جىلىوي اۋدانىنىڭ ورتالىعى – قۇلسارى قالاسىندا تۇراتىن اندريان رومانوۆتى قازاقتىڭ «سارى» بالاسى دەۋگە بولادى. ول قازاقشا ەركىن سويلەيدى. وسىنداعى قۇلسارى بالالار ونەر مەكتەبىنىڭ دومبىرا كلاسىن بىتىرگەن. قازىر ونىڭ ءىنىسى فورتەپيانو كلاسىندا وقىپ ءجۇر.
اندريان رومانوۆ بىلتىر «مىڭ بالا» جوباسى اياسىندا «ونەرلى ورگە جۇزەر» بايقاۋىنا قاتىستى. بايقاۋدىڭ ماقساتى وزگە ەتنوستار بالالارىنىڭ قازاقتىڭ ۇلتتىق ونەرىن مەڭگەرۋگە قىزىعۋشىلىعىن وياتۋ ەدى.
– مەنىڭ تاڭداعان مۋزىكالىق اسپابىم – دومبىرا. كىشكەنتاي كەزىمنەن دومبىرانىڭ كۇمبىرلەگەن ءۇنىن ۇناتۋشى ەدىم. قوس ىشەكتى اسپاپتى تارتۋدى ۇستازىم تالانت بالعىنباەۆ ۇيرەتتى. «مىڭ بالا» جوباسىنىڭ بايقاۋىندا قازاقتىڭ ونەرىنە مول مۇرا قالدىرعان قايتالانباس كومپوزيتور قۇرمانعازى ساعىرباي ۇلىنىڭ «اداي» كۇيىن ورىندادىم. بۇل شىعارمانى نەگە تاڭدادىم؟ ويتكەنى بۇل – ادامنىڭ كوڭىل-كۇيىن شارىقتاتاتىن, جىگەرلەندىرەتىن كۇي. وسى كۇيدى ورىنداپ, بايقاۋدىڭ جەڭىمپازى اتاندىم. استانادا اقپارات جانە قوعامدىق دامۋ ءمينيسترى دارحان قىدىرالىنىڭ قولىنان ماراپات العان ساتتە قۋانىشىمدا شەك بولمادى. دومبىرانى مەڭگەرۋىمە, رەسپۋبليكالىق بايقاۋدىڭ جەڭىمپازى اتانۋىما ۇستازىمنىڭ ەڭبەگى زور, – دەيدى اندريان رومانوۆ.
جاس دومبىراشىنىڭ ايتۋىنا قاراعاندا, جىلىوي اۋدانىندا قازاقپەن بىرگە بىرنەشە ەتنوستىڭ وكىلدەرى دە تۇرادى. قازاقپەن بىرگە ەل بەرەكەسىن ارتتىرىپ جۇرگەن ورىس پەن تاتار, وزبەك پەن قاراقالپاق سەكىلدى ۇلت وكىلدەرى اراسىندا حالقىمىزدىڭ ونەرىن دارىپتەيتىندەر, اسىرەسە دومبىرا شەرتۋدى مەڭگەرگەندەر از ەمەس. سولاردىڭ قاتارىندا جاس ۇلان بولاشاعىن قازاق ونەرىمەن بايلانىستىرۋدى كوزدەپ وتىر. اندرياننىڭ ارمانى – اقتاۋداعى ماڭعىستاۋ ونەر كوللەدجىندە مۋزىكالىق ءبىلىم الۋ. ءسويتىپ, قازاقتىڭ كۇي ونەرىن ناسيحاتتاۋعا, دامىتۋعا ۇلەس قوسپاق.
