اسىل ەربولاتوۆا اباي وبلىسى ماقانشى اۋدانىنا قاراستى كەلدىمۇرات اۋىلىنىڭ تۋماسى. اكەسى مال شارۋاشىلىعىمەن اينالىسسا, اناسى - بالا تاربيەسىنە باسا نازار اۋدارعان. ولار ءۇش اعايىندى, اسىل ورتانشىسى. مەكتەپتى ۇزدىك تامامداعان. كەيىن ارمان قۋىپ الماتىعا قازۇۋ-دىڭ مەحانيكا-ماتەماتيكا فاكۋلتەتىنە وقۋعا تۇسكەن. وقۋدى بىتىرۋىنە ەكى اي ۋاقىت قالعاندا اناسى ومىردەن وزعان.
«مۇنداي قايعى ءتىپتى مىقتىنىڭ ءوزىن قاجىتىپ, ەسەڭگىرەتىپ جىبەرەدى. مەن سونداي كەزەڭدى باستان وتكەردىم. ەشتەڭەگە قۇلشىنىس بولمادى. دەگەنمەن بالا كۇنىمنەن دەگەنىمە جەتپەي قويمايتىنمىن. انام قايتىس بولعان سوڭ باسىلىپ قالدىم. ەسىمدى جيىپ, ەڭسەمدى تىكتەگەن سوڭ كافەگە كاسسير بولىپ جۇمىسقا تۇردىم. سوسىن تۋريستىك كومپانيادا تۋر اگەنتى بولىپ جۇمىس ىستەدىم. سول جۇمىستا جۇرگەندە ءبىرىنشى رەت شەتەلگە شىقتىم. ساياحاتتاۋدىڭ اسەرى مۇلدە بولەك ەكەنىن سەزىندىم. سودان سوڭ اينالامنىڭ ايتقانىنا ەرىپ, «مەكتەپتى قىزىلعا ءبىتىردىم, قازۇۋ-دە وقىدىم, لايىق جۇمىس ىستەيىن» دەپ ەسەپشى بولىپ جۇمىسقا تۇردىم. جالاقىم 80 مىڭ تەڭگە بولسا دا, جيناپ-تەرىپ, ساياحاتقا ءجيى شىعۋدى ماقسات ەتتىم. سول جيعان اقشاما تايلاندقا ساياحاتتاپ قايتتىم», دەيدى اسىل.
بالا كەزىنەن تابيعات اياسىندا كوپ جۇرگەندى ۇناتاتىن اسىلدىڭ العاشقى شەت ەلگە ساپارى كوڭىلىنەن شىقسا كەرەك. ءسويتىپ ول باسقا ەلدە جۇمىس ىستەۋگە بەكىنەدى. ونىڭ العاشقى جۇمىسى - كاتاردا رەسپەشندە بولدى. اسىل ءبىراز ۋاقىت وتكەن سوڭ اعىلشىن ءتىلىن جەتىك مەڭگەردى. الايدا پاندەميا كەزىندە ەلگە قايتىپ ورالعان. قازاقستانعا كەلگەننەن كەيىن اۋدارماشى بولۋعا ءار ءتۇرلى مەملەكەتتەرگە تۇيىندەمەسىن جىبەرگەن. مالديۆتەن كومپانيا حابارلاسىپ اۋدارماشى بولۋعا شاقىرعان. تابيعاتىنان ۋ-شۋدى ۇناتپايتىن اسىلعا ارالداعى جۇمىس كوڭىلىنەن شىقتى. بۇندا تەك جۇمىس, تابيعات جانە سپورت. اسىل وزىنىڭ دايۆينگ ينسترۋكتور بولاتىنىن مۇلدەم ويلاماعانىن ايتتى. بوس ۋاقىتىندا سنوركلينگپەن اينالىسىپ, ماسكا جانە دەم الۋ تۇتىگىن تاعىپ الىپ, سۋ استىندا جۇزەدى ەكەن. تۋريستەر كۇنىنە ءبىر رەت قانا جۇزسە, ول سۋدان مۇلدەم شىقپايتىن كورىنەدى. ءسويتىپ دايۆينگكە دەگەن قىزىعۋشىلىعى كۇننەن-كۇنگە ارتقان.
ارادا ءبىر جىل وتكەننەن كەيىن جۇمىس بەرۋشىمەن اراسىنداعى كەلىسىمشارت اياقتالدى. جانىنداعى دوستارىنىڭ كەڭەسىمەن تايلاندقا بارىپ 3 اي وقىعان. وندا ءبىرىنشى كۇنى ارنايى تەوريالىق نەگىزدەرىن وقىعان, ەكىنشى كۇنى حاۋىزدا پراكتيكالىق جاتتىعۋلار جاساعان. سوڭىندا تەستىلەۋدەن ءوتىپ, سەرتيفيكات الدى. جالپى, مالديۆ ارالدارىندا قوناقۇيلەر دايۆ ورتالىقتارمەن تىعىز جۇمىس ىستەيدى. دوستارىنىڭ ۇسىنىسىمەن سوندا ەۋروپالىقتار اشقان ءبىر دايۆ ورتالىققا جۇمىسقا كىرگەن.
اسىلدىڭ ايتۋىنشا, دايۆينگتىڭ پايداسى زور. ونى مەديتاتسيانىڭ ءبىر ءتۇرى دەپ اتاساق تا بولادى. ايتسە دە قالتانى قاعاتىنى تاعى بار. مىسالى, مالديۆ ارالدارىندا ءبىر ساعاتقا جالعاساتىن سۇڭگۋدىڭ باعاسى ەكى ءجۇز الپىس دوللار تۇرادى.
اسىل كوپشىلىكتىڭ ويىنداعى «دايۆينگ قاۋىپتى جۇمىس» دەگەن ءسوزدى جوققا شىعاردى.
«كوپشىلىگى سۋ استىندا ءجۇزىپ جۇرگەن اكۋلالاردان سەسكەنۋى مۇمكىن. بىراق ونداعى اكۋلالاردىڭ ەشكىمگە زيانى جوق. باسىندا مەن دە ۇرەيگە بوي الدىرىپ, اكۋلا جوق جاققا بارىپ سۋعا سۇڭگيتىنمىن. سوسىن ءوز-ءوزىمدى «اسىل, سەن كۇنىنە نەشە رەت سۇڭگىپ ءجۇرسىڭ. اكۋلالار ساعان جولاعان ەمەس. قورىقپا» دەپ جۇباتىپ, كەيىن ولاردى الىستان كورگەندە قورىقپايتىن بولدىم. دايۆينگ ينسترۋكتور قاۋىپتى ەمەس, قيىن جۇمىس دەپ ايتار ەدىم. ويتكەنى مۇندا سۋدا جۇزە المايتىنداردى ءجيى كەزدەستىرەسىڭ. ولاردى نولدەن باستاپ ۇيرەتەتىن – سەن. سوندىقتان شىدامدى بولۋىڭ كەرەك. ءارى سەن جاي عانا دايۆينگ ينسترۋكتور ەمەس, ادام جانىن تۇسىنەتىن پسيحولوگ بولا ءبىلۋىڭ كەرەك», دەدى اسىل.
جالپى, دايۆينگ ءبىر ساعاتقا سوزىلادى. دايۆينگ جاساۋعا قولايلى نۇكتەلەرىن تاڭداپ العاننان كەيىن, اۋەلى ينسترۋكتور سۋعا ءتۇسىپ, اعىسىن تەكسەرەدى.ء ارى قاراي تۋريستەرمەن بىرگە سۇڭگيدى. العاشىندا ەكى مەتر تەرەڭ جەردە سۇڭگىسە, بىرتە-بىرتە ودان دا تەرەڭ جەرگە بارادى. كوپ جاعدايدا دايۆينگتى الدىمەن حاۋىزدا ۇيرەنەدى. دەگەنمەن بىردەن تەڭىزگە سۇڭگىپ ۇيرەنگىسى كەلەتىندەردىڭ قاتارى كوپ. ولار شىنايى اتموسفەرانى سەزىنگىسى كەلەدى ەكەن.
سونىمەن قاتار اسىل «دايۆينگ تەك ەر ادامدارعا ارنالعان» دەگەن ءسوزدى دە جوققا شىعاردى. ارالدا ءوزى سياقتى نازىك جاندىلاردىڭ كوپ ەكەنىن اتاپ ءوتتى.
سۇحبات سوڭىندا اسىل قازاقستانعا دەگەن ىستىق ساعىنىشىن ايتىپ, بولاشاقتا ەلگە ورالىپ, دايۆينگ ورتالىقتارىن اشىپ بۇل قىزىعۋشىلىعىن كاسىپ كوزىنە اينالدىرعىسى كەلەتىنىن اتاپ ءوتتى.
