تانكيستەر سالماعى الدەنەشە توننانى قۇرايتىن شىنجىرلى ماشينامەن سۋ كەدەرگىلەرىنەن كىدىرمەي ءوتۋ الگوريتمىن ۇيرەنىپ جاتىر. سۋ ىشىندە قوزعالۋ ءۇشىن تانكتەر جاۋىنگەرلىك ماشيناعا اۋا بەرەتىن ارنايى جابدىقتارمەن قامتىلعان.
تانكپەن سۋعا تۇسەر الدىندا ليۋكتەر ارنايى سۋ وتكىزبەيتىن جابدىقتارمەن تىعىزدالىپ جابىلادى. وقپاننىڭ اۋزىنا دا ءوزىنىڭ قاقپاعى كيگىزىلەدى. ساڭىلاۋلار مەن تەسىكتەر ارنايى سۋ وتكىزبەيتىن مايلاعىشپەن وڭدەلەدى. ديزاين ەرەكشەلىكتەرىنە بايلانىستى ت-72 تانكى سۋ استىندا بەس مەتر تەرەڭدىكتە ءبىر شاقىرىم قاشىقتىقتى ءجۇرىپ وتۋگە قابىلەتتى.
– ەكيپاجدار جەڭىل سۇڭگۋىرلىك دايىندىق كۋرسىنان ءوتتى. ولار وسىلايشا توتەنشە جاعدايدا دۇرىس جانە سەنىمدى ارەكەت ەتۋگە داعدىلاندى. تانك سۋعا باتقان جاعدايدا ەكيپاج ەكى ساعاتقا دەيىن اۋا قورى بار يپ-5 وقشاۋلاعىش تىنىس الۋ قۇرىلعىلارىن جانە قۇتقارۋ كەۋدەشەلەرىن پايدالانادى. ءبىزدىڭ تانكيستەر جاز بويى ماشينانى سۋ ىشىندە جۇرگىزۋدىڭ تاجىريبەلىك داعدىلارىن جەتىلدىردى, – دەيدى 12740 اسكەري ءبولىمىنىڭ كومانديرى, پودپولكوۆنيك داۋلەت سەكەنوۆ.
جۇرگىزۋشى مەحانيك ءۇشىن كولىكتى سۋ ىشىندە ايداۋ وڭاي جۇمىس ەمەس. تانك ازيمۋت كورسەتكىشىنىڭ نۇسقاۋى بويىنشا جاي مانەۆرمەن ءجۇرۋى كەرەك. بۇل جاعدايدا جۇرگىزۋشى مەحانيك سۋ استىندا توقتاپ قالماس ءۇشىن قوزعالتقىشتىڭ اينالۋ جىلدامدىعىنىڭ تۇراقتىلىعىن باقىلاۋى ماڭىزدى.
قۇتقارۋ-كوشىرۋ قۇرالدارىنىڭ ەكيپاجدارى جەكە قۇرامنىڭ قاۋىپسىزدىگىن قامتاماسىز ەتىپ, سۋداعى تانكتى ءجىتى باقىلاپ وتىرادى. توسىن جاعدايدا ولار اسكەري قىزمەتشىلەر مەن جاۋىنگەرلىك ماشينانى قۇرلىققا ەۆاكۋاتسيالايدى.
