وكىنىشكە قاراي, قاتەرلى ىسىكتىڭ بۇل ءتۇرى جىلدام اسقىنىپ, قاتتى ورشيتىنىمەن ەرەكشەلەنەدى. بىرىكتىرىلگەن, ياكي كەشەندى ەمدەۋدىڭ زاماناۋي ادىستەرى ءتيىمدى كۇرەسۋگە مۇمكىندىك بەرگەنىمەن, اۋرۋ اسقىنباي قويىلعان دياگنوستيكانىڭ كومەگى وراسان. ونكولوگ دارىگەرلەر وبىردىڭ بۇل ءتۇرى باستاپقىدا ىسىكتىڭ پايدا بولۋى نەمەسە بۇرىننان بار مەڭنىڭ ءتۇسى, كولەمى مەن ءپىشىنىنىڭ وزگەرۋى سياقتى بەلگىلەرىنەن كورىنە باستايتىنىن ايتادى. ءبىرىنشى كەزەكتە ناۋقاس مەڭىنىڭ مازالاپ, قىشۋى, اۋىرسىنۋى, دەنە قىزۋىنىڭ كوتەرىلۋى سياقتى بەلگىلەرگە شاعىمدانۋى مۇمكىن. بۇعان شاقىرايعان كۇن استىندا شامادان تىس كوپ ءجۇرۋ, تۇقىم قۋالايتىن كەسەلدەر, ناشار ەكولوگيا, بەلگىلى ءبىر فوتوتيپتەگى سەپكىلدەر, اقشىل تەرى مەن كوزدىڭ اشىق ءتۇسى, جىپىرلاعان مەڭدەردىڭ پايدا بولۋى سەبەپشى.
«قازاق ونكولوگيا جانە راديولوگيا عزي» اق ونكودەرماتولوگ-دارىگەرى دينا تىلەۋوۆانىڭ ايتۋىنشا, باسقا ەلدەردەگى سياقتى قازاقستاندا دا تەرى وبىرىنا شالدىعۋ كورسەتكىشى جوعارى, اسىرەسە 55-84 جاس ارالىعىنداعى ايەل ادامدار ءجيى اۋىراتىن كورىنەدى.
«تەرى قاتەرلى ىسىگى – تەرىنىڭ ەپيدەرميسىندەگى قالىپتان تىس جاسۋشالاردىڭ باقىلاۋسىز ءوسۋى جانە ءبولىنۋى. كەز كەلگەن تەرى وبىرىنىڭ باستى سەبەپشىسى – كۇن ساۋلەسىنىڭ شامادان تىس اسەر ەتۋى. ەگەر ادام جاس كەزىندە, ياكي بالا كۇنىندە كەم دەگەندە كۇنگە ەكى رەت قاتتى كۇيىپ قالسا, ەگدە تارتقاندا ول ادامدا تەرى قاتەرلى ىسىگىنىڭ دامۋ قاۋپى 50 پايىزعا دەيىن ارتادى», دەيدى مامان.
دارىگەرلەر ۋف-كۇن ساۋلەسىنەن ساقتانۋدى ەسكەرتەدى. تەرىنىڭ قاتەرلى ىسىگىنە كوبىنەسە ايەلدەر شالدىعادى ەكەن, ويتكەنى ولار ءجيى كۇن ساۋلەسىنە قىزدىرىنادى.
«ەگەر تۋعاننان كەلە جاتقان مەڭ, قال وزگەرىپ, قاناي باستاسا, ءتۇسىن وزگەرتسە نەمەسە جاڭا مەڭدەر پايدا بولسا, مىندەتتى تۇردە ونكودەرماتولوگپەن كەڭەسۋ كەرەك. دەرتتى ورشىتپەي دياگنوستيكالاۋ پاتسيەنتتىڭ كوبىنەسە وزىنە بايلانىستى, نەعۇرلىم تەزىرەك دارىگەرگە جۇگىنسە, سوعۇرلىم شيپاسى ءتيىمدى بولادى», دەيدى دسم-نىڭ شتاتتان تىس باس ونكولوگى, «قازاق ونكولوگيا جانە راديولوگيا عزي» اق باسقارما توراعاسى ديليارا قايداروۆا.
ەسكەرەتىن جايت, ماماندار مەڭدى سۇلۋلىق سالوندارىندا ەمەس, مامانداندىرىلعان كلينيكالاردا العىزعان دۇرىس ەكەنىن ايتادى. مەڭدى العىزعاننان كەيىن, قاتەرلى ىسىكتىڭ بار-جوعىن تەكسەرۋ ءۇشىن گيستولوگياعا جىبەرتۋ كەرەك.
