قالىڭ ەل وتكەل ىزدەپ وكپەلەيتىن بولدى-اۋ.
اقمولا وبلىسى,
اتباسار اۋدانى
