جاڭالىقتىڭ يەسى – «تورتكۇل» جالپى ورتا مەكتەبىندە وقيتىن جەتكىنشەك ايتۋار سوۆەتبەك. ەشكىمگە ايتپاي سومكەنى جاساپ بولىپ, سىنىپقا بىرگە كىرىپ كەلگەندە مۇعالىمدەردىڭ دە, وقۋشىلاردىڭ دا اۋىزدارى اشىلىپ قالىپتى. ادام ءبىر نارسەگە مۇقتاج بولسا, سوعان جەتسەم دەپ ارماندايدى. ەڭبەكتەنەدى, اقىل-ويىن ىسكە قوسادى. ايتۋاردىڭ ويلاپ تاپقان دۇنيەسى دە سول مۇقتاجدىقتىڭ ناتيجەسىندە پايدا بولعان. ول وسىدان ءبىر جىل بۇرىن جول اپاتىنا ءتۇسىپ قالعان ەكەن. سودان كۇردەلى وپەراتسيا جاسالادى. دارىگەرلەر ۇزاق ۋاقىت اۋىر زات كوتەرۋگە تىيىم سالىپتى. ءتىپتى كىتاپ-داپتەردىڭ ءوزىن كوتەرۋگە بولمايتىنىن ەسكەرتىپتى. ال ايتۋار ءبىلىم العاندى جاقسى كورەدى. ساباقتان قالعاندى ۇناتپايدى. نە ىستەۋ كەرەك؟! «قالاۋىن تاپسا, قار جانادى» دەمەكشى بويىندا تالانتى بار وقۋشى ءبىلىمى مەن وي جۇيرىكتىگىن دە ىسكە قوسىپ «اقىلدى سومكە» جاساپ شىعارعان. ءسويتىپ, مىنەكي تىعىرىقتان شىعار جول تاۋىپ كەتىپتى.
«ۇيدە جاتا بەرگەننەن پايدا جوق. ەشنارسە وقي المايسىڭ. جالعىز قالعاندا ءبىلىم الۋىڭ دا قيىن عوي نەگىزى. ونىڭ ۇستىنە سىنىپتاستارىم مەكتەپتىڭ ناعىز قىزىقتى شاقتارىن باستان وتكەرىپ جاتقاندا قالاي ۇيدە تىنىش جاتاسىڭ. قاتارىمنان قالعىم كەلمەيدى. بىراق سول كەزدە مەكتەپكە بارايىن دەسەم, دەنساۋلىعىم جارامادى. وقۋ-قۇرالىمدى تاسيتىن جەكە ءبىر ادام كەرەك بولدى. ۇيدەگىلەرگە جاۋاپكەرشىلىك ارتا المادىم. ارقايسىسىنىڭ جۇمىسى بار. ۇنەمى مەنىڭ قاسىمدا جۇرمەيدى عوي. سوسىن ءبىر كۇنى ويلانىپ جاتىپ, شىركىن كىتاپتارىمدى تاسيتىن, ءارى پۋلتپەن جۇرەتىن سومكەم بولسا عوي دەپ قيال جەتەگىنە بەرىلىپ كەتتىم. نەسى بار, ىستەپ كورسەك, كورەيىك دەدىم دە الدىمەن نوبايىن قاعازعا ءتۇسىرىپ, كارتوننان العاشقى ۇلگىسىن جاسادىم. پلاستماسسا جاشىگىن, ودان باسقا بىرنەشە ماتەريالدى پايدالاندىم. ول تيىمدىلىگىن بايقاۋ ءۇشىن كەرەك ەدى. وسىلايشا, دۇنيەگە پلاستماسسا ماتەريالىنان جاسالعان سومكە كەلدى. پۋلتپەن جۇرەتىن, ءارى باسقارىلاتىن بولعان سوڭ وعان «اقىلدى سومكە» دەپ ات قويىپ الدىم. كەرەمەت بولدى. سومكەم مەنىمەن بىرگە كىتاپ-داپتەرىمدى كوتەرىپ مەكتەپكە دەيىن سەرىك بولىپ بارادى. تەكپەشەككە كەلگەندە سىنىپتاستارىم كومەكتەسىپ جىبەرەدى», دەدى اعىنان جارىلعان جاس ونەرتاپقىش ايتۋار.
«بالاسى اتقا شاپسا, اناسى ۇيىندە وتىرىپ تاقىمىن قىسادى» دەمەكشى, ۇلىنىڭ بۇل يدەياسىنا البەتتە اناسى قولداۋ ءبىلدىرىپ, ءتىپتى ديزاينىنا دەيىن اقىل-ويىن قوسىپ جاردەمىن كورسەتكەن. سوندىقتان «اقىلدى سومكەنىڭ» سىرت ءپىشىنىنىڭ يدەيا اۆتورى اناسى دەسەك جاراسادى. قازىر تۇركىستاندىق وقۋشى جىلجىمالى سومكەنى ودان ءارى جەتىلدىرىپ جاتىر. ەندى تەكپەشەكتەن دە ءوزى كوتەرىلىپ شىعا بەرەتىن مەحانيزم جاساماقشى. العان ويى ءساتتى جۇزەگە اسسا, ءونىمىن ساتىلىمعا شىعارسام با دەگەن نيەتى بار كورىنەدى.
