اتالعان جوبا اياسىندا سالىناتىن 63 مەكتەپتىڭ 29-ىنىڭ قۇرىلىسى بيىل باستالىپ, كەلەسى جىلى اياقتالادى. ال قالعان 34 مەكتەپتىڭ قۇرىلىسى 2024 جىلى باستالادى.
مەكتەپتەردىڭ قۇرىلىسىنا وتاندىق ماتەريالدار قولدانىلاتىنى ءوز الدىنا, وعان قوسا, جەرگىلىكتى وندىرۋشىلەرگە باسىمدىق بەرىلەدى. ءاربىر مەكتەپتىڭ قۇرىلىس ماتەريالدارى قاتاڭ باقىلانىپ, ارنايى ستاندارت بەكىتىلەدى.
تۇركىستان وبلىسىنىڭ اكىمى دارحان ساتىبالدى تۇركىستانداعى №28 مەكتەپ-ليتسەيىندە ۇيىمداستىرىلعان كورمەگە ارنايى بارىپ, «جايلى مەكتەپ» جوباسىنا قولدانىلاتىن قۇرىلىس ماتەريالدارى مەن مەكتەپ جيھازدارىنىڭ جوبالارىمەن تانىستى.
- «جايلى مەكتەپ» – مەملەكەت باسشىسى قاسىم-جومارت كەمەل ۇلىنىڭ تىكەلەي باقىلاۋىندا تۇرعان جوبا. ءاربىر مەكتەپتىڭ قۇرىلىسى وتە ساپالى ءارى جوسپارعا ساي سالىنۋى ءتيىس. وڭىردە ۇلتتىق جوبانى جۇزەگە اسىرۋ باعىتىندا جۇمىس توبىنا ءار مەكتەپتىڭ قۇرىلىسىن مۇقيات قاداعالاۋدى تاپسىرامىن. بالالارىمىزدىڭ الاڭسىز ءبىلىم الۋىنا, ۇستازدارىمىزدىڭ جوعارى دەڭگەيدە جۇمىس ىستەۋىنە جاعداي جاسالۋى قاجەت. وعان مۇمكىندىك تە, جاعداي دا بار. وبلىستىڭ جيھاز جانە قۇرىلىس ماتەريالدارىن شىعاراتىن كومپانيالارىنا, جۇمىسشىلارىنا باسىمدىق بەرىلۋى ءتيىس. ولاردىڭ الەۋەتى جەتپەسە, قوسىمشا وزگە وڭىرلەردەگى وتاندىق وندىرۋشىلەرمەن كەلىسىم جاسالىپ, جوبالار ءوز مەرزىمىندە جۇزەگە اسۋى كەرەك, – دەدى اكىم.
وبلىس اكىمى قۇرىلىس ماتەريالدارى مەن مەكتەپ جيھازدارىن وندىرەتىن كومپانيا وكىلدەرىمەن كەزدەسىپ, ۇسىنىستارى مەن پىكىرلەرىن تىڭدادى.
كورمەدە مەكتەپتەرگە قاجەتتى جيھازدار, مەكتەپ قۇرىلىسىندا قولدانىلاتىن ماتەريالدار تۋرالى ماعلۇماتتار بەرىلدى. بارلىق 63 مەكتەپكە ارنايى ستاندارت بەكىتىلەتىنى, مەردىگەرلەر سول ەرەجەگە ساي جۇمىس ىستەيتىندىگى ايتىلدى. مەكتەپ ديرەكتورلارى مەن ءبىلىم ساراپشىلارىنا تۇركىستان وبلىسىنىڭ جانە وزگە وڭىرلەردىڭ جيھاز شىعاراتىن كومپانيالارى ءوز ونىمدەرىن ۇسىندى.
63 مەكتەپكە پارتالار, ورىندىقتار, ۇستازدارعا ارنالعان ۇستەلدەر, شكافتار, اسحاناعا قاجەتتى ۇستەلدەر مەن ورىندىقتار, تاقتالار, كەڭسە ورىندىقتارى جانە وزگە دە جيھازدار قاجەت. قاجەتتىلىكتى وتەۋ ماقساتىندا تۇركىستان وبلىسى اكىمدىگىنىڭ اتالعان سالا بويىنشا جاۋاپتى باسقارمالارى وبلىستاعى جانە ەلىمىزدىڭ وزگە وبلىستارىنداعى وتاندىق كومپانيالارمەن كەلىسسوزدەر جۇرگىزىپ, الدىن الا مەموراندۋمدار جاساماق, بۇل باعالاردىڭ قىمباتتاۋىنىڭ الدىن الۋعا دا مۇمكىندىك بەرەدى.
قاجەتتى جيھاز كولەمى اۋقىمدى بولۋىنا بايلانىستى تۇركىستان وبلىسىندا جيھاز شىعاراتىن كاسىپورىن اشىلادى دەپ جوسپارلانىپ وتىر.
