وسىدان ەكى جىل بۇرىن عانا تولىقتاي جوندەۋدەن وتكەن اۋدان ورتالىعى سيلانتەۆ كەنتىندەگى سپورت كەشەنى الىس-جاقىننان جينالعان جۇرتقا لىق تولدى. سپورت مەرەكەسى اسەم ءان-كۇيمەن, كوپشىلىكتى سالاماتتى ءومىر سالتىنا ۇندەيتىن تەاترلاندىرىلعان قويىلىممەن اشىلدى. ودان كەيىن وبلىستىڭ 20 وڭىرىنەن كەلگەن سپورتشىلار ساپ قۇرىپ, سپارتاكيادا الاۋى جاعىلدى. سالتاناتقا ارنايى كەلىپ قاتىسقان ايماق باسشىسى سپورتشىلارعا ساتتىلىك تىلەپ, جينالعان جۇرتقا قۇتتىقتاۋ ءسوزىن ارنادى.
– بارشاڭىزدى وتىز التىنشى «تىڭ-تسەلينا» سپارتاكياداسىنىڭ اشىلۋىمەن قۇتتىقتايمىن. بۇل ايتۋلى دودا بۇقارالىق سپورتتى ودان ءارى دامىتۋعا, دوستىقتى نىعايتۋعا جانە ورتاق ماقساتتارعا جەتۋگە كومەكتەسەدى. ءبىزدىڭ مىندەت – قوستاناي وبلىسىن ەلىمىزدەگى ەڭ سپورتقا جاقىن وڭىرگە اينالدىرۋ. سوندىقتان سپورت ينفراقۇرىلىمىن جاقسارتۋعا كۇش سالامىز. الداعى ۋاقىتتا بارلىق اۋداننىڭ ورتالىق ستاديوندارىن كۇردەلى جوندەۋدەن وتكىزىپ, اۋدان ورتالىقتارىندا ساۋىقتىرۋ كەشەندەرىن, ونىڭ جانىنان جابىق مۇزايدىندارىن سالۋدى جوسپارلاپ قويدىق. بۇگىندە وبلىستا 340 مىڭعا جۋىق ادام نەمەسە حالىقتىڭ 40 پايىزى بەلسەندى تۇردە سپورتپەن شۇعىلدانادى. ونىڭ ىشىندە 85 مىڭ بالا تۇراقتى تۇردە سپورت سەكتسيالارىنا بارىپ, بەلگىلى ءبىر سپورت تۇرىمەن اينالىسىپ ءجۇر. بۇل – بۇقارالىق سپورتتى ناسيحاتتاۋ باعىتىندا اتقارىلىپ جاتقان جۇمىستاردىڭ جەمىسى ەكەنى ءسوزسىز, دەدى قۇمار اقساقالوۆ.
وبلىس اكىمى ودان كەيىن ءوڭىر سپورتىنىڭ دامۋىنا ەڭبەك سىڭىرگەن بىرقاتار سپورتشىعا ارنايى ديپلوم مەن اقشالاي سىيلىق تابىس ەتتى.
كەشكىلىك سپارتاكيادانىڭ اشىلۋ سالتاناتىنا ارنايى شاقىرتىلعان قايرات نۇرتاس, امىرە جانە كاليفارنيا سىندى ەسترادا جۇلدىزدارىنىڭ كونتسەرتى باستالدى. كوپشىلىك, اسىرەسە جاستار اراسىندا كەڭ تانىمال بولعان ونەرپازداردى ەرەكشە ىقىلاسپەن قارسى الىپ, ونەرلەرىن تىك تۇرىپ تاماشالادى. كونتسەرت سوڭى بي كەشىنە ۇلاسىپ, حالىق شات-شادىمان كوڭىل كۇيمەن تارقاستى.
كەلەسى كۇنى ءوز وڭىرلەرىنىڭ نامىسىن ارقالاي كەلگەن 20 كوماندانىڭ باسەكەسى باستالدى. سپورت ويىندارى ءبىر مەزەتتە اۋداننىڭ ءار تۇسىندا ءوتىپ جاتتى. بۇل جەردە ءار اۋداننان كەلگەن كوماندالار قۇرامىنداعى سپورتشىلار سانى جاعىنان بىردەي بولماعانىن ايتا كەتكەن ءجون. ماسەلەن, جارىسقا رۋدنىي قالاسىنىڭ اتىنان 100-دەن اسا سپورتشى شىقسا, وبلىس ورتالىعىنان شالعاي جاتقان جانگەلدين اۋدانىنىڭ جالاۋىن كوتەرگەن سپورتشىلاردىڭ سانى – ەلۋدىڭ اينالاسىندا عانا.
– دوپ ويىندارىن قوسپاعاندا, ءبىز كوماندالىق ويىنداردىڭ ءبىرازىنا قاتىسا المايمىز. ويتكەنى تورعاي وڭىرىندە سپارتاكيادا باعدارلاماسىنداعى سپورت تۇرلەرىنىڭ ءبىرازى جوق. جەكەلەگەن سپورت تۇرلەرىنەن قاتىسۋشىلار جەتكىلىكتى. مىسالى, ءوزىم قازاق كۇرەسىنەن سىنعا تۇسۋگە كەلدىم. جالپى, كوماندالىق ۇپاي جيناۋدا ءىرى قالالارمەن باسەكەلەسۋ وڭايعا تۇسپەسى انىق. دەي تۇرعانمەن, جەرلەستەرىمىز نامىستى قولدان بەرمەي, جاقسى ناتيجە كورسەتەدى دەگەن ۇمىتتەمىن, – دەدى جانگەلدين اۋدانىنا قاراستى قالام-قاراسۋ اۋىلىنىڭ اكىمى بەرىك مۇحامبەدين.
سيلانتەۆ, وباعان جانە بولشوي چۋراكوۆ اۋىلدارىنا قونىستانعان سپورتشىلار سپارتاكيادا كەستەسىنە سايكەس ءۇش كۇن بويى سىنعا ءتۇستى. جارىستىڭ العاشقى كۇنى گرەك-ريم كۇرەسىنىڭ ۇزدىكتەرى انىقتالدى. كوماندالىق ەسەپتە قوستاناي قالاسى – ءبىرىنشى, قوستاناي اۋدانى – ەكىنشى, اۋليەكول اۋدانى ءۇشىنشى ورىن يەلەندى. كىر كوتەرۋ بويىنشا قوستاناي قالاسىنىڭ سپورتشىلارىنا ەشكىم شاق كەلمەدى. ارقالىق قالاسىنىڭ بىلەكتىلەرى ەكىنشى ورىننان كورىنسە, قوستاناي اۋدانىنىڭ سپورتشىلارى ءۇشىنشى ورىنعا تابان تىرەدى. جەڭىل اتلەتيكادان جىتىقارالىقتار مەن ليساكوۆ قالاسىنىڭ جەلاياقتارى جەڭىس تۇعىرىنان كورىندى.
وبلىستىڭ وڭتۇستىك وڭىرلەرى قازاق كۇرەسىنەن قاي كەزدەن-اق ۇزدىك ناتيجە كورسەتىپ كەلەدى. وسى جولعى سپارتاكيادا-
دا كوماندالىق ەسەپ بويىنشا, ارقالىق قالاسىنىڭ بالۋاندارى جەڭىستى جۇلىپ اكەتتى. ايتالىق, 60 كيلو سالماقتا اكىمبەك قايرات, 90 كيلودا نۇرسۇلتان ءسالىمجان, 100 كيلودا بەكبولات جاسۇلان جەڭىمپاز اتانىپ, كوماندا جەڭىس تۇعىرىنان كورىندى. 2-ورىندى قوستاناي قالاسى يەلەنسە, 3-ورىن قوستاناي اۋدانىنا بۇيىردى. دزيۋدو كۇرەسىنەن دە ارقالىقتىڭ ەرلەر جانە قىزدار كومانداسىنا شاق كەلەتىن ەشكىم تابىلمادى.
كوپشىلىكتىڭ دەلەبەسىن قوزدىرعان تارتىستى باسەكەنىڭ ءبىرى – ات جارىسى بولدى. 6 شاقىرىمدىق قۇنان بايگەدە مەڭدىقارا اۋدانىنان كەلگەن ەلنۇر وتەگەننىڭ «بەسقارا» اتتى جۇيرىگى كومبەگە ءبىرىنشى كەلدى. 12 شاقىرىمدىق توپ بايگەدە اۋليەكول اۋدانىنان كەلگەن «نوعاي قارا» توپ ىشىنەن قارا ءۇزدى. ال 20 شاقىرىمدىق الامان بايگەنىڭ باس جۇلدەسى اتىراۋ وبلىسىنىڭ «تويتورى» دەپ اتالاتىن تۇلپارىنا بۇيىردى.
– «بەسقارا» ءوزىم باپتاپ جۇرگەلى بەرى از جۇلدە ولجالاعان جوق. ۇنەمى ۇزدىك ۇشتىكتىڭ قاتارىنان كورىنىپ ءجۇر. وسى جولى دا باعى مەن بابى قاتار كەلىسىپ, قۇنان بايگەدە ءبىرىنشى كەلدى. قۋانىشتىمىن. 300 مىڭ تەڭگە قانجىعاعا بايلاندى. بۇيىرتسا, ءالى تالاي بايگەلەردە جۇلدىزى جانادى دەپ سەنەمىن, – دەيدى اتبەگى ەلنۇر وتەگەن.
سونىمەن جارىستىڭ ءۇشىنشى كۇنىن دوپ ويىندارى تۇيىندەپ, ءتۇس اۋا وبلىستىق سپارتاكيادانىڭ قورىتىندىسىن جاريالاۋعا ارنالعان ءراسىم ءوتتى. جارىستىڭ باس تورەشىسى, وبلىستىق دەنە شىنىقتىرۋ جانە سپورت ءبولىمى باسشىسىنىڭ ورىنباسارى ەلەنا كيرەەۆا جيىرما كوماندانىڭ ءۇش كۇن بويى جيعان ۇپايلارىن جاريا ەتتى. اۋداندار اراسىندا قاراسۋ – ءۇشىنشى ورىن (234 ۇپاي), بەيىمبەت مايلين اۋدانى – ەكىنشى (236 ۇپاي), قوستاناي اۋدانى ءبىرىنشى ورىن (278 ۇپاي) يەلەندى. ال جالپىكوماندالىق ەسەپتە سپارتاكيادانىڭ باس كۋبوگى 317 ۇپاي جيناعان قوستاناي قالاسىنىڭ سپورتشىلارىنا بۇيىردى. قوستاناي وسىمەن ونىنشى رەت چەمپيون اتانىپ وتىر. رۋدنىيلىقتار 295 ۇپايمەن 2-ورىندى ەنشىلەسە, قوستاناي اۋدانىنىڭ سپورتشىلارى 3-ورىندى قاناعات تۇتتى.
سپورت مەرەكەسىنىڭ جابىلۋ راسىمىندە ءداستۇرلى سپارتاكياداسىنىڭ بايراعى قارابالىق اۋدانىنا تابىس ەتىلدى.
