IT-Aiel باعدارلاماسى – 2 مىڭ ايەلگە IT ماماندىقتار بويىنشا تەگىن ءبىلىم الۋعا مۇمكىندىك بەرەتىن بىرەگەي جوبا. باعدارلامانى Astana Hub تەحنوپاركى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيامەن بىرلەسىپ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ قولداۋىمەن ىسكە قوستى.
– قازاقستان – GovTech جانە FinTech سالالارى دامىعان ەل. اۋماعىنىڭ ۇلكەندىگىنە قاراماستان, ورتالىق ازيا مەن شىعىس ەۋروپا ەلدەرى اراسىندا تسيفرلاندىرۋ جانە ينتەرنەتتى تاراتۋ سالاسىندا ايتارلىقتاي ناتيجەگە قول جەتكىزدى. وسى رەتتە ايەلدەردىڭ تسيفرلىق ەكونوميكاداعى كۇشى مەن قابىلەتىنە سەنىمدىلىگىن دامىتۋ ءۇشىن ايەلدەردىڭ تسيفرلىق بيزنەستەگى IT-كاسىپكەرلىگىن قولداۋ, قارجىلىق ينتەگراتسيانى كەڭەيتۋ ءۇشىن ولارعا تسيفرلىق داعدىلاردى ۇيرەتۋ جانە بيزنەستى باسقارۋ بويىنشا وقىتۋدى ىنتالاندىرۋ ماڭىزدى. ايەلدەردىڭ تسيفرلىق ەكونوميكاعا قاتىسۋىن ىنتالاندىرۋ نەعۇرلىم كۇشتى ەكونوميكالىق وسىمگە جانە ءال-اۋقاتتىڭ ارتۋىنا ىقپال ەتەدى, – دەيدى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى ءازيزا شوجەەۆا.
ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرى بويىنشا, ەلىمىزدە 967 مىڭ جۇمىسقا قابىلەتتى ايەل بار. ولاردىڭ 34 پايىزى جۇمىس ىستەمەيدى. ال 41 پايىزى جوعارى ءبىلىم دارەجەسىنە يە. ال Coursera IFC جانە ەۋروپالىق كوميسسياسىمەن بىرلەسە جۇرگىزگەن زەرتتەۋ مالىمەتىنشە, ايەلدەردىڭ 45 پايىزى جانە بالا كۇتىمىندەگى ايەلدەردىڭ 60 پايىزى ونلاين وقۋ مۇمكىندىگى بولماعاندىقتان, وقۋىن كەيىنگە قالدىرۋعا ءماجبۇر بولعان. سوندىقتان IT-Aiel باعدارلاماسى جۇمىسسىز ايەلدەردى وقىتىپ, ولاردىڭ وسى سالاداعى ۇلەسىن ارتتىرۋدى كوزدەپ وتىر.
ءا.شوجەەۆانىڭ ايتۋىنشا, دۇنيەجۇزىندە ەڭ ءىرى جانە ەڭ ىقپالدى تەحنولوگيالىق كومپانيالاردىڭ تەحنيكتەرى اراسىنداعى ايەلدەردىڭ ۇلەسى وتە تومەن: Apple-دە – 23 پايىز, Google-دا – 20 پايىز جانە Microsoft-تا – 17,5 پايىز. الەمدە اقپاراتتىق-كوممۋنيكاتسيالىق تەحنولوگيالار ماماندارىنىڭ جالپى ۇلەسى 18,5 پايىز بولسا, قازاقستاندا ايەلدەر بۇل سەكتور قىزمەتكەرلەرىنىڭ 43 پايىزىن قۇرايدى. 55-74 جاس ارالىعىنداعى ادامدار اراسىندا ينتەرنەتتى پايدالانۋداعى گەندەرلىك الشاقتىق دامۋشى جانە وتپەلى ەكونوميكاسى بار ەلدەردە شامامەن 8 پايىزعا تەڭ. گەندەرلىك ستەرەوتيپتەر مەن مادەني نورمالار كوبىنەسە ايەلدەر مەن قىزداردىڭ تسيفرلىق تەحنولوگيالارعا قولجەتىمدىلىگىنە كەدەرگى كەلتىرەدى جانە ولاردىڭ اقپاراتتىق-كوممۋنيكاتسيالىق تەحنولوگيالارمەن بايلانىستى سەكتورلاردا ءبىلىم الۋ جانە جۇمىسقا ورنالاسۋ مۇمكىندىكتەرىن تومەندەتەدى.
IT-Aiel باعدارلاماسى اتالعان ماسەلەلەردى نازارعا الىپ, ەلىمىزدەگى اقپاراتتىق-كوممۋنيكاتسيالىق تەحنولوگيالار سەكتورىنداعى ايەلدەر سانىن كوبەيتۋگە دەن قويعان. جوبا بويىنشا وقىتۋ 1 تامىزدا قازاق جانە ورىس تىلدەرىندە ونلاين فورماتتا باستالادى. ايەلدەردىڭ بۇل جوباعا قاتىسۋعا دەگەن ىنتاسى مەن تالپىنىسى وتە جوعارى. 2 307 ءوتىنىمنىڭ 668-ءى استانادان, 371-ءى – الماتىدان, 63-ءى – شىمكەنتتەن جانە 1205-ءى ەلىمىزدىڭ وزگە وڭىرلەرىنەن كەلىپ تۇسكەن.
– ءبىز باعدارلاماعا قىزىعۋشىلاردىڭ گەوگرافياسى كەڭ ەكەنىن كورىپ وتىرمىز. ەلىمىزدىڭ بارلىق وڭىرىندە تۇراتىن ايەلدەر IT سالانى ۇيرەنگىسى كەلەدى. باعدارلاما جۇمىسقا ورنالاسپاعان ايەلدەر ءۇشىن ۇلكەن قۇندىلىققا يە جانە ول اقپاراتتىق تەحنولوگيالار سالاسىندا ايەلدەر كاسىپكەرلىگىن قولداۋ مەن تەڭ مۇمكىندىكتەر جاساۋ جولىنداعى ماڭىزدى قادام بولىپ وتىر. ءبىز قازاقستاندىق ايەلدەردىڭ كاسىبي دامۋعا جانە ەلىمىزدىڭ اقپاراتتىق تەحنولوگيالار يندۋسترياسىنا ءوز ۇلەسىن قوسۋعا ۇمتىلىپ وتىرعانىنا قۋانىشتىمىز, – دەدى Astana Hub باسقارۋشى ديرەكتورى الينا ءابدىراحمانوۆا.
جوبا اياسىندا قاتىسۋشىلارعا كومپيۋتەرلىك ساۋاتتىلىق, No Code School جانە Freelance School كۋرستارىنان وتەدى. وقۋ بەينە دارىستەر, تاپسىرمالار, ونلاين ۆەبينارلار جانە ۆوركشوپتار تۇرىندە وتكىزىلەدى. قاتىسۋشىلارعا جانە IT-ونىمدەردى باعدارلامالاۋدى قاجەت ەتپەستەن تەز جاساۋدى, ستارتاپ جوبالاردى قۇرۋدى جانە ولاردى دۇرىس تەستىلەۋدىڭ نەگىزگى پرينتسيپتەرىن مەڭگەرەتىن بولادى. باعدارلاما تىڭداۋشىلارى لەندينگتەردى, سايتتاردى, ءموبيلدى قوسىمشالاردى, چات-بوتتاردى جانە ماركەتپلەيستەردى قۇرۋعا ارنالعان اكتۋالدى no code قۇرالدارىن زەردەلەۋ بويىنشا ماتەريالداردى ۇسىناتىن ونلاين ساباقتارعا قول جەتكىزەدى. سونداي-اق ۇيىمداستىرۋشار باعدارلاماعا قاتىسقان ايەلدەر العان ءبىلىمىن فريلانس نارىعىندا ىسكە جاراتىپ, قارجى تابا الاتىنىن اتاپ ءوتتى.
– ءبىز IT-Aiel باعدارلاماسىنا ەلىمىزدەگى فريلانس-ەكونوميكانى قولداۋ جانە تسيفرلىق الاڭداردا فريلانسەر ايەلدەردىڭ ۇلەسىن ارتتىرۋ ماقساتىندا Freelance School كۋرسىن ەنگىزدىك. فريلانسينگتى وقۋ ايەلدەرگە قاشىقتان جۇمىس ىستەپ, جالاقى مەن جۇمىسقا ورنالاسۋداعى گەندەرلىك الشاقتىقتى ازايتا وتىرىپ, جەرگىلىكتى جانە شەتەل ۆاليۋتاسىندا اقشا تابۋعا مۇمكىندىك بەرەدى, – دەدى Astana Hub ءبىلىم بەرۋ باعدارلامالارى كەڭسەسىنىڭ ديرەكتورى داۋلەت بەيمۋرزينوۆ.
وقۋ ناتيجەسىندە IT-Aiel باعدارلاماسىنىڭ تۇلەكتەرىنە كۋرستان وتكەنىن راستايتىن سەرتيفيكات بەرىلەدى.
