قامىستى كادەگە جاراتۋعا بولا ما؟ اتالعان اۋىلدا تۇراتىن مەكتەپ وقۋشىسى جانەل شايدوللا ونى قۇرىلىس سالاسىنا پايدالانۋدىڭ جوباسىن ۇسىنىپ وتىر.
«بۇرىن قامىستى تۇرعىن ءۇي قابىرعاسىنا قولدانعانىن ەستىگەن ەدىم. سونداي ۇيلەر ءالى دە بار. ال الەمنىڭ كوپتەگەن ەلىندە قامىستى قۇرىلىس يندۋسترياسىنا كەڭىنەن پايدالانۋ قولعا الىنا باستادى. قامىس پەن تسەمەنتتەن قۇيىلعان بەتونمەن ءۇيدىڭ قابىرعاسىن تۇرعىزۋعا, شاتىرىن جابۋعا قولدانۋدىڭ ەكولوگيالىق تۇرعىدان تيىمدىلىگى بار. ويتكەنى قامىس سالقىن كەزدە ۇيدەگى جىلۋدى, ال ىستىقتا قوڭىر سالقىن تەمپەراتۋرانى ساقتاپ تۇرادى. بىراق قۇرىلىس ماتەريالىنا ساپالى قامىس قاجەت», دەيدى جانەل شايدوللا.
وقۋشىنىڭ جەتەكشىسى نۇرگۇل يمامۇراتوۆانىڭ پىكىرىنشە, قامىستان قالىڭدىعى 20-30 سم شاتىر جابىندىسىن جاساۋعا بولادى. مۇنىڭ بىرنەشە سەبەبى بار.
«بىرىنشىدەن, قامىستىڭ سۋ وتكىزبەيتىنى دالەلدەنگەن. ەكىنشىدەن, قامىس قۇرامىندا اقۋىز بولماعاندىقتان, شىبىن-شىركەي سەكىلدى جاندىكتەر جينالمايدى. ۇشىنشىدەن, قامىستان جاسالعان شاتىردىڭ توزىمدىلىگى 30 جىلعا دەيىن جەتەدى», دەيدى نۇرگۇل يمامۇراتوۆا.
