ءىس-شاراعا مەملەكەتتىك ورگانداردىڭ, رەسپۋبليكالىق ماڭىزى بار قالالار مەن وبلىستار اكىمدىكتەرىنىڭ, سونىمەن قاتار قوعامدىق ۇيىمداردىڭ وكىلدەرى قاتىستى. مەملەكەت باسشىسى قاسىم-جومارت توقاەۆ مامىر ايىندا وتكەن بۇكىلارميالىق كەڭەستە قورعانىس مينيسترلىگىنىڭ الدىنا مىندەتتەر قويىپ, جاستاردى تاربيەلەۋ ىسىندە اعا بۋىن ءتالىمىن پايدالانۋ قاجەتتىگىنە زەر سالىپ, 2030 جىلعا دەيىنگى اسكەري-پاتريوتتىق تاربيە تۇجىرىمداماسىن ازىرلەۋدى تاپسىرعان بولاتىن.
– ادامگەرشىلىك قاسيەتتەر جانە رۋحاني قۇندىلىقتار – ءبىزدىڭ جاس ۇرپاققا قاجەت دۇنيە. وسىعان بايلانىستى جاستارمەن جۇمىس ىستەۋدىڭ قولدانىستاعى قۇرالدارىن وزگەرتە وتىرىپ, پاتريوتتىق تاربيە بەرۋ تاسىلدەرىن ايتارلىقتاي تۇزەتۋ قاجەت, – دەگەن ءمينيستردىڭ ورىنباسارى سۇلتان كامالەتدينوۆ كەڭەسكە قاتىسۋشىلاردى قارۋلى كۇشتەردىڭ وڭ ءيميدجىن قالىپتاستىرۋعا جانە جاستاردىڭ اسكەري بورىشىن ورىنداۋعا ۋاجدەمەسىن ارتتىرۋعا باعىتتالعان قورعانىس مينيسترلىگىنىڭ اقپاراتتىق-ءتۇسىندىرۋ توبىنىڭ جۇمىسىنان حاباردار ەتتى. قورعانىس مينيسترلىگىنىڭ مالىمەتىنشە, ءبىرىنشى جارتىجىلدىقتا مۇنداي جۇمىسپەن قاراعاندى, اقمولا, سولتۇستىك قازاقستان, قوستاناي, پاۆلودار, قىزىلوردا, تۇركىستان وبلىستارى مەن شىمكەنت قالاسىندا 12 مىڭنان استام ادام قامتىلعان.
مينيستر ورىنباسارى قوستاناي, قىزىلوردا جانە اقمولا وبلىستارىنىڭ باسشىلىعىنا اتت جۇمىسى بارىسىندا ءىس-شارالاردى جوعارى دەڭگەيدە ۇيىمداستىرعانى ءۇشىن العىسىن ءبىلدىردى. سونىمەن قاتار قازاق ۇلتتىق اگرارلىق زەرتتەۋ ۋنيۆەرسيتەتى مەن ابىلقاس ساعىنوۆ اتىنداعى قاراعاندى تەحنيكالىق ۋنيۆەرسيتەتىنىڭ وسى باعىتتاعى وڭ تاجىريبەسىن اتاپ ءوتتى.
كەڭەستە ورتا وقۋ ورىندارىنداعى العاشقى اسكەري-تەحنيكالىق دايارلىقتىڭ ساپاسىنا, ولاردىڭ ماتەريالدىق-تەحنيكالىق بازاسىنىڭ جاي-كۇيىنە, العاشقى اسكەري دايارلىقپەن اينالىساتىن كادرلاردىڭ قۇزىرەتتىلىگىنە ەرەكشە نازار اۋدارىلدى. جۇمىستى جۇيەلەۋ جانە اسكەري-پاتريوتتىق تاربيە سۋبەكتىلەرىن قۇرۋ ۇسىنىلدى. وڭىرلەردىڭ وسى باعىتتاعى ءتيىمدى قىزمەتىنىڭ باعالاۋ كريتەريلەرىنىڭ ءبىرى – جەرگىلىكتى اتقارۋشى ورگانداردىڭ, ارداگەرلەر ۇيىمدارىنىڭ, اسكەري-تەحنيكالىق مەكتەپتەردىڭ, كوللەدجدەردىڭ, جوعارى وقۋ ورىندارى اسكەري كافەدرالارىنىڭ, اسكەري بولىمدەردىڭ جانە قوعامدىق ۇيىمداردىڭ جۇمىسى بولۋعا ءتيىس.
اسكەري-پاتريوتتىق جۇمىستى ۇيىمداستىرۋ تۋرالى قىزىلوردا, ماڭعىستاۋ, ۇلىتاۋ وبلىستارى اكىمدەرىنىڭ ورىنباسارلارى – مەيرامبەك شەرماعامبەتوۆ, قانات قۇلجانوۆ, عالىمجان قۇسمانعالي بايانداما جاسادى. «جاستار اسسامبلەياسى» رقب توراعاسى تيمۋر جۇمىرباەۆ ءوز جۇمىسىنىڭ ەرەكشەلىكتەرى تۋرالى ايتىپ بەردى. كەڭەسكە قاتىسۋشىلار 2030 جىلعا دەيىنگى جاستاردى اسكەري-پاتريوتتىق تاربيەلەۋ تۇجىرىمداماسىنىڭ جوباسىن تالقىلادى. ونىڭ قورىتىندىسى بويىنشا ۆەدومستۆوارالىق كوميسسيا قۇرۋ ۇسىنىلدى.
بۇل كوميسسيا جاستاردى پاتريوتتىق تاربيەلەۋ ماسەلەلەرى بويىنشا نورماتيۆتىك-قۇقىقتىق بازانى جەتىلدىرۋدى جالعاستىرادى. العاشقى اسكەري دايىندىق قاعيدالارىنا وزگەرىستەر مەن تولىقتىرۋلار ەنگىزە وتىرىپ, ءااتد وقىتۋشىلارىنا قويىلاتىن بىلىكتىلىك تالاپتارى ناقتىلانباق. قازاق حالقىنىڭ باتىرلىق تاريحىن, ەكىنشى دۇنيەجۇزىلىك سوعىس پەن ۇرىس ءىس-قيمىلدارىنا قاتىسۋشىلاردى, اسكەري كاسىپتە, سپورتتا, مادەنيەتتە جانە باسقا دا قىزمەتتە جەتىستىككە جەتكەن زامانداستارىن دارىپتەۋ جونىندەگى جۇمىسقا ءجىتى نازار اۋدارىلادى.
جەرگىلىكتى اتقارۋشى ورگاندارعا ارداگەرلەر ۇيىمدارىن, اسكەري كافەدرالاردى, اسكەري-تەحنيكالىق مەكتەپتەر مەن ەرىكتىلەردى جۇمىسقا تارتۋ جانە ولاردىڭ الەۋەتىن پايدالانۋعا ۇسىنىستار بەرىلدى.
