پلاتفورمانىڭ نەگىزگى مىندەتى – جۇمىس بەرۋشىلەر مەن جۇمىس ىزدەۋشىلەردى ءبىر ورتادا بىرىكتىرۋ. باستامانى جوعارى وقۋ ورىندارىنىڭ وكىلدەرى كوتەرگەن. بۇگىندە قوسىمشاعا ەلىمىزدىڭ 20 وڭىرىنەن 500 جۇمىس بەرۋشى تىركەلىپتى. ولار 1 500 بوس جۇمىس ورنىن جاريالاپ ۇلگەرگەن.
– NEET جاستاردىڭ جۇمىسپەن قامتىلۋى جانە ولاردىڭ ۇلەسىن ازايتۋ – قالالىق جاستار ساياساتىنىڭ باسىم باعىتتارىنىڭ ءبىرى. وسى ورايدا باسقارمادا جۇمىسسىزدىقپەن كۇرەسۋ ءۇشىن 4 وزەكتى ماماندىق – قىزمەت كورسەتۋ, Iت, قولونەر جانە soft skils بويىنشا جاستارعا ارنالعان قىسقامەرزىمدى كۋرستار ىسكە قوسىلدى. جاڭا داعدىلاردى يگەرۋ جاستارعا پەرسپەكتيۆالى جانە قىزىقتى ماماندىقتى تاڭداۋعا, جۇمىس تابۋعا, قوعامداعى تاۋەلسىز ومىرگە بەيىمدەلۋگە جانە ءوزىن-ءوزى جۇزەگە اسىرۋعا مۇمكىندىك بەرەدى. بۇگىنگى تاڭدا 3 850 جاس 14 كۋرس بويىنشا ءبىلىم الدى. بىزدەر «Jobfair 365» پلاتفورماسى ارقىلى دا جاستارعا جاڭا مۇمكىندىكتەرگە جول اشتىق. قازىر وندا ەڭ سۇرانىسقا يە كولىك جانە لوگيستيكا سالاسىنداعى 257 بوس جۇمىس ورنى جانە ءوندىرىس پەن اۋىل شارۋاشىلىعى سالاسىنداعى 222 بوس جۇمىس ورنى, – دەدى جاستار ساياساتى جونىندەگى باسقارما باسشىسىنىڭ ورىنباسارى ءازيز قاجدەنبەك.
ال جارمەڭكەنىڭ وزىنە 850 ءىرى كومپانيا قاتىسىپ, 10 مىڭنان استام بوس ورىن ۇسىنىلعان. ناتيجەسىندە, كاسىبي تاعىلىمداماعا 3 800 ادام جانە ودان ءارى جۇمىسقا ورنالاسۋ ءۇشىن 4 900 ازامات شاقىرىلىپتى.
جالپى, ەلىمىزدىڭ تۇكپىر-تۇكپىرىندە بوس ورىندار جارمەڭكەسى ءجيى وتكىزىلىپ تۇرادى. ماسەلەن, اقپارات جانە قوعامدىق دامۋ مينيسترلىگى مەملەكەتتىك جاستار ساياساتىنىڭ 2023-2029 جىلدارعا ارنالعان تۇجىرىمداماسى اياسىندا «Tulga Bol» اكتسياسىن ۇيىمداستىردى. مۇندا تۇلەكتەر مەن جاستارعا جۇمىسقا ورنالاسۋ ماسەلەلەرى, مەملەكەتتىك باعدارلامالار تۋرالى اقپاراتتاندىرۋ, تۇرعىن ءۇي ساتىپ الۋ, 2,5% نەسيە, ءوز ءىسىن اشۋ جانە باسقا دا باعىتتار جونىندە كەڭەس بەرىلدى. ءىس-شارا 7 ماۋسىم كۇنى قىزىلوردا وبلىسىنان باستالدى.
– بۇل جاستارعا مەملەكەت تاراپىنان قولداۋ كورسەتۋ ءۇشىن ۇيىمداستىرىلىپ وتىر. بۇگىندە وبلىس كولەمىندە 19 بەن 35 جاس ارالىعىنداعى 250 مىڭعا جۋىق جاس بار. ولاردى قوعامنىڭ بەلسەندى ازاماتتارىنىڭ قاتارىنا قوسۋ – مەملەكەتتىك ماڭىزى بار ساياسي باعىتتاردىڭ ءبىرى. سىر جاستارى وسى جارمەڭكەدە بوس جۇمىس ورىندارى, قۇقىقتىق ساۋاتتىلىق جانە تاعى باسقا وزدەرىن تولعاندىرعان ساۋالدار توڭىرەگىندە جاۋاپ تابا الادى. ءار ادام ءوز مۇمكىندىگىن جۇيەلى پايدالانۋ ارقىلى جەتىستىككە جەتەدى. وسى ماقساتتا ايماقتان 611, باسقا وڭىرلەردەن 600 بوس جۇمىس ورىندارى ۇسىنىلدى, – دەدى قىزىلوردا وبلىستىق قوعامدىق دامۋ باسقارماسى باسشىسىنىڭ ورىنباسارى ءۋاليحان يبراەۆ.
بۇگىندە ەلىمىزدە جۇمىسسىزداردىڭ سانى 453,5 مىڭ. ونىڭ ىشىندەگى 15 پەن 34 جاستاعىلار 4,8%-دى قۇرايدى. وسى ورايدا جاستاردى الەۋمەتتەندىرۋگە باعىتتالعان مۇمكىندىكتەر كەرۋەنىنىڭ تاعى ءبىرىن رەسپۋبليكا كولەمىندە ەڭبەك جانە حالىقتى الەۋمەتتىك قورعاۋ مينيسترلىگىنىڭ قولداۋىمەن «Amanat» پارتياسىنىڭ «جاستار رۋحى» جاستار قاناتى «جاستارعا جۇمىس» اتتى جوباسىن ۇيىمداستىرىپ جاتىر.
– جوعارى وقۋ ورىندارىنىڭ تۇلەكتەرى بوس جۇمىس ورىندارى ءۇشىن تالاس-تارتىسقا تۇسەدى. سوندىقتان بوس جۇمىس ورىندارى تۋرالى مالىمەتتى باسقالاردان بۇرىن ءبىلۋ ماڭىزدى. ءبىر مەزگىلدە بىرنەشە جۇمىس بەرۋشىمەن اڭگىمەلەسۋ وتە ىڭعايلى. سونىمەن قاتار ينتەرنەتتەگى نەمەسە ەڭبەك بيرجاسىنداعى حابارلاندىرۋلاردان ايىرماشىلىعى – مۇندا جۇمىس بەرۋشىمەن بەتپە-بەت كەزدەسىپ, تولعاندىرعان سۇراقتى قويۋعا بولادى. ال جۇزبە-ءجۇز اڭگىمەلەسكەن كەزدە مىندەتتى تۇردە كوپ اقپارات الاسىز, – دەدى ستۋدەنت شىڭعىس تۇرىسبەكوۆ.
