جوبا اياسىندا احمەت ءياساۋيدىڭ بالالىق شاعى, قوجاناسىردىڭ تاپقىرلىعى مەن ميفتىك جاراتىلىستار تۋرالى انيماتسيالار تۇسىرىلەدى. انيماتسيالىق الماناحقا كىرەتىن تۋىندىلار ستسەناريىنە ءۇش اي بۇرىن كونكۋرس جاريالانعان بولاتىن. اۆتورلارعا شىعارمانىڭ كوركەمدىك دەڭگەيىنىڭ جوعارى بولۋى مەن وتكەن تاريحتى بۇگىنگى كۇنمەن بايلانىستىرا ءبىلۋى باستى تالاپ رەتىندە قويىلعان. كونكۋرسقا تۇركىتىلدەس ەلدەردىڭ ۇلى تۇلعالارى, قاسيەتتى جانۋارلارى مەن جەر-سۋ اتاۋلارى, تۇركىتىلدەس ەلدەردىڭ ورتاق مەرەكەلەرى مەن ۇلتتىق ويىن-ساۋىقتارى تۋرالى اڭىزدار نەگىزىندە جازىلعان 26 ستۋديادان 40 ستسەناري كەلىپ تۇسكەن. ارنايى ۇيىمداستىرىلعان بايقاۋ ناتيجەسىندە ء«ۇش ارىس», «شىراق باتىر مەن بۇركىت جايلى اڭىز», «لەيلا. تۇركى پاتشايىمىنىڭ قۇپياسى», «اشينا – ءبىرىنشى كوكتۇرىك», «تۇران», «التىن كول», «احمەت», «قوجاناسىر جانە ۇرى», «سۋىندار» جانە «جۇماق دەگەنىمىز...» اتتى 10 انيماتسيالىق جوبا قولداۋعا يە بولدى. ءار انيماتسيانىڭ حرونومەتراجى 5 مينۋتتان اسادى.
– وندىرىسكە جىبەرىلگەن پيلوتتىق انيماتسيالىق جوبالار جانر جاعىنان دا, تاقىرىپ بويىنشا دا ءبىر-بىرىنە ۇقسامايدى. ارقايسىسى وزىندىك ەرەكشەلىگىمەن دارالانادى. بۇل جوبا تۇركىتىلدەس مەملەكەتتەر اراسىنداعى ىنتىماقتاستىقتى نىعايتىپ قانا قويماي, قازاقستاندىق ستۋديالارعا جاڭا نارىقتارعا شىعىپ, كورەرمەن اۋديتورياسىن كەڭەيتۋگە مۇمكىندىك بەرەدى. سونداي-اق بۇل بولاشاقتا باۋىرلاس ەلدەرمەن بىرلەسكەن انيماتسيالىق جوبالار جاساۋدىڭ العاشقى قادامى, – دەدى مسم مادەنيەت كوميتەتى توراعاسىنىڭ مىندەتىن اتقارۋشى كۇمىس سەيىتوۆا.
