كورمەگە تاياۋدا عانا كيىز باسۋ كۋرسىن تامامداعان قاراپايىم قالا تۇرعىندارىنىڭ قولىنان شىققان قىرىقتان استام قولونەر تۋىندىسى قويىلعان. ولاردىڭ ىشىندە سىيكادەگە جارارلىق ءساندى بۇيىمدار, شاعىن سىرماق, تەكەمەت, باسقۇر, كىلەمشەلەر بار.
ۇيىمداستىرۋشىلاردىڭ ايتۋىنشا, وسىدان ەكى اپتا بۇرىن ارنايى كيىز باسۋ كۋرسى اشىلىپ, بايان باتالوۆا, دينارا قىپشاقباەۆا سىندى سۋرەتشى ۇستازدار وتىز ادامعا ۇلتتىق قولونەردىڭ قىر-سىرىن ۇيرەتكەن. بۇل ەكسپوزيتسيا سول وتىز ادامنىڭ ون بەس كۇن ىشىندە جاساپ شىققان دۇنيەلەرىن كوپشىلىك نازارىنا ۇسىنىپ وتىر.
– قازاق دالاسىندا سوناۋ كوشپەلى وركەنيەت مادەنيەتىنەن باستاۋ الاتىن كيىز باسۋ ونەرىنىڭ بەس مىڭ جىلدان استام تاريحى بار. بۇگىنگى ءىس-شارانى وسى ۇلتتىق قازىنامىزدى ولتىرمەي, ۇرپاقتان ۇرپاققا اماناتتاپ بىزگە دەيىن جەتكىزگەن اق كيمەشەكتى اجەلەرىمىز بەن اسىل انالارىمىزعا دەگەن تاعزىم-قۇرمەت دەپ بىلەمىن, – دەيدى وبلىستىق تاريحي-ولكەتانۋ مۋزەيىنىڭ ديرەكتورى باتىرحان جۇماباەۆ.
ەكى اپتالىق كيىز باسۋ كۋرسىنا قابىلدانعان وتىز شاكىرتتىڭ ىشىندە ءۇي شارۋاسىنداعى قىز-كەلىنشەكتەر, زەينەتكەرلەر مەن ستۋدەنتتەر بار. ولاردى ۇلتتىق قولونەرگە باۋلىپ, وقىتىپ, توقىتىپ شىعارعان ۇستاز دينارا قىپشاقباەۆانىڭ ايتۋىنشا, اسىرەسە ءارتۇرلى سەبەپپەن ۋاقىتشا ۇيدە وتىرىپ قالعان ايەلدەردىڭ ۇلتتىق قولونەرگە دەگەن قۇلشىنىسى زور.
– كۋرس بارىسىندا شاكىرتتەر قازاق حالقىنىڭ ۇلتتىق ويۋ-ورنەك ونەرىنىڭ تاريحى مەن باعىتتارىن وقىپ مەڭگەردى. ويۋ-ورنەكتەردىڭ قىر-سىرىن مەڭگەرە وتىرىپ, ءار ۇيرەنۋشى ءوزىنىڭ ءتول كومپوزيتسياسىن جاساپ شىقتى. ءبىز ءاۋ باستا ساتۋعا نەمەسە جاقىندارىمىزعا كادەسىي رەتىندە سىيلاۋعا بولاتىن قاراپايىم ءارى شاعىن بۇيىمداردى جاساپ شىعارۋدى ماقسات تۇتقان ەدىك. بىراق وزدەرىڭىز كورىپ وتىرعانداي, تاڭبالى پەتروگليفتەر مەن توبىل ويشىلى بەينەلەنگەن سيۋجەتتى ونەر تۋىندىلارىن دا جاساۋعا قول جەتكىزدىك. ءار تاپسىرمانى اسقان شابىتپەن اتقارىپ شىققان شاكىرتتەرىمە وتە ريزامىن. حالىقتىڭ قولونەر بۇيىمدارىن جاساپ ۇيرەنۋگە دەگەن ىنتاسى وتە جوعارى, – دەيدى دينارا.
قىسقا مەرزىم ىشىندە كيىزدەن كوز تارتار كوركەم دۇنيە جاساپ شىعارۋدى ۇيرەنىپ شىققان قىز-كەلىنشەكتەردىڭ قاتارىندا زەينەتكەر تاتيانا اكۋلوۆا دا بار. كورمەگە تاتيانا پاۆلوۆنانىڭ قولىنان شىققان 5 بىردەي تۋىندىسى قويىلىپتى.
– كوپ جىل بويى مەكتەپتە حيميا-بيولوگيا ءپانىنىڭ مۇعالىمى بولىپ جۇمىس ىستەدىم. تاياۋدا عانا زەينەتكە شىقتىم. وسى كۋرسقا قابىلداۋ ءجۇرىپ جاتقانىن الەۋمەتتىك جەلىدەن كورىپ, تاۋەكەل ەتىپ كەلگەنمىن. ءوزىم شىعارماشىلىقپەن اينالىسقاندى ۇناتامىن. سودان بولار, وڭاي مەڭگەرىپ الدىم. جۇنمەن جۇمىس ىستەۋ, كيىز باسۋ دەگەن دۇنيە جانىما جاقىن ەكەن, بىردەن ۇنادى. قازىر كيىزدەن كيىمدەر, كادەسىيلار مەن تۇرمىسقا قاجەت زاتتاردى, ءتىپتى ايەلدەردىڭ اشەكەي بۇيىمدارىن جاساۋ دا قولىمنان كەلەدى. قوشقار ءمۇيىز, قوس ءمۇيىز, تۇيە تابان سياقتى ويۋ-ورنەكتەردى جاساۋدى ۇيرەندىم. كۋرسقا قاتىسۋشىلار ءبارىمىز جابىلىپ قازاقستاننىڭ كيىز كارتاسىن جاساپ شىعاردىق. مەن الماتى وبلىسى مەن ۇلىتاۋ وبلىسىن جاساپ شىقتىم, – دەيدى ارداگەر ۇستاز.
سالتاناتتى شارانىڭ سوڭىندا كيىز باسۋ كۋرسىن ءتامامداۋشىلار سەرتيفيكاتتارىن الىپ, ۇزدىك شاكىرتتەرگە ارنايى ديپلومدار تابىس ەتىلدى.
قوستاناي وبلىسى
