قر ءىىم ءباسپاسوز قىزمەتىنىڭ مالىمەتىنشە, ەسىرتكى قىلمىسىنا قارسى كۇرەس ءبولىنىسىنىڭ قىزمەتكەرلەرى ينتەرنەت دۇكەننىڭ قاتىسۋشىلارىن انىقتادى. 18, 25 جانە 29 جاستاعى ءۇش جەرگىلىكتى تۇرعىن وبلىس ورتالىعىندا سينتەتيكالىق ەسىرتكى قۇرالدارىن قۇپيا ورىندارعا جاسىرىن قويىپ كەتىپ وتىرعان. ۇستالعانداردان ساتۋعا ارنالعان 250-دەن استام ءبىر رەتتىك سينتەتيكالىق ەسىرتكى دوزاسى, سونداي-اق ءموبيلدى قۇرىلعىلار تاركىلەندى. ولاردىڭ كومەگىمەن جاسىرىن ورىنداردى سۋرەتكە ءتۇسىرىپ, ەسەپ بەرىپ وتىرعان.
ءموبيلدى قۇرىلعىلاردى تەكسەرۋ كەزىندە Telegram مەسسەندجەرىندە «كۋرەرلەر» تاۋار بويىنشا نۇسقاۋلار مەن كوورديناتتار جازىلعان حات الماسۋ چاتى تابىلدى. تاۋار مەتالل بەتىنە بەكىتىلۋى ءۇشىن ىشىنە ماگنيت سالىپ, جابىسقاق يزولەنتامەن وراعان.
«ساراپتاما كورسەتكەندەي, زەرتتەۋگە ۇسىنىلعان زاتتار جالپى سالماعى 73 گرامنان اساتىن A-PvP پسيحوتروپتىق زاتى ەكەنى انىقتالدى. قارا نارىقتاعى باعاسى 2 ملن تەڭگەدەن اسادى», دەدى وبلىستىق پد باستىعىنىڭ ورىنباسارى ناريمان كۇلدىكوۆ.
جىل باسىنان بەرى وبلىس پوليتسەيلەرى زاڭسىز اينالىمنان 200 كەلىگە جۋىق ءتۇرلى ەسىرتكى زاتتارىن تاركىلەدى. كۇدىكتىلەر ۋاقىتشا ۇستاۋ يزولياتورىنا قامالدى. وسى دەرەك بويىنشا قر قك-ءنىڭ 297-بابى 3-بولىگىمەن سوتقا دەيىنگى تەرگەۋ جۇرگىزىلىپ جاتىر. ونىڭ سانكتسياسى 15 جىلعا دەيىنگى مەرزىمگە باس بوستاندىعىنان ايىرۋ جازاسىن قاراستىرادى.
