فوتو: قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ ءباسپاسوز قىزمەتى
كەزدەسۋ IPMA® «جوباعا باعدارلانعان قوعامدى ىلگەرىلەتۋ» زەرتتەۋ جوباسى اياسىندا ءوتتى.
جوبانىڭ ماقساتى – بۇگىنگى تاڭدا جوبالىق باسقارۋ ءىسى نەعۇرلىم دامىعان بەس ەلدەگى (گەرمانيا, قىتاي, قازاقستان, حورۆاتيا, پەرۋ) كەيس-زەرتتەۋلەر نەگىزىندە كاسىبي ۇيىمداردىڭ قوعامنىڭ جوباعا باعدارلانۋىنا اسەرىن انىقتاۋ. دوكتور رەينحارد ۆاگنەر وسى زەرتتەۋ جوباسىنىڭ جەتەكشىسى بولىپ تابىلادى جانە جوباعا باعدارلانعان قوعامدى ىلگەرىلەتۋدەگى تاجىريبەلەرىمەن ەگجەي-تەگجەيلى تانىسۋ ءۇشىن وسى اتالعان بارلىق ەلگە بارۋدى جوسپارلاپ وتىر.
كەزدەسۋ اياسىندا رەكتور ەرلان قۋانىش ۇلى مەملەكەتتىك باسقارۋ جۇيەسىندە جوباعا باعدارلانعان قوعامدى ىلگەرىلەتۋدەگى اكادەميانىڭ ءرولى جايىندا ايتتى.
«قر پرەزيدەنتىنىڭ جانىنداعى مەملەكەتتىك باسقارۋ اكادەمياسى جوبالىق باسقارۋدىڭ ۇلتتىق جۇيەسىن قالىپتاستىرۋ, ۇلتتىق جوبالىق كەڭسەنى, مەملەكەتتىك ورگانداردىڭ جوبالىق كەڭسەلەرىن قۇرۋ جانە ولاردىڭ قىزمەتىن رەتتەۋ جونىندەگى نورماتيۆتىك-قۇقىقتىق قۇجاتتاردى ازىرلەۋ ماسەلەلەرىندە نەگىزگى ءرول اتقاردى جانە ۇيلەستىرۋشىسى بولدى. جوبالىق مەنەدجمەنتتى دامىتۋ ورتالىعىن قۇرۋ اكادەميانىڭ بىرىڭعاي وقۋ-ادىستەمەلىك الاڭ جانە قازاقستاندىق تاجىريبەنىڭ ەرەكشەلىگى مەن مەملەكەتتىك سەكتورداعى باسقارۋ قىزمەتىنىڭ ەرەكشەلىكتەرىن ەسكەرەتىن جوبالىق مەنەدجمەنت سالاسىنداعى مەملەكەتتىك قىزمەتشىلەردىڭ ءبىلىمى مەن قۇزىرەتتەرىن جۇيەلەۋ بويىنشا تولىققاندى بازا رەتىندە قالىپتاسۋىنا ىقپال ەتتى. 2018 جىلدان باستاپ اكادەميا 30 مىڭنان استام ادامدى وقىتتى, قر ست ISO ۇلتتىق ستاندارتى جانە جوبالىق مەنەدجمەنت سالاسىنداعى Prince2® بريتاندىق ستاندارتى بويىنشا 3 مىڭعا جۋىق ادامدى سەرتيفيكاتتاۋدان وتكىزدى. اكادەميانىڭ سەرتيفيكاتتالعان جوبا مەنەدجەرلەرىنىڭ باسىم بولىگى ورتالىق جانە جەرگىلىكتى مەملەكەتتىك ورگانداردىڭ قىزمەتكەرلەرى بولىپ تابىلادى جانە ولار ەلىمىزدىڭ جوبالىق باسقارۋ ەكوجۇيەسىندە جۇمىس ىستەيدى», دەدى رەكتور.
دوكتور رەينحارد ۆاگنەر اكادەميانىڭ ۇلەسىن جاقسى باعالادى, سونداي-اق قازاقستاندا جوبالىق مەنەدجمەنتتى دامىتۋ بويىنشا ودان ءارى جۇمىس جۇرگىزۋ ماقساتىندا ساراپتامالىق ۇسىنىستارىن بەردى.
«قازاقستان الەمدىك اۋقىمدا ازىرلەنگەن ءادىسنامالاردى, ونىڭ ىشىندە حالىقارالىق ستاندارتتاۋ ۇيىمىنىڭ (ISO), اقش-تىڭ جوبالاردى باسقارۋ ينستيتۋتىنىڭ جانە الەمدىك ستاندارت بولىپ تابىلاتىن IPMA ءادىسناماسىن پايدالانادى. مەنىڭ ويىمشا, بۇل بارلىق قولجەتىمدى ستاندارتتاردى بىرىكتىرىپ, ولاردى وزدەرىڭىزدىڭ جوبالارىڭىزعا قولايلى ەتكەندەرىڭىز وتە جاقسى قادام. مەن ماسەلە ءادىسنامادا عانا ەمەس, سونداي-اق ادامداردىڭ رۋحى مەن ويلاۋىندا ەكەنىن ۇنەمى ايتامىن. سىزدەر ەل يگىلىگى ءۇشىن وزدەرىڭىزدىڭ نە ىستەپ جانە قالاي ىستەپ جاتقاندارىڭىزدى كورسەتكەندەرىڭىزدى, ايتقاندارىڭىزدى قالار ەدىم», دەدى ول.
سونداي-اق دوكتور رەينحارد ۆاگنەردىڭ قازاقستانعا ساپارى بارىسىندا اكادەميانىڭ Alma Mater Europaea ەۋروپالىق ۋنيۆەرسيتەتىمەن ىنتىماقتاستىق ماسەلەلەرى تالقىلاندى.
