فوتو: اتىراۋ وبلىسى اكىمدىگىنىڭ رەسمي سايتى
وڭىرلىك كوممۋنيكاتسيالار قىزمەتىنىڭ مالىمەتتەرىنشە مۇگەدەكتىگى بار ادامدارعا قاتىستى ماسەلەلەردى شەشۋ ءۇشىن جول كارتاسى اياسىندا بىرقاتار وڭ وزگەرىستەر ەنگىزىلگەن.
وبلىستا وسىعان دەيىن, مۇگەدەكتىگى بار جانداردىڭ جانە ەرەكشە قاجەتتىلىكتى كەرەك ەتەتىن بالا اسىراپ وتىرعان انالاردىڭ ماسەلەلەرى ايتىلا كەلە, سول ماسەلەلەردى جۇيەلەپ شەشىمدەرىن تابۋ ماقساتىندا ازىرلەنگەن ارنايى جول كارتاسىندا 16 ماسەلە قارالعان. بيىلعى جىلدىڭ باسىنان بەرى, ونىڭ جەتەۋى وڭ شەشىمىن تاپقان. ەندى, قالعانى بىرتىندەپ شەشىلمەك. ماسەلەن, مىندەتتى گيگيەنالىق قۇرالداردىڭ ءبىر جىلعا بەرىلەتىن سانى 730-دان 1460 داناعا كوبەيتىلگەن. سونىمەن بىرگە مۇگەدەكتىگى بار بالا اسىراپ وتىرعان انالار قوعامدىق كولىكتەردە تەگىن قاتىنايتىن بولعان. سونداي-اق مۇمكىندىگى شەكتەۋلى جاندارعا جىلىنا ءبىر رەت بەرىلەتىن الەۋمەتتىك كومەكتىڭ مولشەرى ارتتىرىلعان.
«وسىعان دەيىن تەگىن بەرىلەتىن ورتوپەديالىق بۇيىمدار بارلىعىنا بىردەي ىڭعايلى كەلە بەرمەيتىن. سول سەبەپتى, مۇگەدەكتىگى بار جاندار بۇل بۇيىمداردى مونەتيزاتسيالاۋدى سۇراعان بولاتىن. سۇرانىستارى ورىندالدى», دەيدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ازامات مامبەتوۆ.
باسقارما باسشىسىنىڭ ايتۋىنشا ارباعا تاڭىلعان بالالارعا ارنالعان ويىن الاڭدارىن سالۋ جۇمىستارى جول كارتاسىندا جوسپارعا ەنگىزىلگەن. سونداي-اق بۇل كۇندەرى مۇگەدەكتىگى بار جاندارعا كۋروتتىق-شيپاجايلارعا جولداما بەرىلگەننەن كەيىن, ۋاقىتىلى تەمىرجول بيلەتتەرىن تابۋ قيىندىق تۋدىرادى. اتالعان ماسەلەنى وڭتايلى شەشۋ ءۇشىن جول كارتاسى اياسىندا قر يندۋستريا جانە ينفراقۇرىلىمدىق دامۋ مينيسترلىگىنە تەمىرجول بيلەتتەرىن برونداۋ نەمەسە قوسىمشا ۆاگوندار ەنگىزۋ تۋرالى ۇسىنىس جولدانعان.
سونداي-اق كەلەر جىلى ينۆاتاكسي قىزمەتىن ۇلعايتۋ بويىنشا ارنايى ۇسىنىستار ەنگىزىلۋدە.
